Taniela 2 - Tosi Tapu

Le moe miti a Nepukatenesale

¹ I le fetuu lua o le sau ko Nepukatenesale, na fai loa e Nepukatenesale ni moe miti. Ti na mamae ai loa lona loto, ti na mavae ai loa le fia moe iate ia.

² Koia na kalagai ai loa e le sau le kau fai nea fakatalatupua, mo latou ala e sivi ia le anoaga o le temi, mo latou ala e fai nea fakatemonio, ti mo le kau Kaletea, ke lotou fakasa ake kiate ia ana moe miti. Na lotou au loa, o tuu i mua o le sau.

³ Ti na pati loa le sau kia latou : Na kau fai se moe miti ; ti e mamae loku loto, ti e kau loto ke kau iloa le moe miti lena.

⁴ Ti na tali loa le kau Kaletea ki le sau i le masau fakaalamea : Ei sau, ke ke mauli o lee gato ! Fakamatala mai le moe miti ki au tagata fakasausau, ti e motou fakasa atu loa kiate koe lona uiga.

⁵ Ti na toe masau loa le sau, o pati ki le kau Kaletea : E leaise koi kau manatui a ia ; kapau e leaise kotou fakamatala mai kiate au le moe miti mo lona uiga, e tuutuu fakalikiliki loa koutou, ti e fakaliliu loa okoutou fale ko ni tuuga penu.

⁶ Kae kapau e kotou fakasa mai kiate au le moe miti mo lona fakamatala, e kau soli loa kia koutou ni nea alofa, mo ni totogi, ti mo ni tuulaga mauiga. Koia kotou fakamatala mai ai kiate au le moe miti mo lona uiga.

⁷ Ti na lotou toe tali loa ki le sau o tua lua : Ke fakamatala mai fua e le sau le moe miti ki ana tagata fakasausau, ti e motou fakasa loa lona uiga.

⁸ Ti na toe masau loa le sau, o pati : E kau iloa fakapapau nei e kotou faiga ke maua se temi, talie e kotou tio kua puli le nea iate au.

⁹ Koia kapau ai e leaise kotou fakasa mai kiate au le moe miti, ko le tua leia kua fakatotonu e vilo loa kia koutou fuli. E kotou loto ke teuteui ni kaka mo ni loi ala ke kotou fakasa mai kiate au, o fakalogologo ke fetogi le temi. Koia kotou fakamatala mai kiate au le moe miti, ti e kau iloa loa pe kotou mafai ia le fakamatala o lona uiga.

¹⁰ Na tali loa le kau Kaletea ki le sau : E leaise tagata ai i le malama nei e mafai ia ke fakasa le nea leia e kole e le sau ; ti na leikiaise sau e tasi, pe lasi feaki lona pule mo lona makeke, kua fakamaua ia se nea felaaki ki se masi, pe ko se tagata sivi fetuu pe ko se Kaletea.

¹¹ E faigataa le nea leia e kole e le sau, e leaise feala ke fakasa e se tasi le nea lena ki le sau, e gato tasi ki atua, ala e leaise tuu lolatou nofoaga i lotolotoga o tagata.

¹² I le nea lena na itaita lasi le sau. Ti na fakatotonu loa e ia ke tamate le kau poto fuli o Papilone.

¹³ Na logologo loa le fono lena a le sau i le fenua, ke tamate le kau poto, ti na afa loa a Taniela mo ona kaukaunea ke tamate.

¹⁴ Ti na masau fakapoto loa Taniela kia Alioke, pule o le kau polisi a le sau, leia na au ke tamate ia le kau poto o Papilone.

¹⁵ Na masau loa a ia, o pati kia Alioke, pule o le kau leo a le sau : Kolea e mamafa ai le fono a le sau ? Ti na fakamatala loa e Alioke le nea kia Taniela.

¹⁶ Ti na ano loa Taniela ki le fale o le sau, o kole kiate ia se temi leia ke tuku ai ki le sau le fakamatala.

¹⁷ Ti na ano loa Taniela ki lona fale, o fakasa le nea lena ki ona kaukaunea ko Anania, mo Misaele, mo Asalia ;

¹⁸ O tupu ke lotou kole le manava alofa o le Atua o le atu lagi, talie ke aua na tamate a Taniela mo ona kaukaunea, o fakatasi mo le kau poto o Papilone.

