Tetelonome 21 - Tosi Tapu

Le afa o se tagata tukipo

¹ Kapau, i le fenua leia e soli atu loa kiate koe e le Eteleno, lou Atua, ke ke maua tofiga, e maua loa i se faisaga se tagata leia kua mate na tamate, kae e leaise iloa pe ko ai leia na tamate ia a ia,

² E ano loa ou tagata fakamatuatua mo ou tui fakamaau o fua a vasa mei le tagata mate ki kolo ala e takatakai ia a ia.

³ Ka maua loa le kolo leia e ofi ake ki le mate, e too loa e tagata fakamatuatua o le kolo lena se pipi fafine muli leia e leikiaise fakagaoi ti e leikiaise amo ia se laakau taki.

⁴ E fakaifo loa le pipi fafine muli ki se liua leia e sali tuumau ti e leaise tuu ai se faisaga i ona kauvai ; ti e lotou tamate loa le pipi fafine muli, i tafa o le liua.

⁵ E fakafeofi ake loa a tagata faisakilifisio, vosa o Levi ; talie ko latou ala na filifili e le Eteleno, lou Atua, ke tausi kiate ia, ti ke tuku ia le tapuaki i le suafa o le Eteleno, ti ke fakatokatoka ia a visi fuli mo lavea fuli.

⁶ Ti e fanofano loa a tagata fakamatuatua fuli o le kolo leia na ofi ki le mate, olatou lima i aluga o le pipi fafine muli leia na tamate.

⁷ Ti e lotou fakasa loa o feneeki : na leaise liligi e omatou lima le toto lena, ti na leaise tio omatou mata ki lona liligi.

⁸ Eteleno, fakamolemole ki lou kakai ko Iselaele, leia na ke totogi. Aua na ke tuku le toto mea ki lou kakai ko Iselaele, ti e leaise tuku loa kiate ia le toto lena.

⁹ Koia e tonu ai ke ke fakapuli mei loto malie o ou a toto mea fuli ala na liligi, o fai le nea leia e totonu ki mata o le Eteleno.

Ko fafine pilisoni i le tau

¹⁰ Ka ke ano loa o tau ki ou fili, ti kapau e tuku atu loa latou ki ou lima e le Eteleno, o ke fai loa ni kau pilisoni,

¹¹ e feala loa ke ke tio i le kau fafine pilisoni ki se fafine tupulaga, ti ke mamana loa ki ai, o ke fia avaga loa mo ia.

¹² Koia e ke ave loa a ia ki lou loto fale. E tele loa lona ulu ti e tuuti loa ona matininia,

¹³ E sau loa e ia ona teu pilisoni, ti e nofo loa a ia i lou loto fale, ti e tagi loa a ia ki lona tamana mo lona tinana i se masina katoa. I le oki o le nea lena, e ke ano loa kiate ia, ti e ke too loa a ia ma au, ti e liliu loa a ia ko lou avaga.

¹⁴ Kapau ki muli, e gato loa lona malie kiate koe, e ke tuku loa a ia ke ano ki le ganea leia e loto loa a ia ki ai, e leaise feala loa ke ke fakatau a ia ki se paaga, pe ke fai kiate ia ofaipe se fafine popula, talie kua ke fakamamae a ia.

Ko le vosa uluaki

¹⁵ Kapau e maua loa e se tagata ni avaga e lua, ti e alofa loa a ia ki se tasi fafine o lasi ake i leia ake fafine, ti kapau e maua loa e ia ni vosa, ti ko le uluaki ko le vosa a ia o le fafine leia e leaise alofa a ia ki ai,

¹⁶ e leaise feala loa, i le aso leia e vae ai loa e ia le tofiga ki ona vosa, ke soli loa e ia le pule o le uluaki ki le vosa o le fafine leia e alofa a ia ki ai, o fakamuamua loa a ia i le vosa o le fafine leia e leaise alofa a ia ki ai, kae ko le uluaki a ia.

¹⁷ Kae e fakamaoki loa e ia ko le uluaki ko le vosa o le fafine leia e leaise alofa a ia ki ai, ti e soli loa e ia kiate ia ni vaega e lua i ana nea fuli ala e maua e ia. Talie ko le vosa lena ko le uluaki fua a ia o lona makeke, ti ko ia leia e tonu ke maua ia loa le pule o le uluaki.

Ko le vosa patigataa

¹⁸ Kapau e maua loa e se tagata se vosa patigataa mo fakatutuu, leia e leaise fakalogo loa ki le leo o lona tamana mo lona tinana, ti kapau e la tautea loa a ia kae e leaise fakalogo loa a ia kia laua,

¹⁹ e too loa a ia e le tamana mo le tinana, o ave ki le kau fakamatuatua o lona kolo, i le matapa o le ganea leia e nofo ai a ia.

²⁰ E la fakasa loa ki le kau fakamatuatua o lona kolo : ko leinei loma vosa, leia e patigataa ti e fakatutuu, leia e leaise fakalogo mai kia maua, leia e fai nea fakavale ti mo inu kava.

²¹ Ti e tuki fatui loa a ia ke mate e tagata fuli o lona kolo. E ke sau loa i ai le veli mei loto malie o ou, o tupu ke logo Iselaele katoa ti ke i a ia.

Ko mate tautau

²² Kapau e tamate loa se tagata, leia na fai ia loa se agasala leia e tonu ke fakatuaa ki le mate, o ke tautau loa a ia ki se laakau,

²³ e leaise ke tuku loa le mate ke tau i le laakau i le pouli ki le ao. Kae e ke tanu loa a ia i le aso lena, talie ko leia e tau i le laakau ko se malaia a ia i mua o le Atua, ti e leaise ke fakakelekele loa le fenua leia e tuku atu loa kiate koe e le Eteleno, lou Atua, ke ke maua tofiga.