Tetelonome 1 - Tosi Tapu

Fakamanatu o folafola a le Eteleno

¹ Ko nei folafola ala na tuku loa e Moisese ki Iselaele katoa i le fetuu esite o le Solotane, i le toafa o Alapa, i mua o Sufi, i le vasa o Palani, mo Tofele, mo Lapane, mo Aseloti, mo Ti-Sasapi.

² Na aso kau agafulu tupu tasi le fanoga mei Olepe ki Katesi-Palenea, i le ala o le mauga ko Seili.

³ I le kau fa fetuu mei le mavae mei Esipito, i le kau agafulu tupu tasi o masina, i le uluaki aso o le masina, na tuku loa e Moisese ki fanau a Iselaele a nea fuli ala na fakatotonu e le Eteleno ke fakasa kia latou.

⁴ Na fai loa le nea lena i le oki o le malo a Moisese ia Sioni, sau o le kau Amole, leia na nofo i Eseponi, mo Oki, sau o Pasani, leia na nofo i Asetaloti mo Etelei.

⁵ I le fetuu esite o le Solotane, i le fenua o Moape, na kamata loa e Moisese le ako o le lao a le Atua ki fanau a Iselaele, o pati :

⁶ Na masau mai le Eteleno, lotatou Atua, kia tatou i Olepe, o pati : Kua feauga lakotou nofo i le mauga leinei.

⁷ Kotou maliu, o ano ; kotou ano ki le mauga o le kau Amole, mo fenua ala e ofi ki ai, i le fenua laumalie, i le fenua o mauga liliki, i le fenua o le Solotane, i le fenua saute, i le fenua o le mata tai, i le fenua o le kau Kanaane mo le Lipane, o kaku ki le vaitafe lasi ko le Eufalate.

⁸ Kotou tio, kua kau tuku le fenua ki okoutou mua ; kotou ano, ti kotou too le fenua leia na fakapapau e le Eteleno ke soli ki okoutou tamana, ko Apalaamo, mo Isaake, mo Sakopo, mo lolatou sakoga i muli o latou.

⁹ I le temi lena, na kau pati atu loa kia koutou : e leaise kau mafai ia, e au toka tasi, le amo o koutou.

¹⁰ Kua fakaliuliuga koutou e le Eteleno, lokoutou Atua, ti kua kotou api i le aso nei o tatau mo fetuu o le lagi.

¹¹ Ke alofa le Eteleno, le Atua o okoutou tamana, o fakaapi koutou ke liuga tua afe ti mo tapuakii koutou o mulimuli ki lana fakapapau !

¹² Pe feaki loa laku amo ia, e au toka tasi, lokoutou tausi, mo lokoutou kavega, mo akoutou fakavisi ?

¹³ Kotou too i okoutou faasiga ni tagata poto, mo atamai, mo iloa, ti e kau fakanofo loa latou ke takitaki kia koutou.

¹⁴ Na kotou tali mai loa kiate au, o pati : e malie le nea leia e ke masau ki ai.

¹⁵ Ti na kau too loa latou ala na pule ki okoutou faasiga, ko ni tagata poto, mo iloa, ti na kau fakanofo loa latou ke pule kia koutou, ko iki ki tino afe, ko iki ki tino lelau, ko iki ki tino lima, ti ko iki ki tino agafulu, ti na kau tuku loa ki iki ke leoleo ki okoutou faasiga.

¹⁶ Na kau tuku loa, i le temi lena, le fakatotonu leinei ki okoutou tui fakamaau : ke kotou fakalogo ki okoutou fetaina, ti ke kotou fakamaaui i le faitotonu a visi a le tagata mo lona taina pe ko se tagata matapule.

¹⁷ Ke aua na kotou tiotio tagata i se fakamaau ; ke kotou logo fakatatau ki leia e ikiiki mo leia e lasi ; ke aua na kotou i ki se tagata, talie e kotou fakamaaui i le suafa o le Atua. Ti kapau e faigataa loa se nea kia koutou, ke kotou aumai loa a ia kiate au, ke kau logo ki ai.

¹⁸ I le temi lena, na kau fakasa fenaaki kia koutou a nea fuli ala e tonu ke kotou fai.

Pati gataa o Iselaele i Katesi-Palenea

¹⁹ Na tou mavae loa i Olepe, ti na tou foli katoa loa i le toafa lasi mo fakaii leinei kua kotou iloa ; na tou too loa le ala leia e ano ki le mauga o le kau Amole, o mulimuli ki le fakatotonu a le Eteleno, ti na tou kaku loa ki Katesi-Palenea.

²⁰ Na kau pati loa kia koutou : Kua kotou kaku ki le mauga o le kau Amole leia e soli kia koutou e le Eteleno, lotatou Atua.

²¹ Tio, e tuku e le Eteleno, lou Atua, le fenua ki ou mua. Pale, o too a ia, ofai ki le nea leia na fakasa kiate koe e le Eteleno, le Atua o okoutou tamana. Ke aua na ke i, ti ke aua na ke loto gaegae.

²² Na kotou fakafeofi fuli mai loa kiate au, o pati : Ke tou kakau ni tagata i mua o tatou, ke tioi ia le fenua, ti ke fakasa mai kia tatou le ala leia e tonu ke tou pale ai mo kolo ala e tonu ke tou kaku ki ai.

