Tetelonome 28 - Tosi Tapu

Ko tapuakina

¹ Kapau e ke fakalogo loa ki le leo o le Eteleno, lou Atua, o tausi ti mo fai ana folafola fuli ala e kau tuku atu kiate koe i le aso nei, e soli loa e le Eteleno, lou Atua, kiate koe le tuulaga uluaki i puleaga fuli o le kele.

² Ko nei a tapuakina fuli ala e ifo mai loa kiate koe o fakaapele ia a koe, mo kapau e ke fakalogo loa ki le leo o le Eteleno, lou Atua :

³ E ke tapuakina loa i le kolo, ti e ke tapuakina loa i le faisaga.

⁴ E tapuakina loa le fua o lou manava, mo le fua o lou kele, mo le fua o lau kau manu, ti e lasi loa lau kau pipi, mo lau kau ovi, mo lau kau koti.

⁵ E tapuakina loa lau polapola mo lau kumete lusi falina.

⁶ E ke tapuakina loa i lau kaku ki fale, ti e ke tapuakina loa i lau mavae i fale.

⁷ E kapu loa e le Eteleno i ou mua ou fili ala e malaga atu loa kiate koe. E lotou au loa kiate koe i se ala e tasi, ti e lotou sosola loa i ou mua i ni ala e fitu.

⁸ E kakau loa e le Eteleno le tapuakina ke nofo mo koe i ou fata mo au gaoi. E tapuaki loa a ia kiate koe i le fenua leia e soli atu loa kiate koe e le Eteleno, lou Atua.

⁹ E fakanofo loa a koe e le Eteleno ko se kakai maokioki kiate ia, o fai ki le nea leia na fakapapau atu e ia kiate koe, mo ka ke tausi loa a folafola a le Eteleno, lou Atua, ti mo ke saele loa i ona ala.

¹⁰ E tio loa a kakai fuli o le malama nei kua fakatapui a koe ki le Eteleno, ti e lotou fakaapaapa loa kiate koe.

¹¹ E fakaapele loa a koe e le Eteleno ki nea malilie, o fakaliuliuga a fua o lou manava, mo fua o au kau manu, mo fua o lou kele, i le fenua leia na fakapapau e le Eteleno ki ou tamana ke soli atu kiate koe.

¹² E fakamavaa loa e le Eteleno lona koloa malie, le lagi, ke to kiate koe le ua i lona temi, ti ke manuia le gaoi katoa o ou lima : E ke soli maua loa ki ni puleaga mauke kae e leaise ke too maua loa.

¹³ E fakaliliu loa a koe e le Eteleno ko le ulu kae e leaise ko le siku. E ke nofo tuumau loa i aluga, kae e leaise ke nofo loa i se aso i lalo, mo kapau e ke fakalogo ki folafola a le Eteleno, lou Atua, ala e kau tuku atu kiate koe i le aso nei, mo kapau e ke tausi loa latou ti mo ke fai loa latou,

¹⁴ mo kapau e leaise ke maliu loa ki le fetuu atamai pe ko le fetuu sema o folafola fuli ala e kau tuku atu kia koutou i le aso nei, o pipiki loa ki ni atua kese ti mo su loa kia latou.

Ko malaia

¹⁵ Kae kapau e leaise ke fakalogo loa ki le leo o le Eteleno, lou Atua, ti kapau e leaise ke tausi loa ti mo fai loa ana folafola fuli mo ana lao fuli ala e kau tuku atu kiate koe i le aso nei, ko nei loa malaia fuli ala e au loa kiate koe o fakaapele a koe :

¹⁶ E ke malaia loa i le kolo, ti e ke malaia loa i le faisaga.

¹⁷ E malaia loa lau polapola mo lau kumete lusi falina.

¹⁸ E malaia loa le fua o lou manava, mo le fua o lou kele, mo le fua o lau kau pipi, mo lau kau ovi, mo lau kau koti.

¹⁹ E ke malaia loa i lau ulu ki fale, ti mo lau mavae i fale.

²⁰ E kakau mai loa e le Eteleno kiate koe le malaia, mo le mamae, mo le tautea, i au gaoi fuli, o kaku ki lou maumaui mo lou mate fakafokifa, o tupu ko le fakalialia o au gaoi mo lau tiaki ia le Eteleno.

²¹ E sai loa e le Eteleno kiate koe le masaki veli, o kaku ki lou puli i le fenua leia e ke ulu loa ki ai o maua tofiga.

²² E tautea loa a koe e le Eteleno ki le fakalaulautetea, mo le fiva, mo le fufula, mo le vela, mo le masunu, mo le popo, ala e muli loa iate koe o kaku ki lou mate.

²³ E fai loa le lagi i aluga o lou ulu pe le kapa, ti e fai loa le kele i lalo o ou vae pe le ukamea.

²⁴ E kakau loa e le Eteleno ki lou fenua se ua efu mo se ua one ; e la to loa kiate koe o kaku ki lou maumaui.

²⁵ E tuku loa e le Eteleno ke ke sola i mua o lou fili ; e ke ano loa o tau kia latou i se ala e tasi, ti e ke sola loa i ona mua i ni ala e fitu. E ofolele loa puleaga fuli o le kele i le nea leia kua soko loa kiate koe.