¹⁹ Ti na fakasa loa le nea fakafufu kia Taniela, i se tio i le pouli. Ti na fakafetai loa Taniela ki le Atua o le atu lagi.

²⁰ Na masau loa Taniela, o pati : Ke fakafetai ki le suafa o le Atua, o lee gato mo lee gato ! A ana le poto mo le makeke.

²¹ Ko ia leia e fetogi ia a temi mo anoaga o nea, ko ia leia e fakaifo ia mo fakanofo ia a sau, leia e tuku ia le poto ki le kau poto mo le iloa o nea kia latou ala e maua ia se atamai.

²² E fakasa e ia le nea leia e loloto mo munia, e iloa e ia le nea leia e tuku i le fakapouli, ti e iate ia le malama.

²³ Atua o oku tamana, e kau fakakololia kiate koe, ti e kau fakavikiviki kiate koe i lau soli mai kiate au le poto mo le makeke, ti mo lau fakasa mai kiate au le nea leia na motou kole atu kiate koe, ti mo lau fakasa mai kia matou le nea fakapulipuli a le sau.

²⁴ I le oki o le nea lena, na ano loa Taniela kia Alioke, leia na fakatotonu ki ai e le sau ke tamate ia le kau poto o Papilone ; na ano loa a ia, o masau feneeki kiate ia : Aua na ke tamate le kau poto o Papilone ! Taki au ki mua o le sau, ti e kau soli loa ki le sau le fakamatala o lana moe miti mo lona uiga.

²⁵ Na taki fakatavili loa e Alioke a Taniela ki mua o le sau, ti na masau feneeki loa a ia ki le sau : Kua kau maua i le kau popula o Suta se tagata leia e soli ia loa ki le sau le fakamatala o lana moe miti mo lona uiga.

²⁶ Ti na masau loa le sau, o pati kia Taniela, leia na igoa ko Pelesatesale : Pe mafai ke ke fakamatala mai kiate au le moe miti mo lona uiga ?

²⁷ Na tali loa Taniela i mua o le sau, o pati : Ko le nea leia e kole e le sau ko se nea fakafufu, ti e leaise mafai e le kau poto, mo le kau sivi fetuu, mo le kau masi, mo le kau kikite, ke fakamatala ia ki le sau.

²⁸ Kae e i ai i le lagi se Atua leia e fakasa ia a nea fakafufu, ti kua fakasa e ia ki le sau ko Nepukatenesale le nea leia ka soko mai loa i temi ki muli. Ko leinei lau moe miti mo nea ala na ke tio ki ai i lou moeaga.

²⁹ Ei sau, i lou moeaga, na ke fakakaukau o uiga mo le temi leia ka soko mai ; ti ko leia e fakasa ia a nea fakafufu na fakasa ia kiate koe le nea leia ka soko loa.

³⁰ Kapau kua fakasa le nea fakafufu lena kiate au, e leaise tupu e iate au se poto leia e lasi ake i le poto o tagata mauli fuli ; kae e tupu ke fakasa le fakamatala o le moe miti mo lona uiga ki le sau, ti ke iloa e koe a fakakaukau o lou loto.

³¹ Ei sau, na ke tio, ti na ke tio ki se fakatata lasi ; io, na lasi kese ai le fakatata lena mo gigila ; ti na tuu a ia i ou mua, ti na fakaii ai ona mata.

³² Na aulo le fa ulu o le fakatata ; na siliva ona lima ; na sila lona manava mo ona tega ;

³³ na ukamea ona vae ; ti ko ona taga vae, na ukamea le tasi a koga, kae na kele le tasi a koga.

³⁴ Na ke tio ki le fakatata lena, ti na fokifa fai kua matata mai se fa fatu, leia na leaise tokoi ki ai se lima, ti na taai loa e ia a vae ukamea mo kele o le fakatata, o momomomo.

