Tetelonome 17 - Tosi Tapu

Tautea o le tausi ki taulaatua

¹ Ke aua na ke momoli loa i se sakilifisio ki le Eteleno, lou Atua, se pipi, pe ko se akeno, pe ko se koti, leia e maua ia se mele pe ko se masaki, talie e fakalialia loa le Eteleno, lou Atua, ki le manu lena.

² E feala loa i se aso ke maua i se kolo o kolo ala e soli atu loa kiate koe e le Eteleno, lou Atua, se tagata pe ko se fafine leia e fai ia loa se nea veli ki mata o le Eteleno, lou Atua, o maumaui loa lana fakapapau ;

³ talie na ano loa a ia, o tausi ki ni iki ake atua kese ti mo atolasio kia latou, pe ko le laa, pe ko le masina, pe ko le fuatau katoa o le lagi. E leaise ko le nea lena na kau fakatotonu.

⁴ Kapau e fakamatala loa a ia kiate koe, o ke logo totonu loa ki ai, e ke fai loa ni afaafa totonu. Pe maoki le nea lena, pe na soko maoki a ia, pe na fai maoki le nea fakalialia lena i Iselaele,

⁵ ti ke aumai loa ki ou matapa le tagata lena pe ko le fafine lena, leia e fai ia loa le nea veli a ia, ti ke tuki fatui loa a ia pe ke tautea loa a ia ki le mate.

⁶ E tamate loa leia e tonu ke mate i le fakamaoki a le toka lua pe ko le toka tolu ; e leaise tamate loa a ia i le fakamaoki a se fa toka tasi.

⁷ E uluaki siki loa kiate ia le lima o tagata fakamaoki o tamate a ia, ti o muli atu loa le lima o le kakai katoa. E ke too loa i ai le veli i loto malie o Iselaele.

E tonu ke fakalogo ki pule

⁸ Kapau e leaise mafai e se fono fakakolo ke fakamaaui ia se nea o uiga mo se tukipo, pe ko se lavea, pe ko se tasi ake a nea, e feala loa ke ke ano o ave a ia ki le ganea leia e filifili loa e le Eteleno, lou Atua.

⁹ E ke ano loa ki le kau Levi faisakilifisio mo le tui fakamaau leia e gaoi loa i le temi lena. E ke tuku loa kia latou lau nea, ti e lotou fakasa loa kiate koe le tonu leia ke tuku loa e le fakamaau.

¹⁰ E ke mulimuli loa ki le tonu leia e lotou fakasa loa kiate koe i le ganea leia e filifili loa e le Eteleno. E ke tokaga loa o fai a nea fuli ala e lotou ako atu loa kiate koe.

¹¹ E ke mulimuli loa ki le lao leia e lotou ako atu loa kiate koe mo le tonu leia e lotou tuku atu loa kiate koe. Ke aua na ke mavae loa ki le fetuu atamai pe ko le fetuu sema o le tonuaga leia e lotou fakasa atu loa kiate koe.

¹² Ko leia e matasoka loa, o leaise fakalogo ki le tagata faisakilifisio leia na fakanofo i le sagatualio ke tausi ki le Eteleno, lou Atua, pe ki le tui fakamaau, e tamate loa. E ke too loa i ai le veli i loto malie o Iselaele.

¹³ E logo loa ki ai le kakai katoa, ti e maua loa e ia le i, ti e leaise matasoka loa a ia.

Lekula o uiga mo le sau

¹⁴ Ka ke ulu loa ki le fenua leia e soli loa e le Eteleno, lou Atua, kiate koe, ke ke maua tofiga, ti ka ke nofo loa i ai ti mo ke pati loa : E kau loto ke fakanofo kiate au se sau, ofaipe puleaga fuli i oku tafatafa,

¹⁵ e ke fakanofo loa kiate koe se sau leia e filifili loa e le Eteleno, lou Atua. E ke filifili loa kiate koe se sau mei loto malie o ou fetaina. Ke aua na ke filifili loa ke sau kiate koe se tagata matapule, se tasi leia e leaise kau ki lou kakai.

¹⁶ Kae ke aua na maua loa e ia se kau osi lasi ; ti ke aua na toe fakaliliu loa e ia le kakai ki Esipito o totogi ni osi. Talie na pati le Eteleno kia koutou : Ke aua na kotou toe liliu loa i le ala lena.

¹⁷ Ke aua na maua loa e ia ni avaga mauke, o tupu ke aua na maliu loa lona loto mei le Eteleno. Ke aua na maua loa e ia se paaga lasi mo se aulo lasi.

¹⁸ Ka eke loa le sau ki lona ekeekeaga fakasau, ke tosi loa e ia kiate ia, i se tosi, a lao ala e too loa e ia mei lima o le kau Levi faisakilifisio.

¹⁹ E tonu loa ke nofo tuumau a ia mo le tosi lena, ti ke lau loa e ia a ia i aso fuli o lona mauli, o tupu ke ako e ia le fakaapaapa ki le Eteleno, lona Atua, ke tausi e ia a folafola fuli o le lao lena, ti ke fai e ia o mulimuli ki ona lekula fuli.

²⁰ E taupau loa e ia i ai lona loto, o tupu ke aua na fia malaga loa a ia ki aluga o ona fetaina, ti ke aua na fia mavae kese loa a ia i folafola a le Eteleno ki le fetuu atamai pe ki le fetuu sema, ti ke fakatologa loa e ia lona mauli i lona puleaga, o ona mo ona vosa, i loto malie o Iselaele.