Tetelonome 12 - Tosi Tapu

Fakatotonu ke tausi ki le Eteleno i le ganea leia na filifili e ia

¹ Ko nei a lekula mo lao ala e kotou tausi loa ti mo fai loa i le fenua leia e soli kia koutou e le Eteleno, le Atua o okoutou tamana, ke kotou maua tofiga.

² Ke kotou maumaui loa a ganea tapu fuli ala e tausi ai ki olatou atua a puleaga ala ka kotou kapu loa, i tumutumu o mauga lalasi mo mauga liliki, mo lalo o laakau sesega fuli.

³ Ke kotou soloi loa olatou aletale, ti ke kotou fatifatii loa olatou pou tapu, ti ke kotou tutu loa olatou vao tapu, ti ke kotou maumaui loa a fakatata o olatou atua, ti ke kotou fakapuli loa i ganea ana a nea fuli ala e fakamanatu ai olatou atua.

⁴ Ke aua na kotou fai felaaki loa ki le Eteleno, lokoutou Atua, ke aua na kotou fakatautau loa a puleaga ana.

⁵ Kae ke kotou afa loa a ia i lona nofoaga, ti ke kotou ano loa ki le ganea leia e filifili loa e le Eteleno, lokoutou Atua, i okoutou faasiga fuli, ke nofo ai lona suafa.

⁶ Ko lena loa le ganea leia e tonu ke kotou momoli ai loa akoutou failaulau, mo akoutou sakilifisio, mo akoutou vaega kau agafulu, mo akoutou moliga alofa, mo akoutou moliga ki ni fakapapau, mo manu uluaki o akoutou kau manu lalasi mo akoutou kau manu liliki.

⁷ Ko lena loa le ganea leia e tonu ke kotou kai ai loa i mua o le Eteleno, lokoutou Atua, ti ke kotou fakafiafia ai loa, koutou mo okoutou famili, o tupu ko nea fuli ala ka fai loa e okoutou lima ti ka tapuakii loa e le Eteleno, lokoutou Atua.

⁸ Ti ke aua na kotou toe fai loa pe latatou fai i leinei i le aso nei, leia e tasi fai e le tagata le nea leia e malie kiate ia,

⁹ talie e leikiaise kotou kaku ki le fenua o le malolo leia e soli kia koutou e le Eteleno, lokoutou Atua.

¹⁰ Kae e kotou fakalaka loa i le Solotane, ti e kotou nonofo loa i le fenua o le tofiga leia e soli atu loa kia koutou e le Eteleno, lokoutou Atua ; e tuku atu loa e ia le malolo kia koutou, i le oki o lana saofaki koutou mei okoutou fili fuli ala e takatakai ia koutou, ti e fakanofo loa e ia koutou i le fimalie.

¹¹ Ti e ia loa se ganea leia e filifili loa e le Eteleno, lokoutou Atua, ke fakanofo ai lona suafa. Ko lena loa le ganea leia e tonu ke kotou ave ki ai a nea fuli ala na kau fakatotonu kia koutou, akoutou failaulau, mo akoutou sakilifisio, mo vaega kau agafulu, mo uluaki fua, mo akoutou moliga fuli ala kua kotou fakapapau ke fai ki le Eteleno ke fakasoko ai akoutou fakapapau.

¹² Ko lena loa le ganea leia e kotou fakafiafia ai loa i mua o le Eteleno, lokoutou Atua, koutou, mo akoutou fanau, mo akoutou tagata fakasausau, mo akoutou fafine fakasausau, mo le kau Levi leia e nonofo i okoutou kolo, talie e leaise lotou maua se tofiga i loto malie o koutou.

¹³ Ke ke tokaga ai na ke momoli loa au failaulau i ganea tapu fuli ala e ke tio loa ki ai ;

¹⁴ kae ke ke momoli loa latou i le ganea e tasi leia e filifili loa e le Eteleno, i se tasi o okoutou faasiga, ti ko lena le ganea leia e tonu ke fai ai loa a nea fuli ala e kau fakatotonu atu kiate koe.

¹⁵ Kae logo ai, ka ke loto loa ki ai, e feala loa ke ke tamate se manu ti mo kai se kanoi manu i ou matapa fuli, o mulimuli ki tapuakina fuli ala e tuku atu loa kiate koe e le Eteleno lou Atua ; e feala loa ke kai ki ai leia e kelekele mo leia e mea, ofaipe le kai o se kaseli mo se tia.