²⁶ E kai loa ou mate e manu lele o le lagi mo manu o le kele, ti e leaise maua loa se tasi ke kapu ia latou.

²⁷ E tautea loa a koe e le Eteleno ki le papala o Esipito, mo le mamae o le faikauga, mo le kama, mo le kili mageo, ti e leaise ke maua ia loa se faitoo.

²⁸ E tautea loa a koe e le Eteleno ki le ulu vale, mo le mata fakapouli, mo le valea.

²⁹ E ke saele taufa loa i le lalatea ofaipe le kivi leia e taufa i le fakapouli. E leaise manuia loa sau gaoi fua e tasi, kae e ke mamae loa ti e ke fakaaloalofa loa i aso fuli. Ti e leaise maua loa se tasi ke fakamauli ia a koe.

³⁰ E ke feauaki loa mo se fafine, ti e momoe loa a ia mo se tasi ake tagata ; e ke fakatuu ia loa se fale, ti e leaise ke nofo loa i ai ; e ke to ia loa se vite, ti e leaise ke kai loa ki ai.

³¹ E tamate loa lau pipi tagata i ou mata, ti e leaise ke kai loa ki ai ; e kaia loa lau asino i ou mata, ti e leaise toe fakaliliu atu loa a ia kiate koe ; e soli loa au ovi ki ou fili, ti e leaise maua loa se tasi ke tokoi atu kiate koe.

³² E tuku loa ou vosa mo ou taineliki ki se puleaga kese, ti e tio loa ou mata ki ai ti e lotou mamae loa i aso fuli o tupu ko latou, kae e leaise ke mafai ia loa se nea.

³³ Ko se kakai leia e leaise ke iloa e kai ia loa a fua o lou kele mo le fua o lau gaoi katoa, ti e ke mauli popula loa ti mo taomia loa i aso fuli.

³⁴ E ke ulu vale loa o tupu ko le nea leia e tio loa ki ai ou mata.

³⁵ E tautea loa a koe e le Eteleno ki se masaki papala leia e kamata loa i ou tuli mo ou vae, ti e mafola loa o kaku ki ou taga vae mo lou tumuaki.

³⁶ E fakasaele loa a koe e le Eteleno mo lou sau, leia e ke fakanofo loa kiate koe, ki se puleaga leia na leaise ke iloa, e koe mo ou tamana.

³⁷ Ti ko puleaga fuli ala e taki loa a koe ki ai e le Eteleno e ofolele loa i le nea leia kua soko kiate koe ; ti e lotou katai loa a koe ti mo lauveli loa kiate koe.

³⁸ E ke to loa se pulapula lasi ki lau faisaga, kae e ke maua loa se ga fuata ikiiki, talie e kai loa a ia e le seseivaka.

³⁹ E ke to loa ni faisaga vite, ti e ke tausi loa latou, kae e leaise ke inu loa se vino, ti e leaise ke tau loa se fuai vite, talie e kai loa a ia e le unufe.

⁴⁰ E apele loa lou fenua i le olive, kae e leaise ke sinusinu loa i se lolo, talie e tokaumea loa a fua.

⁴¹ E ke maua ia loa ni vosa mo ni taineliki, ti e leaise lotou nonofo loa mo koe, talie e lotou ano loa o popula.

⁴² E nofoi loa e elekisi ou laakau fuli mo fua o lou kele.

⁴³ Ko le matapule leia e nofo loa i loto malie o ou e malaga tuumau loa o taualuga ake iate koe, kae ko koe, e ke ifo loa o taulalo tuumau iate ia.

⁴⁴ E soli maua loa e ia kiate koe, kae e leaise ke soli maua loa kiate ia.

⁴⁵ E au loa malaia fuli kiate koe, ti e lotou muli loa iate koe, ti e lotou maua loa a koe o kaku ki lou maumaui oki, talie na leaise ke fakalogo loa ki le leo o le Eteleno, lou Atua, o tausi ana folafola mo ana lao ala e soli atu e ia kiate koe.

⁴⁶ E tuu loa a nea ana o lee gato kiate koe mo ou sakoga, ofaipe ni fakamailoga mo ni nea fakaofolele.

⁴⁷ O tupu na leaise ke tausi ki le Eteleno, lou Atua, i le loto fiafia mo le loto alofa, i le temi leia na ke maua lasi ai a nea fuli ana,

⁴⁸ e ke liliu loa o tausi ki ou fili ala e kakau mai loa e le Eteleno kiate koe : E ke pakupaku loa, mo fia inu loa, mo telefua loa, mo fakaaloalofa loa i nea fuli. E teki loa e le Eteleno se ukamea ki ou tuauma o kaku ki lou maumaui.

⁴⁹ E lagai loa e le Eteleno kiate koe se puleaga mei mamao, mei potupotu o le malama nei, se puleaga leia e oso ofaipe le akuila fekai, se puleaga leia e leaise ke matala ki lana masau,

⁵⁰ se puleaga leia e fakaii, ti e leaise fakaapaapa ki le matua sina, ti e leaise alofa ki fanau liliki.

