Tetelonome 2 - Tosi Tapu

Foli noa mo fakavisi i le toafa

¹ Na tou maliu loa, o ano ki le toafa, i le ala o le tai Kula, o fai ki le nea leia na pati mai kiate au le Eteleno. Na tou foli loa o fualoa ai i tafatafa o le mauga o Seili.

² Na pati mai loa le Eteleno kiate au :

³ Kua feauga lakotou foli i le mauga leinei. Ke kotou maliu ki le noleto.

⁴ Tuku le fakatotonu leinei ki le kakai : Ka kotou fakalaka loa i le fenua o Seili, leia e nofo ai okoutou fetaina, vosa o Esau. E lotou fakaapaapa loa kia koutou ; kae ke kotou tokaga.

⁵ Aua na kotou fai ia loa se nea kia latou, talie e leaise kau tuku atu loa kia koutou se nea fua e tasi i lolatou fenua, pe ko se ganea fua ke tuu ai ou taga vae. Talie kua kau soli le mauga o Seili ko le tofiga a ia o Esau.

⁶ E kotou totogi paaga loa kia latou le nea kai leia e kotou kai loa, mo le vai leia e kotou inu loa.

⁷ Talie na tapuaki le Eteleno, lou Atua, kiate koe i au gaoi fuli, ti na leoleo e ia a koe i le lolotoga o lou fanoga i le toafa lasi leinei. Na nofo le Eteleno, lou Atua, mo koe i fetuu e kau fa, ti na leaise puli fua se nea e tasi leia na aoga kiate koe.

⁸ Na leaise tou fakalaka loa i le fenua o Seili, leia e nonofo ai otatou fetaina, vosa o Esau. Na leai foki se tou fakalaka i Alapa, mo Elati, mo Etesoni-Kepele. Ti na tou maliu loa o too le ala leia e ano ki le toafa o Moape.

⁹ Na pati mai loa le Eteleno kiate au : Ke aua na ke fai ia loa se nea veli kia Moape, ti ke aua na ke taui loa a ia, talie e leaise kau soli loa kiate koe se nea fua e tasi i lona fenua. Talie, ko fanau o Lote ala kua kau soli ki ai le fenua o Ale.

¹⁰ I mua atu na nofoi le fenua o Ale e le kau Emimi : ko se kakai a ia na makeke, mo api, mo lalasi, ofaipe le kau Anake.

¹¹ Na pati a iki kia latou ko le kau Lefaimi, o tatau mo le kau Anake. Kae na fakaigoa latou e le kau Moape ko le kau Emimi.

¹² Na nofoi Seili i le temi mua e le kau Oli. Na kapu loa e vosa o Esau le kau Oli i lolatou fenua, ti na lotou tamate loa latou kae lotou nonofo loa i lolatou fenua. Na fai foki e fanau a Iselaele le nea lena i le fenua leia na soli e le Eteleno kia latou ko lolatou tofiga.

¹³ I le aso nei, ke kotou tutuu ki aluga, ti ke kotou fakalaka i le liua o Seleti. Ti na tou fakalaka loa i le liua o Seleti.

¹⁴ Ko le fualoa o le temi leia na tou saele ai mei Katesi-Palenea o kaku ki le fakalaka i le liua o Seleti ko fetuu e kau tolu tupu valu, o kaku ki le puli o le tautupu katoa o tagata tau, o mulimuli ki le fakapapau leia na fai e le Eteleno kia latou.

¹⁵ Na gaoi le lima o le Eteleno kia latou, o maumaui latou mei le kakai, o kaku ki lolatou pupuli.

¹⁶ I le oki o le mate o tagata tau fuli i loto malie o le kakai,

¹⁷ na pati mai loa le Eteleno kiate au, o pati :

¹⁸ E ke fakalaka loa i le aso nei i le koiga o Moape, i Ale,

¹⁹ ti e ke fakafeofi loa ki fanau a Amone. Ke aua na ke fai loa se nea veli kia latou, ti ke aua na ke taui loa latou ; talie e leaise kau tuku loa se nea fuai e tasi kiate koe i le fenua o fanau a Amone : ko fanau o Lote ala kua kau soli ki ai le fenua leinei ko lolatou tofiga.

