Taniela 3 - Tosi Tapu

Kaukaunea o Taniela i le gutuumu kaka

¹ Na fai loa e le sau ko Nepukatenesale se fakatata aulo, ko lona taualuga ko meta e kau tolu, ti ko lona lau lasi ko meta e tolu. Na fakatuu loa e ia a ia i le potu laumalie o Tula, i le fenua o Papilone.

² Na fakatotonu loa e le sau ko Nepukatenesale ke fakatasi a aliki sau, mo le kau minisi, mo le kau kovana, mo le kau fono, mo le kau pule koloa, mo le kau poto o le lao, mo le kau tui fakamaau, ti mo le kau fakafofoga o fenua fuli, ki le fakatapu o le fakatata leia na fakatuu e le sau ko Nepukatenesale.

³ Ti na fakatasi loa le kau aliki, mo le kau minisi, mo le kau kovana, mo le kau fono, mo le kau pule koloa, mo le kau poto o le lao, mo le kau tui fakamaau, ti mo le kau fakafofoga o fenua fuli, ki le fakatapu o le fakatata leia na fakatuu e le sau ko Nepukatenesale. Na lotou tutuu loa i mua o le fakatata leia na fakatuu e Nepukatenesale.

⁴ Na kalaga loa le pule o le fakatasiga o leo lasi : Kakai, mo puleaga, mo tagata mei masau fuli, ko leinei le nea leia e fakatotonu atu kia koutou !

⁵ Ka kotou logo loa ki le leo o nea fai musika, mo le fakatagi pupusi, mo le salumo, mo le ukalele, mo le sapuke, mo le pesatelione, mo le konemuse, ti mo nea faimusika kesekese, e kotou punou loa ti e kotou atolasio loa ki le fakatata aulo leia na fakatuu e le sau ko Nepukatenesale.

⁶ Ko leia e leaise punou loa ti e leaise atolasio loa ki le fakatata e ti loa a ia i le temi fai lena ki se gutuumu kaka.

⁷ Koia ka logo ai loa a kakai fuli ki le leo o le fakatagi pupusi, mo le salumo, mo le ukalele, mo le sapuke, mo le pesatelione, mo le konemuse, ti mo nea faimusika kesekese, e punou loa le kakai katoa, mo puleaga, mo tagata mei masau fuli, o atolasio ki le fakatata aulo leia na fakatuu e le sau ko Nepukatenesale.

⁸ Kae i le temi totonu lena, na fakafeofi ake loa ni tagata Kaletea, o fakalakasala le kau Sutea.

⁹ Na lotou pati loa ki le sau ko Nepukatenesale : Ei sau, mauli o lee gato !

¹⁰ Na ke tuku se fakatotonu, o fakasa : ko latou fuli ala e logo loa ki le leo o le fakatagi pupusi, mo le salumo, mo le ukalele, mo le sapuke, mo le pesatelione, mo le konemuse, mo nea faimusika kesekese, e maua ke punou mo atolasio ki le fakatata aulo,

¹¹ ti ko leia e leaise punou loa ti e leaise atolasio loa, e ti loa a ia ki se gutuumu kaka.

¹² Ko leinei, e i ai ni tagata Sutea ala na ke tuku kia latou le pule o le fenua o Papilone, ko Satalake, mo Mesake, mo Apeteneko. Ko le kau tagata lena, ei aliki sau, e leaise fakaapaapa kiate koe ; e leaise lotou tausi ki ou atua ti e leaise lotou atolasio ki le fakatata aulo leia na ke fakatuu ia.

¹³ Koia na itaita veli ai loa Nepukatenesale, ti na fakatotonu loa e ia ke aumai Satalake, mo Mesake, mo Apeteneko. Ti na aumai loa a tagata ana ki mua o le sau.

¹⁴ Ti na masau loa Nepukatenesale, o pati kia latou : Pe maoki, Satalake, mo Mesake, mo Apeteneko, e leaise kotou tausi ki oku atua, ti e leaise kotou atolasio ki le fakatata aulo leia na kau fakatuu ia ?

¹⁵ I le lakaga nei, ke kotou teuteu ! ka kotou logo loa ki le leo o le fakatagi pupusi, mo le salumo, mo le ukalele, mo le sapuke, mo le pesatelione, mo le konemuse, ti mo nea faimusika kesekese, ke kotou punou loa o atolasio ki le fakatata leia na kau fakatuu ia ; kapau e leaise kotou atolasio loa ki ai, e ti loa koutou i le temi fai lena ki se gutuumu kaka. Ti ko le atua fea loa leia e saofaki ia loa koutou mei loku lima ?