⁵¹ E kai loa e ia le fua o lau kau ovi mo le fua o lou kele o kaku ki lou maumaui ; e leaise tuku atu loa e ia kiate koe se fulumeto, pe ko se vino foou, pe ko se lolo, pe ko se uviki pipi, pe ko se uviki ovi, pe ko se uviki koti, o kaku ki lana maumaui a koe.

⁵² E taui loa e ia a koe i kolo fuli ala e tuku atu loa kiate koe e le Eteleno, lou Atua. E lotou taui loa a koe o kaku ki le siga ki lalo o kaua makeke ala e ke mumuni ai i muli ti na ke fanaki ki ai.

⁵³ I loto malie o le i mo le fakaaloalofa leia e tuku loa e lou fili kiate koe, e ke kai loa a fua o lou manava, le tino o lou vosa mo lou taine, ala e soli atu loa kiate koe e le Eteleno, lou Atua.

⁵⁴ Ko le tagata, leia ia koutou na fakapotopoto mo agamalu, e tio fakaveli loa ki lona taina, mo lona avaga totonu, mo ona vosa ala koi nonofo mo ia.

⁵⁵ E tuania ia loa e ia le vaevae o le tino o lana fanau mo se tasi o latou, talie ko lana nea kai a ia e tasi. E leaise toe maua e ia se tasi ake nea kai i le temi lena o le tau, o tupu ko le lasi o le fakaaloalofa leia e tuku loa kiate koe e lou fili i kolo fuli ala e ke nofo ai loa.

⁵⁶ Ko le fafine, leia ia koutou na fakapotopoto mo agamalu, leia na leaise poto fua i le fakalave o lona vae ki le kele na kelekele, e tio fakaveli loa ki lona avaga totonu, mo lona tama, mo lona taine,

⁵⁷ mo lona ga toe foki leia nao fanaui ake fua, mo le valegafanau o le toe leia nao vilo ake fua iate ia. I le lasi o le mativa mo le pakupaku i le temi o le tau, e fanaki loa le fafine lena ki nea ana ke kai fakafufu loa e ia toka tasi, o tupu ko le veli ai o le fakaaloalofa leia e tuku loa e lou fili kiate koe i kolo fuli ala e ke nofo ai loa.

⁵⁸ Kapau e leaise ke tausi loa ti mo fai loa a folafola fuli o le lao leinei, ala kua tuu i le tosi leinei, ti kapau e leaise ke fakaapaapa loa ki le suafa fakakololia mo fakaii o le Eteleno, lou Atua,

⁵⁹ e tautea loa a koe e le Eteleno, a koe mo lou sakoga, ki ni malaia lalasi mo fualoa, ki ni masaki veveli mo fualoa.

⁶⁰ E kakau mai loa e ia kiate koe a masaki veveli fuli o Esipito, ala na ke lulu ai ; ti e lotou pipiki loa kiate koe.

⁶¹ E toe kakau mai loa e le Eteleno kiate koe a masaki kesekese fuli mo malaia kesekese fuli ala e leaise tuu i le tosi o le lao leinei, o kaku ki lou maumaui.

⁶² I le oki o lou toka api o tatau mo fetuu o le lagi, e kotou toe loa ko se ga toka teiki fua, o tupu na leaise ke fakalogo loa ki le leo o le Eteleno, lou Atua.

⁶³ O tatau mo le fiafia leia na maua e le Eteleno o fai kia koutou le nea malie ti mo liuliuga koutou, e toe tatau foki mo le fiafia leia e maua loa e le Eteleno o tamate koutou ti mo maumaui koutou. Ti e taaki loa e ia koutou mei le kele leia e ke ulu loa ki ai o maua tofiga.

⁶⁴ E veteki loa a koe e le Eteleno i puleaga fuli, mei le potu ki le potu o le malama nei. E ke tausi loa i ai ki ni atua kese ala na leaise ke iloa ti na leaise iloa e ou tamana : ala ko ni laakau mo ni fatu.

⁶⁵ I puleaga ana, e leaise ke fimalie loa ti e leaise ke maua loa se ganea leia ke malolo ai ou alofivae. Kae e tuku loa e le Eteleno kiate koe se loto lulu, mo ni mata gaegae, mo se loto mamae.

⁶⁶ E leaise ke iloa loa pe ke mauli pe ke mate : E ke i loa i le ao mo le pouli, ti e ke lotolotolua loa ki lou mauli.

⁶⁷ E ke pati loa i le usu : amusia ake ke afiafi ! ti e ke pati loa i le afiafi : amusia ake ke usu ! o tupu ko le i leia e ke logoi loa i lou loto mo le nea leia e tio loa ki ai ou mata.

⁶⁸ Ti e toe aumai loa a koe e le Eteleno i ni vaka ki Esipito, ti e ke toe fai ia loa le ala leia na kau pati atu kiate koe : ke aua na ke toe tio loa ki ai ! I lena, ko tagata mo fafine, e kotou fakatau loa koutou totonu ki okoutou fili ke popula, ti e leaise maua loa se tasi leia e fia totogi ia loa koutou.