²⁰ Na pati foki na kau le fenua lena ki le fenua o le kau Lefaimi : Talie i mua na nofo ai se kakai Lefaimi leia na fakaigoa e le kau Amone ko le kau Samisumi :

²¹ Ko se kakai a ia na makeke, mo api, mo lalasi, ofaipe le kau Anake. Na maumaui loa latou e le Eteleno i mua o le kau Amone, leia na kapu ia loa latou kae lotou nofo loa i lolatou fenua.

²² Ko lena le nea leia na fai e le Eteleno ki fanau a Esau, ala na nonofo i Seili, i le aso leia na maumaui ai e ia le kau Oli i olatou mua ; na lotou kapu loa le kau Oli, kae na lotou nonofo loa i lolatou fenua, o kaku mai ki le aso nei.

²³ Ko le kau Avi, ala na nonofo i kolo liliki o le fenua ko Kasa, na maumaui loa e le kau Kafetolimi, kakai na ifo meia Kafetoli, ala na nonofo loa i lolatou fenua.

²⁴ Kotou tutuu ki aluga, ti kotou ano, o fakalaka i le liua o Alenone. Tio, kua kau tuku atu ki ou lima a Sioni, sau o Eseponi, tagata Amole, mo lona fenua. Kamata le too o lona fenua, fai kiate ia le tau !

²⁵ I le aso nei e kau kamata fakamafola loa le i mo le fakaapaapa kiate koe i puleaga fuli o le lalo lagi. Ka lotou logo loa ki le masau kiate koe, ti e lotou lulu loa i le i mo le tuania i ou mua.

Tau o le puleaga o Sioni

²⁶ Na kau kakau loa mei le toafa o Ketemoti, ni tagata avelogo kia Sioni, sau o Eseponi, mo ni masau o le tokamalie. Na kau pati loa kiate ia :

²⁷ E kau fia fakalaka i lou fenua ; e kau mulimuli fai i le ala, e leaise kau maliu loa ki le fetuu atamai pe ko le fetuu sema.

²⁸ E kau totogi paaga loa kiate koe le nea kai leia e kau kai loa, mo le nea inu leia e kau inu loa ; fakataga mai fua ke motou fakalaka i lou fenua.

²⁹ Ofaipe le fakataga mai kiate au e fanau a Esau ala e nonofo i le fenua o Seili, mo le kau Moape ala e nonofo i le fenua o Ale, ke kau fakalaka i olatou fenua, ke ke toe fakataga mai foki kiate au ke kau fakalaka i lou fenua, o kaku ki laku fakalaka i le Solotane o ulu ki le fenua leia e soli mai kia matou e le Eteleno, lomatou Atua.

³⁰ Kae na leaise tali loa e Sioni, sau o Eseponi, ke motou fakalaka i lona fenua ; talie na fakafefeka loa e le Eteleno, lou Atua, lona ulu mo lona loto, o tupu ke tuku a ia ki lou lima, ofaipe lau tio ki ai i le aso nei.

³¹ Na pati mai loa le Eteleno kiate au : Tio, e kau tuku ki ou lima i le aso nei a Sioni mo lona fenua. Ke ke too i le aso nei lona fenua ko lou tofiga.

³² Na au loa Sioni mo lana solia, o taui tatou i Salasi.

³³ Na tuku mai loa latou e le Eteleno, lotatou Atua, ki otatou lima, ti na tou tamate loa a ia, mo ona vosa, mo lona kakai katoa.

³⁴ Na tou too loa i le temi lena ona kolo fuli, ti na tou tamate loa latou fuli, tagata, mo fafine, mo toe, o leaise sao fua se fa toka tasi.

³⁵ Kae na tou too ia loa ma tatou a manu mo koloa ala na tou maua i olatou kolo.

³⁶ Mei le kolo o Aloele i le liua ko Alenone, mo leia atu a kolo leia e tuu i le liua lena, o kaku ki le fenua o Kalaate, na leai fua se kolo e tasi na makeke loa ia tatou. Na tuku loa latou fuli e le Eteleno, lotatou Atua, ki otatou lima.

³⁷ Kae na leaise ke fakafeofi loa ki le fenua o fanau a Amone, ki kauvai fuli o le liua ko Sapoke, mo kolo o le mauga, mo ganea fuli ala na tapui e le Eteleno, lotatou Atua, ke ke taui.