Tetelonome 18 - Tosi Tapu

Tofiga o fanau a Levi

¹ E leaise maua loa e le kau Levi faisakilifisio, le faasiga katoa o levi, se vaega mo se tofiga mo Iselaele. E lotou mauli loa ki sakilifisio tutu e le afi ki le Eteleno, mo le tofiga o le Eteleno.

² E leaise lotou maua loa se tofiga i loto malie o olatou fetaina : ko le Eteleno ko lolatou tofiga a ia, o fai ki lana fakasa kia latou.

³ Ko nei loa a nea ala ke soli ki le kau tagata faisakilifisio e le kakai, e latou ala e momoli ia loa se sakilifisio, se pipi tagata pe ko se akeno : e soli loa ki le tagata faisakilifisio le alaga mua, mo kaugutu, mo le kete.

⁴ E soli loa kiate ia a uluaki fua o lau fulumeto, mo lau vino foou, mo lau lolo, mo fului manu o lau kau manu liliki ;

⁵ talie ko ia leia na filifili e le Eteleno, lou Atua, i faasiga fuli o Iselaele, ke fai ia le tausi i le suafa o le Eteleno, a ia mo ona vosa, o tuumau.

⁶ Ka mavae loa le Levi i se kolo o Iselaele leia e nofo ai, ke ano, o mulimuli ki lona loto katoa, ki le ganea leia e filifili loa e le Eteleno,

⁷ ti e fai loa e ia le tausi i le suafa o le Eteleno, lona Atua, ofaipe ona fetaina Levi fuli ala e tutuu i lena i mua o le Eteleno,

⁸ e maua loa e ia se vaega tatau mo la ake ki lana nea kai, ti e toe maua loa e ia le totogi o ona nea fakafamili.

E tapu a nea fakatemonio

⁹ Ka ke ulu loa ki le fenua leia e soli kiate koe e le Eteleno, lou Atua, aua na ke ako loa le fakatautau o nea fakalialia a puleaga ana.

¹⁰ Ke aua na maua iate koe se tasi leia e fakalaka ia lona vosa pe ko lona taine i le afi, se tasi leia e fai kikite, se tasi leia e fai nea fakaofolele loi, se tasi leia e fai nea fakatemonio,

¹¹ se tasi leia e fai tutuku, se tasi leia e afa ki laumalie veli ti mo fakasa ia le nea leia ka soko, se tasi leia e fai vesili ki le kau mate.

¹² Talie ko leia e fai ia a nea ana e fakalialia a ia ki le Eteleno ; ti e tupu ko nea ana e kapu loa e le Eteleno a puleaga ana i mua o Iselaele.

¹³ Ke ke agatonu katoa ki le Eteleno, lou Atua.

¹⁴ Talie ko puleaga ana ka ke kapu loa, e fakalogo kia latou ala e fai ia a nea fakaofolele loi mo nea fakatemonio ; kae kiate koe, e leaise fakataga a ia e le Eteleno, lou Atua.

Ko le polofeta lasi : Kilisito

¹⁵ E fakatuu ake loa e le Eteleno, lou Atua, i loto malie o ou, i ou fetaina, se polofeta o tatau mo au : ke kotou fakalogo loa kiate ia !

¹⁶ Ko le tali loa a ia ki le kole leia na ke fai ki le Eteleno, lou Atua, i Olepe, i le aso o le fakatasi, o ke pati ai : E leaise kau toe loto ke folafola totonu mai kiate au le Eteleno, loku Atua ! E leaise kau toe fia tio ki le afi kaka lena ! E leaise kau fia mate !

¹⁷ Na pati mai loa le Eteleno kiate au : E malie le nea leia kua lotou pati ki ai.

¹⁸ E kau fakatupu loa i ou fetaina se polofeta e tatau mo koe, e kau tuku loa aku folafola ki lona gutu, ti e fakasa loa e ia kia latou a nea fuli ala e kau fakatotonu loa kiate ia.

¹⁹ Kapau e leaise fakalogo loa se tasi ki folafola ala e fakasa loa e ia i loku suafa, e kau tautea loa a ia, e au totonu.

²⁰ Kae kapau e matasoka loa se polofeta o fakasa ia i loku suafa se folafola leia na leaise kau fakatotonu kiate ia ke fakasa, pe masau loa a ia i le suafa o ni atua kese, e tamate loa le polofeta lena.

²¹ E feala ke ke pati loa i lou loto : Pe feaki loa laku iloa le folafola leia na leaise fakasa loa e le Eteleno ?

²² Kapau e leaise fai loa ti e leaise soko loa le nea leia e masau loa ki ai le polofeta i le suafa o le Eteleno, ko se masau loa a ia na leaise fakasa loa e le Eteleno. Ko le matasoka lena na masau ai loa le polofeta : ke aua na ke i kiate ia.