Taniela 9 - Tosi Tapu

Le faikole mo le kofesio a Taniela

¹ I le uluaki fetuu o Taliusi, vosa o Asuelusi, mei le sakoga o le kau Mete, leia na liliu ko le sau o le puleaga o le kau Kaletea,

² i le uluaki fetuu o lana sau, ko au Taniela, na kau tio loa i tosi e tonu ke oki ni fetuu e kau fitu ki le maumaui o Selusalemi, o mulimuli ki le lasi o fetuu ala na fakasa e le Eteleno ki le polofeta ko Selemia.

³ Na fakamaliu loa oku mata ki le Aliki Atua, o tupu ke afa i le faikole mo le tagi, ti na kau sesunio loa o tui le taga mo pani le mugalafu.

⁴ Na kau faikole loa ki le Eteleno, loku Atua, ti na kau kofesio loa kiate ia le nea leinei : Aliki, Atua lasi mo fakaii, a koe leia e taupau ia lau sai ti e manava alofa kia latou ala e alofa kiate koe ti mo taupau ia au fakatotonu !

⁵ Kua motou agasala, kua motou fai le agaveli, kua motou agatuu mo patigataa, ti kua motou tiaki au fakatotonu mo au lao.

⁶ Na leaise motou fakalogo ki au tagata fakasausau, le kau polofeta, ala na masau i lou suafa ki omatou sau, mo omatou pule, mo omatou tamana, ti mo le kakai katoa o le fenua.

⁷ A au, Aliki, le faitotonu, kae a matou le luma i le aso nei, a tagata o Suta, mo le kakai o Selusalemi, ti mo Iselaele katoa, latou ala e nofo feofi mo latou ala e nofo mamao, i fenua fuli ala kua ke kapu latou ki ai, o tupu ko agatuu fuli ala na lotou agasala ai kiate koe.

⁸ Aliki, a matou le luma, mo omatou sau, mo omatou pule, mo omatou tamana, talie kua motou agasala kiate koe.

⁹ Kae i tafa o le Aliki, lomatou Atua, e maua ai le manava alofa mo le fakamolemole, talie na motou agatuu kiate ia.

¹⁰ Na leaise motou fakalogo ki le leo o le Eteleno, lomatou Atua, o mulimuli ki ana lao ala na tuku mai kia matou i ana tagata fakasausau, le kau polofeta.

¹¹ Kua maumaui e Iselaele katoa lau lao, ti kua lotou mafuli kese talie ke aua na lotou fakalogo ki lou leo. Koia kua liligi ai kia matou a malaia ala na tosi i le lao a Moisese, le tagata fakasausau a le Atua, talie kua motou agasala ki le Atua.

¹² Kua fakasoko e ia a folafola ala na puaki kia matou ti mo omatou pule ala na lagiaki ia matou, na kakau mai e ia kia matou se malaia lasi, ti e leikiaise toe soko se malaia felaaki i le lalo lagi nei, se malaia o tatau mo leia kua soko ki Selusalemi.

¹³ Ofaipe lona tosi i le lao a Moisese, kua au a malaia fuli kia matou ; ti na leaise motou kalaga ki le Eteleno, lomatou Atua, ti na leaise motou tafoki mei amatou agatuu, ti na leaise motou tokaga ki le maoki.

¹⁴ Koia kua taupau ai e le Eteleno le malaia lena, o kakau mai kia matou ; talie e faitotonu le Eteleno, lomatou Atua, i nea fuli ala na fai e ia, kae na leaise motou fakalogo ki lona leo.

¹⁵ I le aso nei, Aliki ko lomatou Atua, a koe leia na fakamavae ia lou kakai mei le fenua o Esipito ki lou lima makeke, a koe leia na logologona talu mei ai o kaku mai ki le aso nei, kua motou agasala, kua motou fai le nea leia e veli.

¹⁶ Aliki, o tupu ko lou manava alofa lasi, ke ke fakamaliu kese lou mafaia mo lou sausau mei lou kolo ko Selusalemi, mei lou mauga maokioki ; talie, o tupu ko amatou agasala mo agatuu o omatou tamana, kua luma Selusalemi mo lou kakai i mua o latou ala e takatakai ia matou.

¹⁷ Koia i le aso nei, ei lomatou Atua, ke ke fakalogo mai ki le kole mo tagi a lau tagata fakasausau, ti e tupu ko lou suafa, ke ke tio mo ke alofa ki lou sagatualio leia kua maumau !

¹⁸ Ei loku Atua, tokaga mai lou taliga, ti ke fakalogo mai ! fakamavaa ou mata ti ke tio ki maumau, ke ke tio ki le kolo leia e kalagai ai lou suafa ! E leaise motou fai atu amatou tagi o tupu ko lamatou faitotonu, kae o tupu ko lou manava alofa lasi.

¹⁹ Aliki, fakalogo ! Aliki, fakamolemole ! Aliki, tokaga ! gaoi, aua na ke toe talitali, o tupu ko lou alofa kiate koe, ei loku Atua ! Talie e kalagai lou suafa i lou kolo ti mo lou kakai.

Ko vasaa e kau fitu

²⁰ Na kau toe masau, na kau faikole, ti na kau kofesio aku agasala mo agasala o loku kakai ko Iselaele, ti na kau fai aku tagi ki le Eteleno, loku Atua, o uiga mo le mauga maokioki o loku Atua ;

²¹ koi kau masau i laku faikole, kae ko leinei, ko le tagata leia na igoa ko Kapeliele, leia na kau tio ki ai i mua atu i se tio, na fakafeofi mai loa kiate au i se lele mauvave, i le lakaga o failaulau o le afiafi.

²² Na masau mai loa a ia kiate au, ke fakamalamai au, o pati : Taniela, kua kau au i le temi nei, o tupu ke fakamavaa lou atamai.

²³ I lau kamata faikole, na kaku mai loa le folafola, ti kua kau au o fakasa atu a ia kiate koe ; talie ko koe ko se tagata alofaina. Tokaga ki le folafola, ti mo ke matala ki le tio !

²⁴ Kua fakatuutuu ni vasaa e kau fitu ki lou kakai ti mo le kolo maokioki, ke fakagato ai a agaveveli, mo fakaoki ai a agasala, mo fakamolemole ai le agatuu, mo aumai ai le faitotonu lee gato, mo fakasoko ai a nea ala na tio mo folafola ki ai le kau polofeta, ti mo toe fakatapui ai le fale tapu.

²⁵ Koia ke ke iloa ai ti mo ke matala ki le nea leinei : Mei le lakaga leia na fakasa ai e le folafola e toe laga loa Selusalemi, o kaku ki le Mesia, le Takitaki, e i ai ni vasaa e fitu ti mo ni vasaa e kau ono tupu lua : e toe laga loa a lapalasi mo kanivo, kae i ni temi maveuveu.

²⁶ I le oki o vasaa e kau ono tupu lua, e too loa le Mesia, ti e leaise maua loa sona fetogi. E au loa se pule mo lana solia, o maumaui le kolo mo le fale tapu. Kae e soko loa lona fakaoki ofaipe se lomaki ; kae o kaku ki lona mate, e fai loa e ia se tau maumau, o mulimuli ki le nea leia kua fakatotonu.

²⁷ I le vasaa fakaoki, e fai loa e ia se sai makeke mo se i. Ti e fakagato loa e ia i loto malie o le vasaa a failaulau mo moliga ; e fai loa e le tagata maumau ni nea fakalialia lasi, o kaku ki le temi leia e maumaui ai loa a ia ti e vilo ai loa kiate ia le nea leia kua fakatuutuu.