Taniela 8 - Tosi Tapu

Tio o le ovi tagata mo le koti tagata

¹ I le tolu o fetuu o le sau ko Pelesatesale, ko au Taniela, na fakatio loa au e le Atua ki se nea, leia na kese ake i nea ala na kau tio ki ai i mua atu.

² I laku moe miti lena, na sakinake kiate au e kau nofo i Suse, le kolo mua o le fenua ko Elame ; i laku moe na kau tio loa e kau tuu i le laugutu o le vaitafe ko Ulai.

³ Na kau tagaki loa ti na kau tio, ti ko leinei na tuu se ovi tagata i mua o le vaitafe. Na maua e ia ni ona tala loloa, ti ko le tala leia na somo fakamuli ake na taualuga ake i la ake a tala.

⁴ Na kau tio loa ki le ovi tagata leia na ta ia ona tala ki le uesite, mo le noleto, ti mo le saute ; na leaise mafai e se manu e tasi ke tuu i ona mua, ti na leaise mafai e se tasi ke saofaki ia mei ona lima ; kae na fai e ia ki lona loto, ti na liliu loa a ia o makeke.

⁵ Koi kau lolotoga fakakaukau ki ai, ko leinei, na au se koti tagata mei le potu uesite i fuga o le malama nei katoa, kae na leaise lave ona vae ki ai ; na maua e le koti tagata lena se tala lasi i le vasa o ona mata.

⁶ Na kaku loa a ia ki le ovi tagata leia na maua ia ni tala, ti na kau tio e tuu a ia i mua o le vaitafe, ti na makape loa a ia kiate ia i lona makeke katoa.

⁷ Na kau tio loa kiate ia kua fakafeofi ki le ovi tagata, o itaita kiate ia ; na taai loa e ia le ovi tagata, o fatii ona tala e lua, kae na leaise maua loa e le ovi tagata se makeke ke tuu i ona mua. Na ti loa e ia le ovi tagata ki le kele, o takatakafi a ia, ti na leaise tasi ke saofaki ia a ia.

⁸ Na liliu loa le koti tagata o makeke lasi ; kae i lana kaku o makeke, na fati loa lona tala. Na malaga ake loa a tala lalasi e fa o fetogi a ia, i fetuu matagi e fa o le lagi.

⁹ Mei se tasi o tala ana, na somo ake loa se ga tala ikiiki, leia na tupu ake loa o lasi ki le saute, mo le esite, mo le fenua o le manuia.

¹⁰ Na malaga loa a ia o kaku ki le kau tau o le lagi, ti na fakavilo loa e ia ki le kele se potu o le kau tau lena mo fetuu, ti na takatakafi loa e ia latou.

¹¹ Na malaga loa a ia o kaku ki le pule o le kau tau, ti na too loa e ia le failaulau o aso taki tasi meiate ia, kae fakakelekele loa e ia le sagatualio.

¹² Na tuku loa kiate ia le kau tau mo le failaulau o aso taki tasi, o tupu ko le agasala ; na ti loa e le tala le maoki ki le kele, ti na manuia loa ana gaoi fuli.

¹³ Na kau logo loa ki le masau a se aselo, ti na tali loa se tasi ake aselo ki leia na masau : Pe fualoa loa le temi leia e soko ai le tio ki le sakilifisio o aso taki tasi, mo le agasala o le tagata maumau ? Pe kaku loa kiafea le takatakafi o le sagatualio mo le solia o le lagi ?

¹⁴ Ti na pati mai loa a ia kiate au : Ko afiafi mo usu e lua afe kau lelau tolu ; ti e mea loa le sagatualio.

¹⁵ Ko au Taniela, na kau maua ia le tio lena, ti na kau afa ke kau matala ki ai, ti ko leinei, na tuu se tasi leia na faipe se tagata i oku mua.

¹⁶ Ti na kau logo loa ki le leo o se tagata i loto malie o le vaitafe ko Ulai ; na kalaga loa a ia, o pati : Kapeliele, fakamatala kiate ia le tio.

¹⁷ Ti na au loa Kapeliele ki le ganea leia na kau nofo ai ; ti na kau i i lana fakafeofi mai kiate au, ti na kau punou loa, o fakatuu oku mata ki le kele. Na pati mai loa a ia kiate au : Tokaga, ei vosa o le tagata, talie e uiga le tio mo se temi leia e liliu loa ko le temi fakaoki.

¹⁸ I le lolotoga o lana masau mai kiate au, na kau fakapulou oku mata ki le kele, ofaipe se tasi kua mata fakapouli. Ti na fafa mai loa a ia kiate au, ti na fakatuu loa e ia au ki aluga i le ganea leia na kau nofo ai.

¹⁹ Ti na pati mai loa a ia kiate au : E kau fakasa atu loa kiate koe le nea leia ka soko loa i le oki o le sausau o le Atua, talie e i ai se temi leia kua fakamailoga ki le fakaoki.

²⁰ Ko le ovi tagata leia na ke tio ki ai, ti na maua ia ni tala, ko sau ana o le kau Meti mo le kau Pelesi.

²¹ Ko le koti tagata, ko le sau a ia o Sava. Ko le tala lasi i vasa o ona mata, ko le uluaki sau a ia.

²² Ko tala e fa ala na malaga ake o fetogi le tala lasi lena kua fati, ko puleaga ana e fa ala e sosomo ake loa o fetogi le puleaga lena, kae e leaise lotou maua loa le makeke o le uluaki puleaga.

²³ I le oki o lalatou pule, mo ka maumaui loa le kau agasala, e malaga ake loa se sau matasoka mo poto kaka.

²⁴ E tupu loa lona makeke o lasi, kae e leaise ko lona makeke totonu o ona ; e fai loa e ia ni maumau fakaii, ti e manuia loa ana gaoi, ti e maumaui loa e ia le kau lalasi mo le kakai o le kau sagato.

²⁵ O tupu ko le lasi o lona koloa ti mo le manuia o ana kaka, e maua loa e ia i lona loto le fia nealasi, ti e tamate loa e ia ni tagata i ala na mauli fimalie, ti e malaga loa a ia ki le Aliki o aliki ; kae e fatii loa a ia, sala mo se tokoi a se lima.

²⁶ E maoki le tio o afiafi mo usu. Kiate koe, taupau fakafufu le nea leia na ke tio ki ai, talie ko se nea o uiga mo ni temi koi mamao.

²⁷ Ko au Taniela, na kau gaegae veli ai ti na kau masaki loa i ni aso e mauke ; ti oki, na kau tuu loa ki aluga ti na kau tokaga loa ki gaoi a le sau. Na kau punamauli i le nea leia na kau tio ki ai, ti na leaise iloa a ia e se tasi.