Taniela 5 - Tosi Tapu

Le kai lasi a Pelesatesale ; too o Papilone

¹ Na fai loa e le sau ko Pelesatesale se kai lasi ki lana kau lalasi, ko le tino afe, ti na inu loa e ia se vino i olatou mua.

² Ko Pelesatesale, i lana asiasi le vino, na fakatotonu loa ke aumai a ipu aulo mo ipu siliva ala na too e lona tamana ko Nepukatenesale mei le fale tapu o Selusalemi, ke inu ki ai le sau mo lana kau lalasi, mo ana avaga, ti mo ana feauaki.

³ Ti na aumai loa a ipu aulo ala na too mei le fale tapu o le Atua i Selusalemi ; ti na inu loa le sau, mo lana kau lalasi, mo ana avaga, mo ana feauaki i ipu.

⁴ Na lotou inu loa se vino, ti na lotou fakavikiviki loa ki atua aulo, mo atua siliva, mo atua sila, mo atua ukamea, mo atua laakau, ti mo atua fatu.

⁵ I le temi fai lena, na sa loa ni maikao o se limai tagata, ti na tositosi loa e maikao ki le paa lase o le fale sau, i mua o le fa malama. Ti na tio loa le sau ki le potu o le lima lena na tositosi.

⁶ Ti na tea katoa loa le sau i lona i, ti na sevaia loa lona loto i ana fakakaukau, ti na leaise koi maua loa sona makeke ti na fetati loa ona tuli.

⁷ Ti na kalaga loa le sau, o leo lasi, ke aumai latou ala e sivi ia a temi, mo le kau Kaletea, ti mo kau faikikite ; ti na pati loa le sau ki le kau poto o Papilone : Ko leia e lau ia loa le faitosi leinei ti mo fakamatala ia mai loa lona mauiga kiate au e fakakofu loa a ia ki le kofu kula, ti e fakatau loa se kasoa aulo ki lona ua, ti e maua loa e ia le tolu tuulaga o le puleaga.

⁸ Na ulu ake loa ki fale le kau poto fuli a le sau ; kae na leaise mafai ke lotou lau le fai tosi ti mo fakamatala lona uiga ki le sau.

⁹ Koia na i lasi ai loa le sau ko Pelesatesale, ti na asilisili fakalaulautetea loa a ia ; ti na mata mamae fuli loa lana kau lalasi.

¹⁰ Ko le avaga o le sau, o tupu ko masau a le sau mo lana kau lalasi, na ulu mai loa ki le kogafale o le kaitasi, o masau feneeki : ei sau, ke ke mauli o lee gato ! Ke aua na ke mamae o tupu ko au manatu, ti ke aua na ke i !

¹¹ E maua se tagata i lou puleaga leia e nofo ai le laumalie o atua maokioki ; i le temi o lou tamana, na maua i le tagata lena le tio malama, mo se atamai, ti mo se poto, leia e tatau mo le poto o atua. Ti ko le sau ko Nepukatenesale, lou tamana, ei sau, na fakanofo ia a ia ko le pule o le kau fai nea fakatalatupua, mo le kau sivi fetuu, mo le kau Kaletea, ti mo le kau faikikite,

¹² Talie na maua iate ia, ia Taniela, leia na fakaigoa e le sau ko Pelesatesale, se laumalie taualuga, mo se atamai, mo se poto, mo se malama ki le kikite o moe miti, mo le fakamatala o misitelio ti mo le fakatonutonu o nea faigataa. Koia, kalagai nei Taniela, ti e soli mai loa e ia lona uiga.

¹³ Na fakaulu mai loa Taniela ki mua o le sau. Ti na masau loa le sau, o pati kia Taniela : Pe ko Taniela a koe, se tasi o le kau popula leia na aumai e le sau, loku tamana, mei Sutea ?

¹⁴ Kua kau logo o uiga mo koe, e ke maua le laumalie o atua, ti e maua iate koe le tio malama, mo se atamai, ti mo se poto kese.