¹⁶ Na tali loa Satalake, mo Mesake, mo Apeteneko ki le sau ko Nepukatenesale : E leaise aoga ke motou tali atu kiate koe o uiga mo le nea lena.

¹⁷ Ko leinei, ko lomatou Atua leia e motou tausi ki ai, e mafai loa ke saofaki e ia matou mei le gutuumu kaka, ti e saofaki loa e ia matou mei lou lima, ei aliki sau !

¹⁸ Kapau e leai, ke ke iloa, ei aliki sau, e leaise motou tausi loa ki ou atua, ti e leaise motou atolasio loa ki le fakatata aulo leia na ke fakatuu ia.

¹⁹ I le nea lena na toe veli ake loa le itaita o Nepukatenesale, ti na tio faikese loa ona mata kia Satalake, mo Mesake, mo Apeteneko. Na toe masau loa a ia o fakatotonu ke fakavevela le gutuumu o tua fitu ake lona makeke i le fai masani.

²⁰ Ti na fakatotonu loa e ia ki ni iki i le kau tagata makeke o lona kau solia ke saisai Satalake, mo Mesake, mo Apeteneko, ti ke ti latou ki le gutuumu kaka.

²¹ Ti na saisai loa a tagata ana mo olotou vavae, mo olotou kofu loloa, mo olotou taupulupulu ti mo la ake a kofu, ti na ti loa latou ki loto o le gutuumu kaka.

²² Na mamafa ai le fakatotonu a le sau, ti na vevela ai le gutuumu, o tamate ai loa e le ula o le afi a tagata ala na ti ia Satalake, mo Mesake, mo Apeteneko ki loto o le gutuumu.

²³ Ti na vivilo loa a tagata ana e toka tolu, ko Satalake, mo Mesake, mo Apeteneko, mo olatou saisai ki loto malie o le gutuumu kaka.

²⁴ Ti na oso loa le sau ko Nepukatenesale o tuu ki aluga i le lasi o lona i. Ti na pati loa a ia ki lana kau fono : Pe na leaise tou ti koia ki le afi ni tagata e toka tolu kua saisai ? Na lotou tali loa ki le sau : E io, ei aliki sau !

²⁵ Na toe pati loa a ia : Ko leinei, e kau tio ki tagata e toka fa, e leai ni olatou sai, ti e saele i loto malie o le afi, ti e leaise tasi fua ia latou kua vela sona ganea ; ti e fai le fa o tagata pe se Alo o le Atua.

²⁶ Ti na fakafeofi loa Nepukatenesale ki mua o le gutuumu kaka, ti na masau loa a ia, o pati : Satalake, mo Mesake, mo Apeteneko, tagata fakasausau a le Atua taualuga, kotou ulu mai ki fafo, ti kotou au ! Ti na mavae ake loa Satalake, mo Mesake, mo Apeteneko mei loto o le afi.

²⁷ Ti na fakatasi ake loa le kau aliki, mo le kau minisi, mo le kau kovana, ti mo le kau fono a le sau ; ti na lotou tio loa na leaise maua fua e le afi sona makeke ki tino o tagata ana, ti na leaise masunu fua olatou fului ulu, ti na leaise vela fua olatou vavae, ti na leaise tau fua le sauga o le afi kia latou.

²⁸ Ti na masau loa Nepukatenesale, o pati : Ke manuia le Atua o Satalake, mo Mesake, mo Apeteneko, leia na kakau ia mai lona aselo ti na saofaki ia ana tagata fakasausau ala na fanaki kiate ia, kae na maumaui ia le fakatotonu a le sau. Na lotou malie ia ake le momoli o olatou tino i lalatou tausi mo atolasio ki se tasi ake atua kese.

²⁹ I le aso nei, ko leinei le fakatotonu leia e kau fai : Ko tagata fuli, mo kakai fuli, mo puleaga, mo masau fuli, e masau veli loa ki le Atua o Satalake, mo Mesake, mo Apeteneko, e tutuuti loa, ti e fakaliliu loa lona fale ko se tuuga penu, talie e leaise tasi ake atua leia e feala ke saofaki ia ofaipe ia.

³⁰ I le oki o le nea lena, na siki loa e le sau Satalake, mo Mesake, mo Apeteneko ki ni tuulaga mauiga i le fenua o Papilone.