³⁵ Ti na fatifati fakatasi loa le ukamea, mo le kele, mo le sila, mo le siliva, mo le aulo, ti na lotou liliu loa ofaipe le penu leia e agina mei le sasaaga fulumeto i le temi vevela. Na ave loa a ia e le matagi, ti na leaise toe maua loa se nea i le ganea lena. Kae ko le fa fatu leia na taai ia le fakatata na liliu loa ko se mauga lasi, ti na fakaapele loa e ia le malama nei katoa.

³⁶ Ko lena le moe miti. E motou fakamatala loa lona uiga i mua o le sau.

³⁷ Ei sau, ko le sau a koe o atu sau, talie kua soli kiate koe e le Atua o le atu lagi le puleaga, mo le pule, mo le makeke, mo le kololia ;

³⁸ kua toe soli foki e ia ki ou lima, i ganea fuli ala e lotou nonofo ai, a fanau a tagata, mo manu o le vao, mo manu lele o le lagi, ti kua tuku e ia kiate koe le pule kia latou fuli : ko koe leia ko le fa ulu aulo.

³⁹ I ou muli, e malaga ake loa ki aluga se tasi puleaga, leia e ikiiki ake i lou puleaga ; ti mo se tolu puleaga, leia e sila loa, ti e pule loa ki le malama nei katoa.

⁴⁰ E i ai loa se fa puleaga, leia e makeke loa ofaipe le ukamea ; ofaipe le ukamea leia e fatifati ia mo motumotusi ia a nea fuli, e fatifatii loa mo motumotusi loa e ia nea fuli, ofaipe le ukamea leia e gugu ia a nea fuli.

⁴¹ Ti e faipe lau tio foki ki vae mo maikao e koga ki le kele ti koga ukamea, e mavetevete loa le puleaga lena ; kae e iate ia loa se nea leia e maua ia le makeke o le ukamea, talie na ke tio kua filo le ukamea mo le kele.

⁴² Ofaipe maikao o vae ala na koga ukamea ti koga kele, e makeke loa le tasi fetuu o le puleaga lena kae e gaegae loa le tasi fetuu.

⁴³ Na ke tio foki ki le ukamea kua filo mo le kele, talie e la filo loa ki ni sai fakatagata ; kae e leaise la pipiki tasi loa, ofaipe le ukamea leia e leaise mafai ke pipiki tasi mo le kele.

⁴⁴ I le temi o sau ana, e fakatupu loa e le Atua o le atu lagi se puleaga leia e leaise toe maumaui loa i se aso, ti e leaise toe tuku loa ki le pule a se tasi ake puleaga ; e fatifatii loa e ia, ti e maumaui loa e ia a la ake puleaga fuli, kae e tuu loa a ia totonu, o lee gato.

⁴⁵ Ko lena le uiga o le fa fatu leia na ke tio na mataaki mei le mauga ti na leaise tokoi ki ai se lima, leia na momoi ia le ukamea, mo le sila, mo le kele, mo le siliva, mo le aulo. Kua fakasa e le Atua lasi ki le sau le nea leia ka soko loa ki muli. E maoki le moe miti, ti e maoki lona fakamatala.

⁴⁶ Ti na fakamapee loa le sau ko Nepukatenesale o fakatau ona mata ki le kele, o punou i mua o Taniela, ti na fakatotonu loa e ia ke momoli kia Taniela ni failaulau mo ni kaloni.

⁴⁷ Ti na masau loa le sau kia Taniela, o pati : E maoki, ko lokoutou Atua ko le Atua a ia o atu atua ti ko le Aliki a ia o atu sau, ti e fakasa e ia a nea ala e fufu, talie kua ke mafai ia le fakasa o le nea fakafufu leinei.

⁴⁸ Ti na siki loa e le sau ki aluga Taniela, ti na soli loa e ia kiate ia ni nea alofa mauiga mo lasi ai ; na soli loa e ia kiate ia le pule o le fenua katoa o Papilone, ti na fakanofo loa e ia a ia ko le pule lasi o le kau poto fuli o Papilone.

⁴⁹ Na kole loa e Taniela ki le sau ke tuku ake le pule o le fenua o Papilone kia Satalake, mo Mesake, mo Apeneteko. Kae na nofo loa Taniela i le matapa o le sau.