Tetelonome 26 - Tosi Tapu

Uluaki fua o le kele

¹ Ka ke ulu loa ki le fenua leia e soli atu loa kiate koe e le Eteleno, lou Atua, ke ke maua tofiga, ti ka ke maua loa a ia ti mo ke nofo loa i ai,

² e ke too loa ni uluaki fua mei fua fuli ala e ke maua loa mei lou kele i le fenua leia e soli atu loa kiate koe e le Eteleno, lou Atua. E ke tanaki loa latou ki se kete ti e ke ano loa ki le ganea leia e filifili loa e le Eteleno, lou Atua, ke fakanofo ai lona suafa.

³ E ke ano loa ki le tagata faisakilifisio leia e gaoi i aso ana, ti e ke pati loa kiate ia : E kau fakasa loa i le aso nei ki le Eteleno, lou Atua, kua kau ulu ki le fenua leia na fakapapau e le Eteleno ki otatou tamana ke soli kia tatou.

⁴ E too loa e le tagata faisakilifisio le kete mei ou lima, ti e tuku loa e ia a ia ki mua o le aletale o le Eteleno, lou Atua.

⁵ Ti e ke toe masau loa o fakasa i mua o le Eteleno, lou Atua : ko loku tamana ko se tagata Alame leia na taka fenua ; na ifo loa a ia ki Esipito mo se ga kakai toka teiki, o nofo i ai. Kae na liliu loa a ia i ai ko se puleaga lasi, mo makeke, mo api.

⁶ Na fakavelivelii loa matou e le kau Esipito, Na lotou tautea loa matou, ti na lotou teki loa kia matou se gaoi popula mamafa.

⁷ Na motou kalaga loa ki le Eteleno, le Atua o omatou tamana. Na logo loa le Eteleno ki omatou leo ti na tio loa a ia ki lomatou fakavelivelii, mo lomatou pakia, mo lomatou fakaaloalofa.

⁸ Ti na fakamavae loa e ia matou mei Esipito, ki lona lima makeke mo lona lima falo, ki ni milakulo mo ni nea fakaofolele.

⁹ Na aumai loa e ia matou ki le ganea leinei, ti na soli mai loa e ia kia matou le fenua leinei, fenua leia e sali ai le sua manu mo le meli.

¹⁰ Koia i le aso nei e kau aumai ai kiate koe, Eteleno, a uluaki fua o le kele leia na ke soli mai kiate au ! E ke tuku loa a nea ana i mua o le Eteleno, lou Atua, ti e ke punou loa i mua o le Eteleno, lou Atua.

¹¹ Ti oki, ti ke fakafiafia loa mo le Levi, mo le matapule leia e nofo i loto malie o ou, ki nea malilie fuli ala na soli loa kiate koe mo lou famili e le Eteleno, lou Atua.

Vaega kau agafulu

¹² I fetuu tolu fuli, e soko ai loa le fetuu o le vaega kau agafulu. Ka oki loa lau too le vaega kau agafulu, leia ko le vaega kau agafulu o au nea fuli, e ke tuku loa a ia ki le Levi, mo le matapule, mo le fanau leia e sala tamana, mo le fafine leia e sala avaga. E lotou kai loa a ia ti e lotou makona loa i le ganea lena e ke nofo ai.

¹³ E ke pati loa i mua o le Eteleno, lou Atua : Kua kau sau i oku fale le nea leia na fakatapui ki le Eteleno, ti kua kau soli a ia ki le Levi, mo le matapule, mo le fanau leia e sala tamana, mo le fafine leia e sala avaga, o mulimuli ki au fakatotonu fuli ala na ke tuku mai kiate au ; na leaise kau maumaui loa se lao fua e tasi o au lao, ti na leaise galo iate au se lao fua e tasi.

¹⁴ Na leaise kau kai loa se potu o le vaega kau agafulu i le temi leia na kau nofo ai i le putu, na leaise kau too loa se nea i ai o fakaaoga ki se nea kelekele, ti na leaise kau soli loa i ai se nea o uiga mo se mate ; na kau fakalogo loa ki le leo o le Eteleno, loku Atua, ti na kau fai loa o mulimuli ki lao fuli ala na ke tuku mai kiate au.

¹⁵ Ke ke tio mei lou nofoaga maokioki, mei le atu lagi, ti ke ke tapuakii loa lou kakai ko Iselaele mo le kele leia na ke soli mai kia matou, o mulimuli ki lau fakapapau leia na ke fai ki omatou tamana, io, le fenua leia e sali ai le sua manu mo le meli.

¹⁶ I le aso nei, e fakatotonu loa e le Eteleno, lou Atua, kiate koe, ke ke fai loa a lekula mo lao ana ; ke ke tausi loa latou ti mo ke fai loa latou i lou mauli i lou loto katoa mo lou laumalie katoa.

¹⁷ I le aso nei, na ke maua loa mei le Eteleno le fakapapau leia ke nofo a ia ko lou Atua, o tupu ke ke saele loa i ona ala, ti mo ke tausi loa ana lao, mo ana folafola, mo ana lekula, ti mo ke fakalogo loa ki lona leo.

¹⁸ I le aso nei, na maua loa e le Eteleno meiate koe le fakapapau leia ke ke nofo loa ko lona kakai, leia e mauiga kese loa kiate ia, o fai ki lana pati kiate koe, ti mo ke tausi loa ana folafola fuli,

¹⁹ o tupu ke soli atu loa e ia kiate koe, i aluga o puleaga fuli ala na fakatupu e ia, le tuulaga uluaki i le kololia, mo le igoa, mo le mamalu, ti ke ke liliu loa ko se kakai maokioki ki le Eteleno, lou Atua, o mulimuli ki lana folafola.