Tetelonome 10 - Tosi Tapu

Ko fatu foou o le lao

¹ I le temi a ia, na pati mai loa le Eteleno kiate au : Ke ke ta ni laui fatu e lua o tatau mo fatu uluaki, ti ke pale mai loa kiate au i aluga o le mauga ; ti ke toe fai loa mo se pusa papa, le aleka.

² E kau tosi loa i laui fatu ana a folafola ala na tosi i laui fatu uluaki ala na ke maumaui, ti ke fafao loa laua ki le aleka.

³ Na kau fai loa se aleka papa ki le akasia, ti na kau ta foki ni laui fatu e lua o tatau mo laui fatu uluaki, ti na kau pale loa ki le mauga mo fatu e lua ala na too i loku lima.

⁴ Na tosi loa e le Eteleno ki laui fatu le nea leia na tosi i laui fatu uluaki, a folafola e kau agafulu ala na fakasa e ia kia koutou i le mauga, mei loto malie o le afi, i le aso o le fakatasi. Ti na soli mai loa laua e le Eteleno kiate au.

⁵ Na kau toe maliu loa o ifo mei le mauga, ti na kau fafao loa a fatu ki le aleka leia na kau aga o fau. Na la tuku loa i ai, o mulimuli ki le nea leia na fakatotonu mai kiate au e le Eteleno.

⁶ Na mavae loa fanau a Iselaele i Peeloti-Pene-Saakani ki Mosela. Ko le ganea lena na mate ai loa Alone, ti na tanu ai loa a ia. Na fetogi loa a ia e lona vosa ko Eleasale i le gaoi fakapelepitelo.

⁷ Na lotou mavae loa i lena ki Kutikota ; mei Kutikota ki Sotipata, fenua leia e lasi ona liua.

⁸ I le temi lena, na vaei kese loa e le Eteleno le faasiga o levi, ti na fakatotonu loa e ia kiate ia ke amo le aleka o le sai a le Eteleno, ke tuu i mua o le Eteleno o tausi a ia, ti mo tapuaki ki le kakai i lona suafa : leia na fai loa e ia o kaku mai ki le aso nei.

⁹ Koia leia e leaise maua loa e Levi sona vaega pe ko sona tofiga mo ona fetaina : ko lona tofiga ko le Eteleno, o mulimuli ki le pati a le Eteleno, lona Atua kiate ia.

¹⁰ Na kau nofo i le mauga ofaipe mua, i aso e kau fa mo po e kau fa. I le faiaga foki lena, na logo le Eteleno ki laku kole ti na fakafiti loa a ia ke maumaui koutou.

¹¹ Na pati mai loa le Eteleno kiate au : Ke ke tuu ki aluga o saele i mua o le kakai. Ke lotou ulu o too le fenua leia na kau fakapapau ki olatou tamana ke soli kia latou.

Lao o le alofa mo le fakalogo

¹² I le aso nei, Iselaele, kolea le nea leia e kole atu kiate koe e le Eteleno, lou Atua ? Ke ke i ki le Eteleno, lou Atua, o saele i ona ala fuli, o alofa mo tausi ki le Eteleno, lou Atua, i lou loto katoa mo lou laumalie katoa.

¹³ Ke ke tausi a folafola a le Eteleno mo ana lao ala e kau tuku kiate koe i le aso nei, o tupu ke ke manuia.

¹⁴ Ko leinei e pule le Eteleno, lou Atua, ki le lagi, mo atu lagi, mo le kele mo nea fuli ala e maua i ai.

¹⁵ Kae, i le temi mua, na gato tasi ki ou tamana ala na pipiki ki ai le Eteleno, talie na alofa a ia kia latou. I le temi nei, ko koutou, ala ko lolatou sakoga, na filifili e ia i puleaga fuli, ofaipe lakoutou tio ki ai i le aso nei.

¹⁶ Koia, ke kotou silikosisio ai okoutou loto, ti ke aua na kotou toe fakafefeka okoutou ua.

¹⁷ Talie ko le Eteleno, lokoutou Atua, ko le Atua o atu lagi, ko le Aliki o aliki fuli, ko le Atua lasi, mo makeke mo fakaii, leia e leaise tiotio tagata ti e leaise totogi ki se moliga.

¹⁸ E fakamaaui e ia i le faitotonu le fanau sala matua mo le fafine sala avaga. E alofa a ia ki le matapule leia e nofo i lou fenua, o soli kiate ia le nea kai mo le nea lava.

¹⁹ Koia, ke kotou toe alofa loa ki le matapule, talie na kotou matapule i le fenua o Esipito.

²⁰ Ke ke i ki le Eteleno, lou Atua. Ke ke su kiate ia. Ke ke pipiki kiate ia toka tasi, ti mo ke fakapapau i lona suafa toka tasi.

²¹ Ke ke tuku le fakavikiviki ki le Eteleno, talie ko ia ko lou Atua : Ko ia leia na fai ia a gaoi lalasi mo fakaii fuli ana i loto malie o ou, ala na tio ki ai ou mata.

²² Na ifo ou tamana ki Esipito ko le tino fitu lolatou api. I le aso nei kua fakaliliu a koe e le Eteleno, lou Atua, o tatau mo fetuu o le lagi.