Tetelonome 24 - Tosi Tapu

Lao o le mavete avaga

¹ Kapau na too loa e se tagata se fafine o avaga mo ia, ti soko loa kua puli le alofa o le tagata ki le fafine, talie na maua loa e le tagata i lona avaga se nea fakalumaluma : E fai loa e le tagata se tosi mavete o tuku ki lima o le fafine, ti e kakau loa e ia le fafine ke mavae i lona kaiga.

² E mavae loa a ia i le kaiga o le tagata, o ano loa, ti e feala loa ke toe liliu a ia ko le avaga a se tasi ake tagata.

³ Kapau e vesia loa le tagata fakamuli leinei kiate ia, ti e toe fai loa e ia se tosi mavete, o tuku loa ki lima o le fafine ti kakau loa e ia le fafine ke mavae i lona kaiga, pe mate loa le tagata fakamuli leinei na toe avaga mo le fafine,

⁴ e leaise feala loa ke toe too e le tagata uluaki, leia na kakau ia le fafine i mua, le fafine ke toe avaga mo ia, talie kua kelekele le fafine lena kiate ia : E fakalialia le nea lena ki mata o le Eteleno, ti ke aua na ke fakakelekele ia loa ki se agasala le fenua leia e soli atu loa kiate koe e le Eteleno, lou Atua.

Fakatotonu kesekese

⁵ Ka avaga foou loa se tagata, e leaise ano loa a ia o solia, ti e leaise tuku loa kiate ia se kavega ; e lauatea loa a ia ki le famili i le fetuu katoa, ti e fakafiafia loa e ia le fafine leia na avaga loa mo ia.

⁶ Ke aua na too loa ke fakamaoki ai le totogi a fatu e lua o le nea fakamaluu fulumeto, pe ko le fatu leia i aluga ; talie ko le too loa a ia o le mauli totonu ke fakamaoki ai le totogi.

⁷ Kapau e maua loa se tagata leia na kaia ia se tasi i ona fetaina, se tasi o fanau totonu a Iselaele, leia na fakaliliu e ia lona taina ko se tagata popula pe na fakatau ia a ia, e tautea loa le tagata lena ki le mate. E ke too loa i ai le veli i loto malie o Iselaele.

⁸ Ke ke tokaga ai ki le masaki ko le kilia, o tausi mo fai a nea fuli ala e ako atu loa kia koutou e le kau Levi faisakilifisio : ke kotou tausi loa ti mo kotou fai loa a fakatotonu fuli ala na kau tuku kia latou.

⁹ Ke ke manatui le nea leia na fai e le Eteleno, lou Atua, kia Miliamu i le lolotoga o le fanoga, i le oki o le mavae mei Esipito.

¹⁰ Kapau e ke soli ki lou oloi se maua, ke aua na ke ulu loa ki lona fale o too fakamakeke se nea ke fakamaoki ai le totogi o le maua.

¹¹ Ke ke nofo i fafo, ti ko leia e ke soli ki ai le maua e aumai ia loa kiate koe le fakamaoki o le totogi o le maua ki fafo.

¹² Kapau e mativa le tagata lena, ti e soli atu loa e ia kiate koe lona taupulupulu ke fakamaoki ai le ui o lona maua, ke aua na ke moe loa mo le nea lena ;

¹³ ke ke fakaliliu a ia kiate ia i le vilo o le laa, o tupu ke moe a ia i lona taupulupulu ti ke tapuaki a ia kiate koe : e liliu loa le nea lena kiate koe ko se gaoi malie i mua o le Eteleno, lou Atua.

¹⁴ Ke aua na ke pule fakaveliveli ki lau tagata gaoi, o tupu ko lona mativa mo lona fakaaloalofa, tatau pe ko lou taina pe ko se matapule leia e nofo mo koe i lou fenua.

¹⁵ Kae e ke soli loa kiate ia le totogi o lona aso gaoi i mua o le vilo o le laa ; talie e mativa a ia ti e aoga ai lona totogi kiate ia. Kapau e leaise ke fai loa le nea lena, e tagi loa a ia ki le Eteleno, ti e ke maua loa i ai se agasala.

¹⁶ E leaise tamate loa a tamana ke fetogi ai a fanau, pe ko fanau ke fetogi ai a tamana : E tamate loa le tagata taki toka tasi ki lana agasala.

¹⁷ Ke aua na ke fakasalai ia loa se fakamaau ke veli ki le matapule mo le fanau leia kua mate lona tamana, ti ke aua na ke too ia loa a kofu o se fafine leia kua mate lona avaga ke fakamaoki ai le totogi o se maua.

¹⁸ Ke ke manatui loa na ke nofo popula i Esipito, ti na saofaki a koe e le Eteleno, lou Atua ; koia e kau tuku atu ai kiate koe a fakatotonu ana ke ke fai.

Pelepeseto o le manava alofa

¹⁹ Ka ke fai loa le tanaki o le fulumeto o lou faisaga, ti ka galo loa iate koe se fuiga fulumeto i le faisaga, ke aua na ke toe liliu loa ki muli o too a ia : E ke tuku loa a ia ki le matapule, mo le fanau leia e sala tamana, mo le fafine leia e sala avaga, o tupu ke tapuaki kiate koe le Eteleno, lou Atua, i gaoi fuli o ou lima.

²⁰ Ka ke tau loa ou olive, ke aua na ke toe tau loa le nea leia e toe : E ke tuku loa a ia ki le matapule, mo le fanau leia e sala tamana, ti mo le fafine leia e sala avaga.

²¹ Ka ke tau loa a fua o lou vite, ke aua na ke toe tanaki loa le nea leia e toe : E ke tuku loa a ia ki le matapule, mo le fanau leia e sala tamana, mo le fafine leia e sala avaga.

²² Ke ke manatui loa na ke nofo popula i le fenua o Esipito : Koia e kau tuku atu ai kiate koe a fakatotonu ana ke ke fai.