Taniela 7 - Tosi Tapu

le tio o manu e fa

¹ I le uluaki fetuu o Pelesatesale, sau o Papilone, na fai loa e Taniela se moe miti, ti na sa loa ni tio ki lona loto i lana moe i lona moeaga. Ti na tosi loa e ia le moe miti, ti na fakamatala loa e ia a nea tafito ala na tio a ia ki ai.

² Na kamata loa e Taniela lana fakamatala, o pati : Na kau tio i laku moe miti i le pouli : ti ko leinei, na agi makeke loa a matagi e fa o le lagi ki le tai lasi.

³ Ti na pale loa ni manu lalasi e fa mei le tai, ti na leaise lotou agaaga tatau.

⁴ Na fai le uluaki pe se laione, ti na maua e ia ni kapakau o le akuila ; na kau tio loa o kaku ki le temi leia na taaki ai loa ona kapakau ; na siki loa a ia mei le kele o fakatuu ki ona vae muli ofaipe se tagata, ti na soli loa kiate ia se mafu fakatagata.

⁵ Ti ko leinei, na fai le lua manu pe se uluso, ti na nofo fakafetuu a ia ; na uuti e ia i lona gutu, ki ona nifo ni ivi vakavaka e tolu ; ti na pati kiate ia : Tuu ki aluga, kai fakalasi ni inati.

⁶ I le sili o le nea lena na kau tio loa, ti ko leinei na fai se tasi a manu pe se leopale, ti na tuu i lona tua ni kapakau e fa ofaipe se manu lele ; na maua e le manu lena ni fa ulu e fa, ti na soli kiate ia le pule.

⁷ I le oki o le nea lena na kau tio loa i le lolotoga o aku moe miti i le pouli, ti ko leinei, na fakaii le fa o manu, ti na fakalialia, ti na makeke lasi a ia ; na maua e ia ni nifo lalasi ukamea, na kai e ia ti na gugu e ia ana nea kai, ti na takatakafi e ia ki ona vae le nea leia na toe. Na kese a ia mo la ake a manu i mua, ti na maua e ia ni tala e kau agafulu.

⁸ Na kau tokaga loa ki tala, ti ko leinei na somo ake loa se ga tala ikiiki i loto malie o tala, ti na mataaki loa a tala e tolu o uluaki tala i mua o le ga tala lena. Ti ko leinei, na maua loa e le tala foou lena ni ona mata ofaipe se tagata, ti mo se gutu leia na masau matasoka.

⁹ Na kau tio, ti ko leinei, na fakatuu ni ekeekeaga fakasau. Ti na ekeeke loa le Matua o aso. Na tea lona kofu ofaipe le nive, ti na fai ona fului ulu pe se fului ovi mea ; na fai lona ekeekeaga fakasau pe ni ulai afi, ti na fai a teka o le ekeekeaga pe se afi kaka.

¹⁰ Na tafe se vaitafe afi mei ona mua. Na lau i afe mo afe latou ala na tausi kiate ia, ti mo miliona mo miliona latou ala na tutuu i ona mua. Na ekeeke loa a tui fakamaau, ti na fakamavaa loa ni tosi.

¹¹ Ti na kau toe tio loa, o tupu ko masau matasoka ala na fai e le tala ; i le lolotoga o laku tio, na tamate loa le manu, ti na maumaui loa lona tino, o ti ki le afi ke tutu i ai.

¹² Ko la ake a manu, na too loa meia latou olatou makeke, kae na toe fakatologa atu loa olatou mauli i se ga temi.

¹³ Na kau tio loa i aku moe miti i le pouli, ti ko leinei, na au loa se tasi leia na faipe se vosa o le tagata i ao o le lagi ; na au loa a ia ki le Matua o aso, ti na tuku loa a ia ke fakafeofi ki le Matua o aso.

¹⁴ Na soli loa kiate ia le pule, mo le kololia, mo le sau ; ti na tausi loa kiate ia a kakai fuli, mo puleaga, ti mo tagata mei masau kesekese fuli. Ko lana pule ko se pule lee gato, leia e leaise toe gato loa, ti e leaise toe maumau loa lona puleaga i se aso.

¹⁵ Ko au Taniela, na sevaia loa loku loto, ti na fakaii loa kiate au a nea ala na kau tio ki ai i loku loto.

¹⁶ Na kau fakafeofi loa ki se tasi o latou ala na tutuu i le ganea lena, ti na kau kole loa kiate ia ke fakasa mai kiate au le maoki o nea fuli ana. Na tali loa e ia laku kole ti na fakasa mai loa e ia lona uiga :

¹⁷ Ko manu lalasi ana e fa ko sau e fa ala e malaga ake loa i le malama nei ;

¹⁸ kae e maua loa e le kau sagato a le Atua Taualuga le puleaga, ti e lotou maua loa le puleaga o lee gato i sekulo mo sekulo.

¹⁹ Ti na kau loto loa ke kau iloa le maoki o le uiga o le fa o manu, leia na kese i la ake a manu, ti na fakaii veli, ti na maua ia ni nifo ukamea mo ni matininia sila, le manu leia na kai, ti na gugu ia lana nea kai, ti na takatakafi ia ki ona vae le nea leia na toe ;

²⁰ ti mo le maoki o uiga mo tala e kau agafulu ala na tuu i lona fa ulu, ti mo le ga tala ikiiki leia na somo ake ti maluluku ai a tala e tolu i ona mua, le tala leia na maua ia ni mata mo se gutu leia na masau matasoka ti na mata mauiga ake i la.

²¹ Na kau tio loa ki le tala lena na tau ki le kau sagato, ti na malo loa a ia ia latou,

²² o kaku ki le lakaga leia na au ai loa le Matua o aso, o tuku le fakamaau totonu ki le kau sagato o le Taualuga. Ko le temi loa lena na tuku ai le puleaga ki le kau sagato.

²³ Na masau mai loa a ia kiate au, o pati : Ko le fa o manu, ko le fa a ia o puleaga ala e tuu loa i le malama nei, e kese loa a ia mo puleaga fuli, ti e kai loa e ia le malama nei katoa, ti e takatakafi loa e ia, ti e gugu e ia le malama nei katoa.

²⁴ Ko tala e kau agafulu, ko sau ana e kau agafulu ala e malaga ake loa i le puleaga lena. E malaga ake loa se tasi i olatou muli, leia e kese loa i la ake na muamua, ti e fakaifo loa e ia a sau e tolu.

²⁵ E fai loa e ia ni masau matasoka ki le Taualuga, ti e fakavelivelii loa e ia le kau sagato a le Taualuga, ti e amanaki loa a ia ke fetogi e ia a temi mo le lao ; ti e tuku loa le kau sagato ki ona lima i le lolotoga o se fetuu e tasi, mo ni fetuu e lua, mo le vaelua o se fetuu.

²⁶ Ti e soko mai loa le fakamaau, ti e too loa le pule meiate ia, ti e maumaui loa lona puleaga o lee gato.

²⁷ Ko le sau, mo le pule, ti mo le kololia o puleaga fuli i lalo o le lagi, e soli loa ki le kakai o le kau sagato a le Taualuga. Ko lona puleaga ko se puleaga lee gato, ti e tausi loa a pule fuli kiate ia mo fakalogo loa kiate ia.

²⁸ Na fakaoki loa i nea anei lana masau. Ko au Taniela, na kau sevaia lasi loa i aku fakakaukau, ti na faikese loa oku mata, ti na kau taupau loa a masau ana i loku loto.