²³ Na malie loa le manatu lena kiate au, ti na kau too loa ni tagata e tino agafulu tupu lua ia koutou, ko se fa tagata i le faasiga.

²⁴ Na lotou pale loa ki le mauga, ti na lotou kaku loa ki le fenua o Esekoli leia na lotou tioi loa.

²⁵ Na lotou too loa i olatou lima ni fuai laakau o le fenua, o aumai kia tatou. Na lotou fai loa kia tatou se fakamatala, o pati : Ko se fenua malie leia e soli mai kia tatou e le Eteleno, lotatou Atua.

²⁶ Kae na leaise kotou loto loa ke pale ki ai, ti na kotou agatuu loa ki le fakatotonu a le Eteleno, lokoutou Atua.

²⁷ Na kotou lalau loa i okoutou falela, o pati : E vesia le Eteleno kia tatou, koia leia na fakamavae ai e ia tatou mei le fenua o Esipito, o tupu ke tuku tatou ki lima o le kau Amole ti ke maumaui tatou.

²⁸ E tou ano loa kifea ? Kua fakagaegae otatou loto e otatou fetaina, o pati : Ko se kakai leia e makeke ake ti e lalasi ake ia tatou ; ko ni kolo ala e lalasi ti e a takatakai o kaku ki le lagi. Na lotou tio foki i ai ki ni fanau a Anake !

²⁹ Na kau pati loa kia koutou : Ke aua na kotou loto gaegae, ti ke aua na kotou i kia latou.

³⁰ Ko le Eteleno, lokoutou Atua, leia e saele i mua o koutou, e tau loa kia koutou, ofaipe lana fai kia koutou i Esipito, i okoutou mua,

³¹ ti mo le toafa, leia na ke tio ai ki le aga a le Eteleno, lou Atua, o amo a koe ofaipe se tagata leia e amo ia lona vosa, i le ala katoa leia na kotou fai o kaku mai ki le ganea leinei.

³² Kae, i le temi lena, na leaise kotou fanaki ki le Eteleno, lokoutou Atua,

³³ leia na ano i mua o koutou i le ala, o afa se ganea leia ke fakatuu ai okoutou falela ; i le pouli i se afi ke fakasa ia le ala leia e tonu ke kotou saele ai ; i le ao i se pou afu ke fakamalumalu ai koutou.

³⁴ Na logo loa le Eteleno ki le logoa o akoutou masau. I lona sausau, na fakapapau loa a ia, o pati :

³⁵ e leaise tio loa se tagata e toka tasi o le tautupu agaveli leinei ki le fenua malie leia na kau fakapapau ke soli ki okoutou tamana,

³⁶ gato fai kia Kalepo, vosa o Sefune, e tio loa ki le fenua lena, ti e kau soli loa kiate ia mo ona vosa le fenua leia na saele ai a ia, talie na mulimuli katoa a ia i le ala o le Eteleno.

³⁷ Na sausaua foki le Eteleno kiate au, o tupu ko koutou, ti na pati loa a ia : Ko koe foki, e leaise ke ulu loa ki le fenua.

³⁸ Kae ko Sosue, vosa o Nune, leia e fakasausau kiate koe, e ulu loa ki le fenua. Fakamakekei a ia, talie ko ia leia e fakaulu ia loa Iselaele ki le fenua leia ko lona tofiga.

³⁹ Ti ko okoutou fanau liliki, ala na kotou pati ki ai : E lotou liliu loa ko le koloa o le fili malo ! Io, ko okoutou vosa, ala na leaise iloa ia le nea leia e malie mo le nea leia e veli i le aso lena, ko latou loa ala e ulu loa ki le fenua mo Sosue.

⁴⁰ Kae ko koutou, ke kotou maliu loa i le aso nei, o ano ki le toafa, i le ala ki le tai Kula.

⁴¹ Na kotou tali loa, o pati mai kiate au : Kua motou agasala ki le Eteleno. Kae i le aso nei e motou pale loa ti e motou tau loa, o mulimuli ki le nea leia kua fakatotonu mai kia matou e le Eteleno. Ti na kotou tasi too ia loa ana masafu, o nonoa ki lona kilipipi, talie na kotou pati e faigaofie loa le too o le mauga.

⁴² Kae na pati mai loa le Eteleno kiate au : pati kia latou : ke aua na kotou pale ki le mauga ti ke aua na kotou tau, talie e leaise kau nofo mo koutou, talie e kotou sosola loa i mua okoutou fili.

⁴³ Na kau masau kia koutou, kae na leaise kotou fakalogo. Na kotou fakafefeka loa ki fakatotonu a le Eteleno, ti na kotou fia nealasi loa, o pale ki le mauga.

⁴⁴ Ti na ifo ake loa kia koutou le kau Amole, ala na nofo i le mauga lena, ofaipe se mumuiga lago meli, o tamate koutou i Seili, ti mo kapu koutou o kaku ki Olama.

⁴⁵ I lakoutou toe liliu mai, na kotou tagi loa i mua o le Eteleno ; kae na leaise fakalogo loa le Eteleno ki lokoutou leo, ti na leaise tokaga loa a ia kia koutou.

⁴⁶ Koia na kotou nofo fualoa ai loa, io, o fualoa veli ai, i Katesi-Palenea.