Tetelonome 13 - Tosi Tapu

Tautea o polofeta loi

¹ Kapau e malaga ake loa iate koe se polofeta pe ko se tagata fai kikite leia e fakasa ia kiate koe se fakamailoga pe ko se nea fakaofolele,

² ti kapau e soko loa le fakamailoga lena mo le nea fakaofolele lena o mulimuli ki le nea leia na fakasa e ia kiate koe, o pati : tou ano i muli o ni iki atua kese, ko ni atua ala e leaise ke iloa, ti tou tausi latou,

³ ke aua na ke fakalogo loa ki masau a le polofeta lena pe ko le tagata fai kikite lena, talie ko le Eteleno, lokoutou Atua, lena e asiasii ia koutou ke iloa pe kotou alofa ki le Eteleno, lokoutou Atua, i lokoutou loto katoa mo lokoutou laumalie katoa.

⁴ Ke kotou mulimuli loa i le Eteleno, lokoutou Atua, ti ke kotou i loa kiate ia ; ke kotou tausi loa ana folafola, ke kotou fakalogo loa ki lona leo, ke kotou tausi loa kiate ia, ti ke kotou pipiki loa kiate ia.

⁵ Ke tautea loa ki le mate le polofeta lena pe ko le tagata fai kikite lena, talie na masau a ia ke fakafesagai ki le Eteleno, lokoutou Atua, leia na fakamavae ia a koe mei le fenua o Esipito, ti na saofaki ia koutou mei le fale o le popula, ti na loto a ia ke fakamaliu a koe mei le ala leia na fakatotonu e le Eteleno, lou Atua, ke ke saele ai. E ke too loa i ai le veli mei loto malie o lou kakai.

⁶ Kapau e fakasekeseke fakafufu loa kiate koe lou taina, le vosa o lou tinana, pe ko lou vosa, pe ko lou taine, pe ko lau avaga totonu, pe ko lou soa leia e ke alofa ki ai ofaipe koe totonu, o pati atu : Ke ta ano o tausi ki ni iki atua kese ! ko ni atua ala e leaise ke iloa ti na leaise iloa foki e ou tamana ;

⁷ kae ko ni atua o puleaga ala e takatakai ia koutou, pe ofi pe mamao, pe mei le potupotu o le malama nei ki le potupotu o le malama nei,

⁸ ke aua ai na ke tali loa ti mo ke fakalogo loa ki ni masau fenaaki, ti ke aua na maua loa e lou mata se alofa ki le tagata lena, ti ke aua na ke fakamauli loa a ia pe ke ufiufi loa a ia.

⁹ Kae ke ke tamate loa a ia : e uluaki siki loa lou lima, o tamate a ia, ti o siki loa le lima o le kakai katoa ;

¹⁰ ke ke tuki fatui loa a ia ke mate, talie na faiga a ia ke ke mavae mei le Eteleno, lou Atua, leia na fakamavae ia a koe mei le fenua o Esipito, mei le fale o le popula.

¹¹ E fenaaki loa, o tupu ke logo ti ke i a Iselaele katoa, ti ke aua na toe fai loa se agaveli fenaaki iate koe.

Tautea o kolo e tausi ki taulaatua

¹² Kapau e ke logo loa i se aso, o uiga mo se kolo i kolo ala na soli atu kiate koe e le Eteleno, lou Atua, ke ke nofo ai, e pati :

¹³ Na i ai se kau tagata noa leia na mavae meiate koe ti na fakasalai ia le kakai o le kolo lena o pati : tou ano, o tausi ki ni atua kese, ki ni atua ala e leaise kotou iloa,

¹⁴ e ke fai loa ni afaafa totonu, o ke sivisivi loa ti mo ke vesivesili loa. Pe maoki le nea lena, pe na soko maoki a ia, pe na fai maoki le nea fakalialia lena i loto malie o ou ?

¹⁵ Ti kapau e ke maua loa kua fai maoki le nea lena i loto malie o ou, ke ke tamate loa ki le seleta le kakai katoa o le kolo lena mo manu fuli, ti ke maumaui loa le kolo mo nea fuli ala e maua i ai.

¹⁶ Ke ke tanaki loa le koloa katoa ki loto malie o le kolo, ti ke tutu katoa loa i le afi le kolo mo ona koloa fuli, i mua o le Eteleno, lou Atua : e tuu loa a ia ko se tuuga nea maumau, e leaise toe fakatuu loa a ia i se aso.

¹⁷ Ke aua na ke too ia loa se nea i nea fuli ala kua tapui kiate koe, o tupu ke fimalie le sausau o le Eteleno, ti ke fakasa loa e ia lona manava alofa mo lona kalasia kiate koe, o fakaliliu loa a koe o api, o fai ki lana fakapapau ki ou tamana,

¹⁸ mo kapau e ke fakalogo ki le leo o le Eteleno, lou Atua, o tausi ana folafola fuli ala e kau tuku atu kiate koe i le aso nei, ti mo fai le nea leia e malie ki mata o le Eteleno, lou Atua.