¹⁶ Koleia fua, ke aua na kotou kai loa le toto. Kae ke kotou liligi a ia ki le kele ofaipe le vai.

¹⁷ E leaise feala loa ke ke kai i ou matapa le vaega kau agafulu o lau fulumeto, mo lau vino foou, mo lau lolo, mo manu uluaki o lau kau manu lalasi mo lau kau manu liliki, mo se moliga ki se fakapapau, mo au moliga alofa, mo au uluaki fua.

¹⁸ Kae e kai loa latou i mua o le Eteleno, lou Atua, i le ganea leia e filifili loa e le Eteleno, lou Atua, e koe, mo lou vosa, mo lou taine, mo lau tagata fakasausau, mo lau fafine fakasausau, mo le Levi leia e nofo loa i ou matapa ; ti e ke fakafiafia loa i mua o le Eteleno, lou Atua, i nea malilie fuli ala e ke maua loa.

¹⁹ Ke ke tokaga ai na ke galoi loa le Levi i se aso, i le temi katoa leia e ke mauli ai loa i lou fenua.

²⁰ Ka fakalasi loa e le Eteleno, lou Atua, ou koiga, o mulimuli ki lana fakapapau kiate koe, ti ke pati loa o tupu ko lou fia kai ki se kanoi manu : e kau fia kai loa ki se kanoi manu ! e feala loa ke ke kai a ia, o fakalogo ki lou loto.

²¹ Kapau e mamao meiate koe le ganea leia e filifili loa e le Eteleno, lou Atua, ke fakanofo ai lona suafa, e feala loa ke ke tamate se manu lasi pe ko se manu ikiiki, o fai ki le nea leia kua kau fakatotonu atu kiate koe, ti e feala loa ke ke kai a ia o fai ki lou loto.

²² E ke kai loa a ia ofaipe le kai o le kaseli mo le tia. E feala loa ke kai a ia e leia e kelekele mo leia e mea.

²³ Koleia fua, ke ke tokaga ai na kai loa le toto, talie ko le toto ko le mauli a ia : ti e leaise ke kai fakatasi loa le mauli mo le kanofi.

²⁴ Ke aua na ke kai loa a ia : e ke liligi loa a ia ki le kele ofaipe le vai.

²⁵ Ke aua na ke kai loa a ia, o tupu ke ke manuia, a koe mo ou fanau ki muli, i le fai o le nea leia e malie ki mata o le Eteleno.

²⁶ Kae ke ke ave loa ki le ganea leia e filifili loa e le Eteleno a nea ala e ke loto loa ke fakatapui ki le Eteleno mo moliga ala e ke fai loa ke fakasoko ai se fakapapau.

²⁷ Ke ke momoli loa au failaulau, le kanofi mo le toto, i aluga o le aletale o le Eteleno, lou Atua ; i la ake au sakilifisio, e liligi loa le toto i aluga o le aletale o le Eteleno, lou Atua, ti e ke kai loa le kanofi.

²⁸ Ke ke fakalogo mo ke tausi a nea fuli ana e kau fakatotonu atu kiate koe, o tupu ke manuia o lee gato, a koe mo au fanau ki muli, i le fai o le nea leia e malie mo totonu ki mata o le Eteleno, lou Atua.

²⁹ Ka motusi loa e le Eteleno a puleaga ala e ke kapu loa i ou mua, ti ka ke kapu loa latou ti mo ke nofo loa i lolatou fenua,

³⁰ ke ke tokaga ai na ke vilo loa ki le masele o faifaitaki kia latou, i le oki o lau maumaui latou. Ke ke tokaga ai na ke fia ilo loa ki olatou atua, o ke pati loa : E feaki le atolasio o puleaga anei ki olatou atua ? Ko au foki, e kau fia fakatatau kia latou.

³¹ Ke aua na ke fai fenaaki ki le Eteleno, lou Atua ; talie na lotou tausi ki olatou atua o fai a nea fakalialia fuli ala e vesia ki ai le Eteleno, ti na lotou tutu foki i le afi ki olatou atua, olatou vosa mo olatou taineliki.

³² Ke kotou tausi ti mo fai a nea fuli ala e kau fakatotonu atu kia koutou. Ke aua na kotou fakalasi se nea ki ai, ti ke aua na kotou fakaikiiki se nea i ai.