Taniela 6 - Tosi Tapu

Taniela i le popoko o laione

¹ Na malie loa kia Taliusi ke fakanofo i le ulu o le puleaga se kau aliki e tino lelau tino lua, ke nonofo i le puleaga katoa.

² Na fakanofo loa e ia i lolatou ulu ni pule e toka tolu, ti na kau loa Taniela i ai, o tupu ke fakafelogoi kia latou e le kau aliki, a nea fuli o uiga mo lalatou pule, ti ke aua na i ai se nea leia e veli ki le puleaga.

³ Na fakalaka Taniela i pule ti mo aliki, talie na maua iate ia se laumalie taualuga ; ti na manatu loa le sau ke fakanofo a ia ke pule ki le puleaga katoa.

⁴ Ti na afa loa e le kau pule mo le kau aliki se faigamalie ke fakalakasala ai Taniela o uiga mo nea o le puleaga. Kae na leaise lotou maua se faigamalie, pe ko se nea ke fakalakasala ai, talie na agatonu a ia ti na leaise maua iate ia se sala pe ko se nea veli fua e tasi.

⁵ Ti na pati loa a tagata ana : E leaise tou maua loa se faigamalie e tasi ke fakalakasala ai Taniela, kae e lagi koi tou maua ia loa a ia i le lao o lona Atua.

⁶ Ti na ano fakatasi loa le kau pule mo le kau aliki ki le sau, ti na lotou masau loa kiate ia, o pati : Sau ko Taliusi, ke ke mauli o lee gato !

⁷ Kua loto tasi fuli a pule o le puleaga, mo le kau minisi, mo le kau aliki, mo le kau fono, ti mo kovana, ke fai se fakatotonu fakapuleaga e le sau ti mo se tapu mamafa leia e fakasa ia, ko le tagata leia, i lolotoga o aso e kau tolu e faikole loa ki se atua kese pe ko se tagata kese, e ti loa ki le popoko o laione ; e gato tasi fai kiate koe, ei sau, e faikole loa ki ai.

⁸ I le lakaga nei, ei sau, fakamaoki le tapu leinei, ti ke tosi le lao, o tupu ke aua na toe fetogi, o mulimuli ki le lao a le kau Meti mo le kau Pelesi, leia e leaise toe fulusi.

⁹ I le nea lena na tosi loa e le sau ko Taliusi le fakatotonu mo le tapu.

¹⁰ I le iloa e Taniela kua tosi le fakatotonu, na ano loa a ia ki lona fale ; ti na fakamavaa loa e ia a katupa o le kogafale i lau fata ki le fetuu o Selusalemi. Ti na tua tolu i le aso na tutuli loa a ia o faikole mo fakavikiviki ki lona Atua, ofaipe lana fai masani i mua.

¹¹ Kae na ulu fakatasi loa a tagata ana, ti na lotou maua loa Taniela e lolotoga faikole mo fetapa ki lona Atua.

¹² Ti na lotou ano loa ki mua o le sau, ti na lotou masau loa kiate ia o uiga mo le tapu a le sau : Pe na leaise ke fakamaoki se tapu leia e fakasa ai, ko leia i lolotoga o aso e kau tolu e faikole loa ki se atua kese pe ko se tagata kese ake iate koe, ei sau, e ti loa a ia ki le popoko o laione ? Na tali loa le sau : E maoki le nea lena, e maoki, o mulimuli ki le lao a le kau Meti mo le kau Pelesi, leia e leaise mafai ke toe fetogi.

¹³ Na lotou toe masau loa, o pati ki le sau : Ko Taniela, se tasi o le kau popula o Suta, na leaise fakaapaapa fua a ia kiate koe, ei sau, ti mo le tapu leia na ke fakamaoki ki ai, talie e faikole tua tolu a ia i le aso.

¹⁴ Na mamae loa le sau i lana logo ki le nea lena ; ti na loto loa a ia ke saofaki Taniela ; ti na faiga loa a ia o kaku ki le afiafi ke saofaki Taniela.

¹⁵ Kae na fakamakeke ake a tagata ana ki le sau, o pati kiate ia : ei sau, ke ke iloa, ko le lao a le kau Meti mo le kau Pelesi e fakamaua ia ko tapu fuli mo lao fuli kua fakamaoki e le sau, e leaise mafai ke toe fetogi.

¹⁶ Koia na fakatotonu loa e le sau ke aumai Taniela, ti ke ti a ia ki le popoko o laione. Ti na masau loa le sau, o pati kia Taniela : Ko lou Atua leia e ke tausi ki ai i le kataki fualoa, ke mafai e ia lana saofaki ia a koe !

¹⁷ Na aumai loa se fatu o tapono ai le pu o le popoko ; ti na tuku loa e le sau ki ai lona fakamailoga ti mo le fakamailoga o lana kau lalasi, o tupu ke aua na fetogi se nea o uiga mo Taniela.

¹⁸ Ti na ano loa le sau ki lona fale sau ; ti na sesunio loa a ia i le pouli, ti na leaise kalagai loa e ia se fafine ke au kiate ia, ti na leaise mafai ke moe mate loa a ia.

¹⁹ Ti na ala mafoata loa le sau, ti na ano fakavilivili loa a ia ki le popoko o laione.

²⁰ Na fakafeofi loa a ia ki le popoko, ti na kalaga loa a ia kia Taniela ki se leo mamae. Ti na masau loa le sau, o pati kia Taniela : Taniela, tagata fakasausau a le Atua mauli, pe na mafai e lou Atua leia e ke tausi ki ai i le kataki fualoa, ke saofaki a koe mei laione ?

²¹ Ti na pati loa Taniela ki le sau : ei sau, ke ke mauli o lee gato !

²² Kua kakau mai e loku Atua lana aselo ke tapono ia a gutu o laione, ti na leaise lotou fai fua kiate au se nea veli, talie na leaise maua e ia saku sala i ona mua ; ti e felaaki foki i ou mua, ei sau, na leaise kau fai fua se sala.

²³ Ti na fiafia lasi loa le sau, ti na fakatotonu loa e ia ke too ake Taniela mei le popoko. Ti na too ake loa Taniela mei le popoko, ti na leaise maua fua iate ia se lavea, talie na fanaki a ia ki lona Atua.

²⁴ Na fakatotonu loa e le sau ke aumai ki ona mua a tagata ala na fakalakasala ia Taniela, ti ke ti latou ki le popoko o laione, latou mo alatou fanau ti mo alatou avaga ; ti na leikiaise lotou kaku ki le takele o le popoko, kae kua tapo latou e laione, o gugu olatou ivi fuli.

²⁵ I le sili o le nea lena, na fai loa e le sau ko Taliusi se tosi ki kakai fuli, mo puleaga fuli, mo tagata mei faasiga masau kesekese, ala na nonofo i le malama nei katoa : Ke soli atu kia koutou le tokamalie o lasi !

²⁶ E kau fakatotonu le nea leinei : I loku puleaga katoa, ke maua le i mo le fakaapaapa ki le Atua o Taniela. Talie ko le Atua mauli a ia, ti e mauli a ia o lee gato ; e leaise maumaui loa lona puleaga i se aso, ti e tuu loa lana pule o kaku ki le fakaoki.

²⁷ Ko ia leia e saofaki ia ti e fakamauli ia, leia e fai ia ni fakamailoga ti mo ni nea fakamanamana i le lagi mo le kele. Ko ia leia na saofaki ia Taniela mei le makeke o laione.

²⁸ Na tapuakina loa Taniela i le sau o Taliusi, ti mo le sau o Silusi, tagata Pelesi.