¹⁵ Ko le oki leinei o le aumai ki oku mua o le kau poto ti mo le kau sivi temi, o tupu ke lotou lau ia le faitosi leinei ti ke lotou fakamatala mai kiate au lona uiga ; kae na leaise mafai ke lotou tuku mai le uiga o kupu.

¹⁶ Na kau logo e mafai ke ke fakamatala le uiga o masau fakapulipuli ti mo le vevete o nea faigataa. I le lakaga nei, kapau e ke mafai ke ke lau le faitosi leinei ti mo ke fakamatala mai kiate au lona uiga, e fakakofu loa a koe ki le kofu kula, ti e fakatau loa se kasoa aulo ki lou ua, ti e ke maua loa le tuulaga tolu o le puleaga.

¹⁷ Na tali loa Taniela i mua o le sau : Taupau ou nea alofa, soli ki se tasi ake au moliga ; kae e kau lau loa le faitosi ki le sau, ti e kau fakamatala loa kiate ia lona uiga.

¹⁸ Ei sau, na soli e le Atua Taualuga ki lou tamana ko Nepukatenesale, le puleaga, mo le mauiga, mo le kololia, ti mo le logologona ;

¹⁹ O tupu ko le mauiga leia na tuku e le Atua Taualuga kiate ia, na i fuli a kakai, mo puleaga, mo tagata mei faasiga masau kesekese i ona mua. Na fakatotonu e le sau ke tamate latou ala e loto a ia ki ai, ti na tuku e ia le mauli kia latou ala na loto a ia ki ai ; na siki e ia ki aluga latou ala na loto a ia ki ai ; ti na tuku e ia ki lalo latou ala na loto a ia ki ai.

²⁰ Kae i le aso leia na fia nealasi ai a ia ti na fakafefeka ai e ia lona loto, na ti loa a ia ki lalo mei lona ekeekeaga fakasau, ti na too loa meiate ia lona kololia ;

²¹ Na kapu loa a ia mei loto malie o fanau o tagata, ti na liliu loa lona loto o tatau mo le loto o manu, ti na tuu fakatasi loa lona nofoaga mo leia o asino vao ; na soli loa kiate ia se mutie ke kai ofaipe pipi, ti na susu loa lona tino i le sasau o le lagi, o kaku ki lana iloa ko le Atua Taualuga leia e pule ki le pule a tagata, ti e soli e ia a ia ki leia e loto a ia ki ai.

²² Ti ko koe, Pelesatesale, lona vosa totonu, na leaise ke fakataulalo, logo ai na ke iloa a nea fuli ana.

²³ Na ke malaga ki aluga o agatuu ki le Aliki o le atu lagi ; ti na ke aumai a ipu o lona fale ki ou mua, ti na kotou inu ki ai le vino, e koe mo lau kau lalasi, mo au avaga, mo au feauaki ; na ke fakavikiviki ki atua siliva, mo aulo, mo kapa, mo ukamea, mo laakau, mo fatu, ala e leaise logo fua, e leaise tio fua, ti e leaise iloa fua se nea, kae na leaise ke fakakololiai le Atua leia e too ia i lona lima lau tukumanava ti mo ou ala fuli.

²⁴ Koia kua kakau mai e ia le potupotu o le lima lena, leia na tosi ia le nea lena.

²⁵ Ko leinei le nea leia kua tosi : Lau, lau, fua, ti vae.

²⁶ Ti ko leinei le uiga o kupu ana : Lau : kua lau e le Atua lou puleaga, ti kua fakagato e ia a ia.

²⁷ Fua : kua fua a koe i le fua, ti kua maua a koe e ke maamaa.

²⁸ Vae : kua vae lou puleaga, ti kua soli a ia ki le kau Meti mo le kau Pelesi.

²⁹ I le nea fai lena na fakatotonu loa e Pelesatesale ke fakatui kia Taniela le kofu kula, ke fakatau ki lona ua le kasoa aulo, ti na fakasa loa i le fenua e maua e Taniela le tuulaga tolu i le puleaga.

³⁰ I le po fai lena, na tamate loa Pelesatesale, sau o le kau Kaletea.

³¹ Ti na too loa e Taliusi, tagata Mete, le puleaga, i lona fetuu kau ono tupu lua.