Tetelonome 22 - Tosi Tapu

Ko ni iki a lao ki nea kesekese

¹ Kapau e ke tio loa e sese le pipi o lou taina, pe ko lana ovi, ke aua na ke tuku loa le manu ke ano, kae e ke faiga loa ke ke too a ia o ave ki lou taina.

² Kapau e leaise nofo lou taina o ofi kiate koe, ti kapau e leaise ke iloa a ia, e tonu ke ke ave loa le manu ki lou fale, ti e tonu ke nofo loa le manu i lou fale o kaku ki le temi leia e afa ai loa a ia kiate koe e lou taina.

³ E ke fai fenaaki loa ki lana asino, ti e ke fai fenaaki loa ki lona kofu, ti e ke fai fenaaki loa ki nea fuli o lou taina ala e puli loa ti ke maua loa. Ke aua na ke sola kese loa ia latou.

⁴ Kapau e ke tio loa e siga ki lalo i le ala le asino o lou taina, pe ko lana pipi tagata, ke aua na ke sola loa i lou taina, kae e ke tokoi loa kiate ia o fakatuu ki aluga lana manu.

⁵ Ke aua na tui loa e se fafine se teu tagata, ti ke aua na tui loa e se tagata se teu fafine : Talie ko leia e fai ia le nea lena e fakalialia a ia ki le Eteleno, lou Atua.

⁶ Kapau e ke maua loa i lou ala se ofaga o se manu lele, i aluga o se laakau pe i le kele, mo ni uviki pe mo ni fua, kae moe le tinana i aluga o uviki pe ko fua, ke aua na ke too ia loa le tinana mo uviki,

⁷ e ke tuku loa ke ano le tinana, kae e ke too loa a uviki, o tupu ke ke manuia mo ke mauli fualoa.

⁸ Kapau e ke fakatuu ia loa se fale foou, e ke fau loa se a leia ke takatakai ia le ato, o tupu ke aua na maligi se toto ki lou fale, mo ka e vilo loa se tasi.

⁹ Ke aua na ke muluki loa i lau faisaga vite ni fakaili kesekese, talie e leaise ke maua loa le fua katoa o le nea leia na muluki mo le fua katoa o lou vite.

¹⁰ Ke aua na ke laga loa lau faisaga ki se pipi mo se asino ala kua sai fakatasi ki se saliote.

¹¹ Ke aua na ke tui ia loa ni kofu tui ki ni filo kesekese, se fului ovi mo se lino ala kua fakatasi.

¹² E ke tui loa ni fuai vavai ki tapatapa e fa o le kie leia e ke pulupulu loa ki ai.

Lao o le avaga

¹³ Kapau na too loa e se tagata se fafine, ti na ano loa a ia kiate ia, ti na vesia loa a ia kiate ia ki muli,

¹⁴ kapau e tuku loa e ia ki le fafine ni nea fakalumaluma, ti mo ave loa e ia ni logo loi o uiga mo ia, o pati : Na kau too ia le fafine leinei, ti na kau ano kiate ia, ti na leaise kau maua iate ia a fakamailoga o lona taupoou.

¹⁵ Ti e too loa e le tamana mo le tinana o le fafine tupulaga a fakamailoga o lona nofo taine, ti e la fakasa loa latou i mua o le kau fakamatuatua o le kolo, i le matapa o le kolo.

¹⁶ Ti e pati loa le tamana o le fafine tupulaga ki le kau fakamatuatua : Na kau soli loku taine ke avaga mo le tagata leinei, kae e leaise alofa a ia kiate ia ;

¹⁷ e tuku e ia kiate ia ni nea fakalumaluma, o pati : na leaise kau maua ia a fakamailoga o le nofo taupoou o lou taine. Kae ko nei a fakamailoga o le nofo taupoou o loku taine. Ti e la folasi loa lona kofu i mua o le kau fakamatuatua o le kolo.

¹⁸ Ti e too loa e le kau fakamatuatua o le kolo lena le tagata o tautea ;

¹⁹ talie na tuku e ia se veli ki se taine o Iselaele, e lotou teki loa kiate ia se tua ko ni fa sikele paaga e kau lelau ke totogi ki le tamana o le fafine. Ti e nofo loa le fafine ko lona avaga, ti e leaise mafai loa ke kakau e ia le fafine ki lona kaiga, i le lolotoga o lona mauli katoa.

²⁰ Kae kapau e maoki le nea leia na pati ki ai le tagata, kapau na leaise maua a fakamailoga o le nofo taupoou i le fafine tupulaga,

²¹ ti e ave loa le fafine ki mua o le matapa o le fale o lona tama ; ti e tuki fatui loa a ia e le kakai o lona kolo. E mate loa a ia, talie na fai e ia se nea fakalumaluma i Iselaele, o momoe a ia mo se tagata i le fale o lona tamana. E ke too loa i ai le veli i loto malie o Iselaele.

²² Kapau e maua loa se tagata leia e momoe mo se fafine avaga, e la mamate toka lua loa, le tagata leia na momoe mo le fafine, mo le fafine foki. E ke too loa i ai le veli i loto malie o Iselaele.

²³ Kapau na feauaki loa se taine tupulaga taupoou ki se tagata, ti na felavei loa mo ia se tasi tagata kese i le kolo, ti na momoe loa mo ia,

²⁴ ke kotou ave loa laua toka lua ki le matapa o le kolo, ti ke kotou tuki fatui loa laua. E la mamate loa, le taine o tupu na leaise kalaga a ia i le kolo, mo le tagata o tupu na fakamakeke e ia le feauaki o lona oloi. E ke sau loa i ai le veli i loto malie o Iselaele.

²⁵ Kae kapau ko le ulu vao leia na felavei ai le tagata lena mo le taine tupulaga leia na feauaki mo se tagata, ti kapau na too le taine e le tagata o momoe mo ia, ko le tagata toka tasi leia na momoe mo le taine, e fakatuaa loa ki le mate.

²⁶ Ke aua na ke fai loa se nea ki le taine ; e leaise sala a ia i se agasala leia ke fakatuaa ai a ia ki le mate, talie e tatau le nea lena mo leia e osoi e se tagata lona oloi o tamate.

²⁷ Ko le taine feauaki, leia na felavei mo le tagata i le ulu vao, na feala ke kalaga kae na leaise tasi ke saofaki ia a ia.

²⁸ Kapau e felavei loa se tagata mo se taine taupoou leia e leikiaise feauaki mo se tagata, ti na fakamakeke loa e ia le taine o momoe mo ia, ti na maua loa laua,

²⁹ e soli loa e le tagata leia na momoe mo le taine ki le tamana o le taine ni fa sikele paaga e kau lima ; talie na maumaui e ia le matagafua o le taine, e avaga loa a ia mo le taine, ti e leaise feala loa ke kakau e ia le fafine ki lona kaiga i lona mauli katoa.

³⁰ Ke aua na too loa e se tagata le avaga o lona tamana, ti ke aua na sufegi loa e ia le kie kafu o lona tamana.