Tetelonome 14 - Tosi Tapu

Lao o manu mea mo kelekele

¹ Ko fanau koutou a le Eteleno, lokoutou Atua. Ke aua na kotou fai loa ni tatau ki okoutou tino, ti ke aua na kotou tele loa okoutou tumuaki, o tupu ko se mate.

² Talie ko se kakai maokioki a koe ki le Eteleno, lou Atua ; ti kua filifili a koe e le Eteleno, lou Atua, ke ke liliu ko lona kakai alofaina i kakai fuli i aluga o le malama nei.

³ Ke aua na ke kai loa se nea fakalialia.

⁴ Ko nei a manu ala ke kotou kai : le pipi, mo le akeno mo le koti ;

⁵ mo le tia, mo le kaseli, mo le tia tala lau lalasi ; mo le koti mauga, mo le samua, mo le koti vao, mo le atilope.

⁶ E feala loa ke ke kai a manu fuli ala maua ia ni taga vae paisi lua ti e kai lulua.

⁷ Kae ko nei a manu ala ke aua na kotou kai loa i manu ala e kai lulua ti e maua ia ni taga vae paisi lua : ko le kamelo, mo le lapino vao, mo le tamani, ala e kai lulua kae leaise maua ia ni vae paisi lua : e lotou kelekele loa kia koutou.

⁸ Ke aua na kotou kai loa le puaka, leia e maua ia ni vae paisi lua kae e leaise kai lulua, e tonu loa ke kelekele a ia kia koutou : e lotou kelekele loa kia koutou. Ke aua na kotou kai loa lona tino, ti ke aua na kotou fafa loa ki se puaka mate.

⁹ Ko nei a manu, i manu ala e mauli i le vai, e feala loa ke kotou kai : e kotou kai loa a manu fuli ala e maua ia ni kapoga mo ni unafi.

¹⁰ Kae ke aua na kotou kai loa se manu leia e leaise maua ia ni kapoga pe ko ni unafi : e lotou kelekele loa kia koutou.

¹¹ E feala loa ke kotou kai a manu lele fuli ala e mea.

¹² Kae ko nei a manu lele ala ke aua na kotou kai loa : ko le votu, mo le olefe, mo le akuila tai ;

¹³ mo le pusi, mo le fokoni, mo le milani, mo nea fuli ala e kau i le faasiga lena ;

¹⁴ mo le kolopo mo ona faasiga kesekese ;

¹⁵ mo le otulusi, mo le lulu, mo le muete, mo le epelevie mo nea fuli ala e kau ki lona faasiga ;

¹⁶ mo le peka, mo le suete, mo le sini ;

¹⁷ mo le pelikano, mo le kolomolani, mo le uku ;

¹⁸ mo le sikoni, mo le eloni, mo nea fuli ala e kau ki lona faasiga, mo le upe, mo le pekapeka.

¹⁹ Ke kelekele loa kia koutou a ga manu liliki fuli ala e totolo ti e lele : ke aua na kotou kai loa latou.

²⁰ Ke kotou kai loa a manu lele fuli ala e mea.

²¹ Ke aua na kotou kai loa se manu leia na mate masaki : ke ke soli loa a ia ki le matapule leia e nofo loa mo koe, ke kai e ia, pe ke fakatau loa a ia ki se matapule ; talie ko koe ko se kakai maokioki ki le Eteleno, lou Atua. Ke aua na ke saka loa se uviki manu i le sua manu o lona tinana.

Ko vaega kau agafulu

²² I fetuu fuli e ke too loa le vaega kau agafulu o le nea leia e fakatupu loa e lau pulapula, mo le fua o lau faisaga.

²³ Ti e ke kai loa i mua o le Eteleno, lou Atua, i le ganea leia e filifili loa e ia ke fakasa ai lona suafa, le vaega kau agafulu o lau fulumeto, mo lau vino, mo lau lolo, mo manu uluaki o lau kau pipi, mo lau kau ovi, mo lau kau koti, o tupu ke ke ako le fakaapaapa tuumau ki le Eteleno, lou Atua.

²⁴ E feala loa mo ka tapuakii loa a koe e le Eteleno, lou Atua, ke mamao lasi ai le ala leia ke ke amo ai le vaega kau agafulu o kaku ki le ganea leia e filifili loa e le Eteleno ke fakasa ai lona suafa.

²⁵ Koia, ke ke fetogi loa lou vaega kau agafulu ki se paaga, ti ke kukumi loa le paaga lena i lou lima, ti ke ano loa ki le ganea leia e filifili loa e le Eteleno, lou Atua.

²⁶ I ai, ke ke toe fetogi loa lau paaga ki nea fuli ala e ke loto ki ai, ki manu lalasi mo manu liliki, ki vino mo kava, ki nea fuli ala e fiafia ki ai lou loto, ti ke kai loa latou i mua o le Eteleno, lou Atua, ti mo ke fakafiafia loa, a koe mo lou famili.

²⁷ Ke aua na ke tiaki loa le Levi leia e nofo loa i ou matapa, talie e leaise maua e ia se vaega mo se tofiga mo koe.

²⁸ I le oki o fetuu e tolu, ke ke too loa le vaega kau agafulu o fua fuli o lau gaoi i le fetuu lena, ti ke tanaki loa latou i le kolo leia e ke nofo ai loa.

²⁹ Ti e au loa le Levi, leia e leaise maua ia se vaega mo se tofiga mo koe, mo le matapule, mo le fanau leia kua mate lona tamana, mo le fafine leia kua mate lona avaga, ala e nonofo loa i ou matapa, ti e lotou kai loa ti e lotou makokona loa, o tupu ke tapuaki loa kiate koe le Eteleno, lou Atua, i gaoi fuli ala e fai loa e ou lima.