Tetelonome 11 - Tosi Tapu

Fakapapau mo malaia

¹ Ke ke alofa ki le Eteleno, lou Atua, ke ke tausi tuumau ana lao, mo ana lekula, mo ana folafola.

² Ke kotou fakamaoki i le aso nei, talie e leaise kau masau nei ki okoutou vosa ala na leaise iloa ia ti na leaise tio ki nea fuli ala na fai e le Eteleno kia koutou, kae ko koutou totonu ala na iloa ia ti na tio mata ki le mafimafi o le Eteleno, lokoutou Atua, mo lona lasi, mo lona lima makeke, mo lona lima falo.

³ Na fakasa e ia kia koutou ana milakulo mo ana gaoi : Na kotou tio ki le nea leia na fai e ia i loto malie o Esipito, kia Falaone, sau o Esipito, mo lona fenua katoa.

⁴ Na kotou tio ki le nea leia na fai e ia ki le solia o Esipito, ki ona osi mo ona saliote, ala na tanu e ia ki le vai o le tai Kula, i le temi leia na lotou tuli ai koutou. Na maumaui latou e le Eteleno o talu oki.

⁵ Na kotou tio ki le nea leia na fai e ia kia koutou i le toafa ke kotou kaku mai ai ki le ganea leinei.

⁶ Na kotou tio ki le nea leia na fai e ia kia Tatane mo Apilame, vosa o Eliape, vosa o Lupeni : Na fakamavaa e ia le gutu o le kele leia na folo ia loa laua, mo ola famili, mo ola falela, mo latou fuli ala na kau kia laua.

⁷ Io, na tio okoutou mata ki gaoi lalasi fuli ala na fai e le Eteleno.

⁸ Koia, ke kotou fai loa a folafola fuli ala e kau tuku atu kia koutou i le aso nei, o tupu ke kotou maua le makeke leia e aoga ki le too o le fenua leia e kotou ulu loa ki ai,

⁹ ti ke kotou mauli fualoa loa i le fenua lena na fakapapau e le Eteleno ke soli ki okoutou tamana mo lolatou sakoga, fenua leia e sali ai le sua manu mo le meli.

¹⁰ Talie ko le fenua leia ka ke ulu loa ki ai o maua tofiga, e leaise tatau mo le fenua o Esipito, leia na ke mavae mei ai. I Esipito, ka oki le to o pulapula, ti e tonu ke fakasasali se vai ki faisaga ofaipe se fakavai o se oloto.

¹¹ Kae ko le fenua leia ka ke ulu loa o maua tofiga, ko se fenua o mauga mo vaivailiua, ti e inu e ia le vai o ua o le lagi ;

¹² ko se fenua leia e tokaga ki ai le Eteleno, lou Atua, ti e tuku tuumau ki ai a mata o le Eteleno, lou Atua, mei le kamataaga o le fetuu o kaku ki le oki o le fetuu.

¹³ Kapau e kotou fakalogo ki aku folafola ala e kau tuku kia koutou i le aso nei, kapau e kotou alofa ti mo kotou tausi le Eteleno, lokoutou Atua, i lokoutou loto katoa mo lokoutou laumalie katoa,

¹⁴ ti e kau tuku loa ki lokoutou fenua le ua i lona temi, i le temi mafana mo le temi mokomoko, o tupu ke kotou maua ni fuata malilie o le fulumeto, mo le vino foou, mo le lolo.

¹⁵ E kau fakasomo ia loa se vao i lou faisaga ki lau kau manu. E ke kai loa ti e ke makona loa.

¹⁶ Koia, ke kotou tokaga ai, na kakaai loa okoutou loto, o kotou maliu loa o tausi ki ni atua kese ti mo punou loa kia latou.

¹⁷ E tupu loa i ai le sausau o le Eteleno kia koutou ; e tapono loa e ia le lagi, ti e leaise toe to loa se ua ; e leaise toe soli loa e le kele ona fua, ti e kotou mamate vave loa i le fenua malie leia e soli atu loa kia koutou e le Eteleno.

¹⁸ Ke kotou tuku ki okoutou loto mo okoutou laumalie a folafola anei e kau fakasa atu kia koutou. Ke kotou sai loa latou ofaipe se fakamailoga i okoutou lima, ti e lotou fai loa pe ni tekiteki i lou lae.

¹⁹ Ke kotou ako loa latou ki akoutou fanau, ti ke kotou masaui loa latou mo ka ke nofo loa i lou fale, mo ka ke moe loa ti mo ka ke ala ake loa i lau moe.

²⁰ Ke ke tosi loa latou i pou o lou fale mo ou matapa.

²¹ Ti e lasi loa okoutou aso mo aso o okoutou fanau, ofaipe le lasi loa o aso o le lagi i aluga o le kele, i le fenua leia na fakapapau e le Eteleno ki okoutou tamana ke soli kia latou.

²² Talie kapau e kotou tausi loa a folafola fuli anei e kau tuku atu kia koutou, ti kapau e kotou alofa loa ki le Eteleno, lokoutou Atua, ti kapau e kotou saele loa i ona ala fuli, ti kapau e kotou pipiki loa kiate ia toka tasi,

²³ ti e kapu loa e le Eteleno i okoutou mua a puleaga fuli ana, ti e kotou pule loa ki ni puleaga ala e lalasi ake mo makeke ake ia koutou.

²⁴ E kotou maua loa ganea fuli ala e takafi loa e le taga vae o lokoutou vae : e kamata atu loa lokoutou koiga i le toafa o kaku ki Lipane, ti mo le vaitafe ko le Eufalate o kaku ki le tai uesite.

²⁵ E leaise toe tuu loa se toka tasi i ou mua. Ko le Eteleno, lokoutou Atua, e fakamafola ia loa, o mulimuli ki lana pati, le i mo le fakaapaapa kiate koe i le fenua katoa leia e kotou saele loa i ai.

²⁶ Ke ke tio, e kau tuku i le aso nei ki ou mua le tapuakina mo le malaia :

²⁷ le tapuakina, mo kapau e kotou fakalogo malie loa ki folafola a le Eteleno, lokoutou Atua, ala e kau soli kia koutou i le aso nei ;

²⁸ le malaia, mo kapau e leaise kotou fakalogo loa ki folafola a le Eteleno, lokoutou Atua, ti mo kapau e kotou tiaki loa le ala e kau fakatotonu atu i le aso nei, kae kotou pipiki loa ki ni iki ake atua kese e leaise kotou iloa.

²⁹ I le aso leia e fakaulu ai loa a koe e le Eteleno, lou Atua, ki le fenua leia ka ke ulu loa ki ai o maua tofiga, ke ke tuku loa le tapuaki ki le mauga ko Kalisimi, mo le malaia ki le mauga ko Epale.

³⁰ Ko mauga ana e tuu i leia atu kauvai o le Solotane, i leia atu fetuu o le ala uesite, i le fenua o le kau Kanaane ala e nonofo i le vaivailiua o le Solotane, i mua o Kilikale, o ofi ki le sene o Mole.

³¹ Talie kua vave fua lakotou fakalaka i le Solotane, o ano o too le fenua leia e soli kia koutou e le Eteleno, lokoutou Atua. Ke kotou too a ia ti ke kotou maua tofiga a ia.

³² Ke kotou tausi ti ke kotou fai a lao mo folafola fuli ala e kau soli kia koutou i le aso nei.