Tetelonome 15 - Tosi Tapu

Ko le fetuu o le Sapato

¹ I fetuu fitu fuli, ke ke tausi loa le lao o le soloi o maua.

² Ti ko leinei loa le fai o le lao lena : Ka fakasa loa le fetuu o le soloi o maua ki le Eteleno, ko latou fuli ala na soli ia se maua paaga ki lona oloi e fakafiti loa ke toe ui ake kia latou le maua lena ; e leaise ke fakamakeke loa lou taina, pe ko lou oloi ofi, ke ui atu kiate koe lona maua.

³ E feala loa ke ke fakamakeke ki le matapule ke ui atu kiate koe lona maua ; kae e ke fakafiti loa ki lau nea leia koi nofo mo lou taina.

⁴ Koleia, e leaise maua loa se mativa iate koe, talie e fakaapele loa a koe e le Eteleno, lou Atua, ki nea malilie i le fenua leia e soli atu loa e ia ke ke maua tofiga,

⁵ koleia fua, ke ke fakalogo loa ki le leo o le Eteleno, lou Atua, o tausi ti mo fai ana folafola katoa ala e kau tuku kiate koe i le aso nei.

⁶ E tapuaki loa le Eteleno, lou Atua, kiate koe o fai ki lana pati atu kiate koe : E ke soli loa ni maua paaga ki ni puleaga mauke, ti e leaise ke too maua loa ; e ke pule loa ki ni puleaga mauke, kae e leaise pule loa se puleaga kiate koe.

⁷ Kapau e maua loa se mativa i ou fetaina, i se kolo o le fenua leia e soli loa e le Eteleno, lou Atua kiate koe, ke aua na ke tapono loa lou loto, o fakafiti kiate ia se maua leia e kole atu e ia kiate koe.

⁸ Kae e ke soli loa o lasi ake kiate ia le nea leia e aoga kiate ia.

⁹ Ke ke tokaga ai na ke maua loa i lou loto ni manatu fakalialia, o ke pati loa : kua ofi le fitu o fetuu, le fetuu o le soloi o maua ! Ke ke tokaga na ke maua loa se tio fakaveli ki lou taina leia e mativa, o leaise ke soli loa kiate ia se nea. E kalaga loa a ia ki le Eteleno o uiga mo koe, ti e ke amo loa i ai se agasala.

¹⁰ E ke fai loa se alofa kiate ia, ti e ke fai loa a ia i se loto malie ; talie e tapuaki loa le Eteleno, lou Atua kiate koe, o tupu ko le nea lena, i gaoi fuli mo nea fuli ala e fafa loa ki ai ou lima.

¹¹ E maua tuumau loa ni mativa i lou fenua ; koia leia e kau tuku atu ai kiate koe le lao leinei : e ke fakamavaa lasi loa lou lima ki lou taina, mo le fakaaloalofa, mo le mativa i lou fenua.

¹² Kapau e fakatau loa kiate koe se tasi i ou fetaina epeleo, tagata pe fafine, e fakasausau loa a ia kiate koe i fetuu e ono ; kae i le fitu o fetuu, e ke tuku loa a ia ke mavae lauatea mei lou fale.

¹³ Ti ka ke tuku loa a ia ke mavae lauatea mei lou fale, ke aua na ke kakau loa a ia ke ano mo ona lima ata.

¹⁴ Kae e ke soli loa kiate ia ni nea i nea fuli ala na tuku fakaalofa atu kiate koe e le Eteleno, lou Atua : ni ovi, mo ni koti, mo se fulumeto, mo se vino.

¹⁵ E ke manatui loa na ke popula i le fenua o Esipito, ti na fakalauatea loa a koe e le Eteleno, lou Atua. Koia e kau tuku atu ai kiate koe i le aso nei le lao leinei.

¹⁶ Kae kapau e pati atu loa kiate koe lau tagata fakasausau : e leaise kau fia mavae i lou fale, - talie e alofa a ia kiate koe mo lou famili, ti e mauli fimalie a ia i lou fale, -

¹⁷ ti e ke too loa se tui, ti ke puui loa lona taliga ki le matapa, ti e liliu loa a ia ko lau tagata fakasausau o lee gato. E ke toe fai fenaaki loa ki lau fafine fakasausau.

¹⁸ Ke aua na ke fakasemala loa i le kakau o lau tagata fakasausau ke mavae lauatea mei lou kaiga, talie na gaoi a ia kiate koe i fetuu e ono, ko le tua lua a ia o le totogi o le tagata gaoi totogi ; ti e tapuaki loa kiate koe le Eteleno, lou Atua, i nea fuli ala e ke fai loa.

Uluaki tupu o manu

¹⁹ E ke fakatapui loa ki le Eteleno, lou Atua, a manu tagata uluaki fuli ala e tupu loa i lau kau manu lalasi mo lau kau manu liliki. Ke aua na ke fakagaoi loa le pipi tagata uluaki, ti ke aua na ke koti loa a fulu o le ovi tagata uluaki.

²⁰ Kae e ke kai loa latou i fetuu fuli, e koe mo lou famili, i mua o le Eteleno, lou Atua, i le ganea leia e filifili loa e ia.

²¹ Kapau e maua loa e ia se mele, kapau e kito a ia pe kivi, kapau e maua e ia se lavea veli, ke aua na ke momoli loa a ia i se sakilifisio ki le Eteleno, lou Atua.

²² E ke kai loa a ia i ou matapa ; e kai loa ki ai leia e mea mo leia e kelekele, ofaipe le kai o le kaseli mo le tia.

²³ Koleia fua, ke aua na ke kai loa le toto o le manu ; kae e ke liligi loa a ia ki le kele, ofaipe le vai.