Taniela 12 - Tosi Tapu

Ko temi fakamuli

¹ I le temi aia, e tuu ake loa Misaele, ko le pule lasi, ko le taupau o fanau o lou kakai ; ti e soko loa se temi mamae lasi ai, leia e leikiaise sona tatau talu mei le tuu o atu puleaga o kaku mai ki le temi nei. I le temi aia, ko latou ala o lou kakai e maua loa na tosi i le tosi e fakamauli loa.

² Ko se toka api o latou ala e momoe i le kele, e aala ake loa, ko iki ki le mauli lee gato ti ko iki ki le luma mo le nukinuki lee gato.

³ Ko latou ala na popoto e gigila loa ofaipe le malama o le lagi, ti ko latou ala na ako ia le faitotonu ki le kakai e gigila loa ofaipe fetuu o le lagi, o lee gato.

⁴ Ko koe Taniela, taupau fakafufu a folafola anei, ti ke fakamau le tosi o kaku ki le temi fakamuli. I le temi loa lena, e lau loa e se kakai i le tosi, ti e tupu loa le poto o lasi.

⁵ Ti ko au, Taniela, na kau tio, ti ko leinei, na tutuu ni iki ake tagata e toka lua i laugutu o le vaitafe, ko le tasi i le tasi kauvai ti ko le tasi i leia ake kauvai o le vaitafe.

⁶ Na pati loa le tasi ia laua ki le tagata kofu tea, leia na tuu i aluga o vai o le vaitafe : Ko afea loa e soko ai le fakaoki o nea fakaofolele ana ?

⁷ Ti na kau logo loa ki le tagata kofu tea, leia na tuu i aluga o vai o le vaitafe ; na siki loa e ia ki le lagi lona lima atamai mo lona lima sema, ti na fakapapau loa a ia i leia e mauli o lee gato, e soko loa i se temi, mo ni temi, ti mo se vaeluai temi, ti e oki loa nea fuli ana i le aso leia e fatifatii ai loa le makeke katoa o le kakai maokioki.

⁸ Na kau logo loa, kae na leaise kau matala loa ; ti na kau pati loa : Loku aliki, kolea loa le fakaoki o nea fuli ana ?

⁹ Na tali loa a ia : Ano, Taniela, talie e taofi fakafufu loa a folafola anei ti e fakamau loa latou o kaku ki le temi fakaoki.

¹⁰ E toka api loa latou ala e fakamea loa, mo fakatetea loa, ti mo asiasii loa. E soko atu loa e le kau agatuu le fai o le veli, talie leaise lotou matala fua ki se nea, kae e matala loa latou ala e atamai.

¹¹ Mei le temi leia e fakagato ai loa le failaulau o aso taki tasi, ti e fakatuu ai loa i le aletale le fakalialia a le tagata maumau, e i ai loa ni aso e afe kau lelau lua kau iva.

¹² Manuia leia e talitali loa, ti e kaku loa ki le fakaoki o aso e afe kau lelau tolu kau tolu tupu lima !

¹³ Ti ko koe, Taniela, ke ke saele ki le gatoaga. Ti e ke malolo loa, ti e ke tuu ake loa ki lou fakapale i le fakaoki o aso.