Taniela 11 - Tosi Tapu

Tau a le puleaga o le noleto mo le puleaga o le saute

¹ Ti ko au, i le uluaki fetuu o Taliusi, tagata Mete, na kau nofo i ona tafa o tokoi kiate ia mo fakamakeke a ia.

² I le aso nei, e kau fakasa kiate koe le maoki. Ko leinei, e toe maua loa ni sau e tolu i Pelesi. Ko le fa o sau e tanaki ia loa ni koloa o lasi ake ia latou fuli ala na muamua ; ti ka kaku loa a ia o makeke, o tupu ko ona koloa, e fai loa e ia a nea fuli ke taui ai le puleaga o Sava

³ Kae e malaga loa se sau toe i Sava, leia e pule loa ki se puleaga lasi, ti e fai ia loa le nea leia e loto a ia ki ai.

⁴ Kae ka taualuga loa a ia, e maumaui loa lona puleaga, o mavetevete ki potu matagi e fa ; e leaise maua loa lona puleaga e ona sakoga, talie e vaevae loa lona puleaga e ni kakai kese ake, kae e leaise maua loa e puleaga ana le makeke leia na nofo mo ia.

⁵ E liliu loa le sau o le saute o makeke lasi. Kae e toe makeke ake loa iate ia se tasi i ana tagata pule tau, ti e pule loa a ia ; ti e makeke loa lana pule.

⁶ I le oki o ni fetuu, e la fakatasi loa, ti e avaga loa le taine o le sau o le saute mo le sau o le noleto, o fakamaoki ai le sai mo ia. Kae e leaise taupau loa e le taine le makeke o lona lima, ti e leaise mauli loa lona avaga totonu, tatau mo lola fanau. Ti e mate loa le taine, mo lona kau kaiga, mo lona tamana, mo lona avaga leia na tokoi kiate ia i le temi lena.

⁷ E somo ake loa se uli i ona aka o too lona tuulaga ; ti e au loa a ia o fakaii le kau tau o le sau o le noleto, i ona kolo tau. E taui loa e ia le kau tau lena, o malo.

⁸ E too loa e ia o ave ki Esipito a atua, mo olatou fakatata ukamea, mo aulo, mo siliva. Ti e nofo loa a ia i ni fetuu, o mamao mei le sau o le noleto.

⁹ Kae e ifo loa le sau o le Noleto o taui le puleaga o le sau o le saute, ti e toe liliu loa a ia ki lona fenua.

¹⁰ Ko vosa o le sau o le potu noleto e teuteu ia loa se tau. E lotou tanaki loa ni kau tau lasi. E ano loa se tasi o vosa ke tau mo lana kau tau. Ti e lotou mafola loa ofaipe se vaitafe leia kua puke. Kae i lana toe liliu ki lona fenua, e soko atu loa e ia le tau o kaku ki le kolo tau o le sau o le saute.

¹¹ E ita loa le sau o le saute, leia e au loa mei lona fenua o taui le sau o le noleto ; e lagai loa e ia se kakai i, ti e tuku loa ki ona lima a solia a le sau o le noleto.

¹² E fia nealasi loa le kakai i lena, ti e fia nealasi loa le loto o le sau ; kae logo ai le lau i afe mo afe o solia, e tamate loa latou, e leaise malo loa a ia.

¹³ Talie e toe tanaki loa e le sau o le noleto se kau tau leia e toe lasi ake i le uluaki kau tau. E sili loa ki ai ni fetuu, ti e saele loa a ia mo se kau tau lasi ti mo ni masafu tau ala e toe lasi ake.

¹⁴ I le temi lena, e agatuu loa se kakai i ki le sau o le saute. Ti e agatuu loa ni tagata agaitaita i lou kakai, Taniela, o tupu ke fakasoko ai le nea leia kua ke tio ki ai, kae e lotou mamate loa.

¹⁵ E saele loa le sau o le noleto, ti e fakatuu loa e ia ni fata ke taui ai a kolo tau, ti e maua loa e ia latou. E leaise feala loa ke tuu a kau tau a le sau o le saute mo lana kau solia makeke : E leaise maua loa solatou makeke ke tuu i mua o le sau o le noleto.

¹⁶ E tau loa le sau o le noleto kiate ia, ti e fai loa e ia le nea leia e loto a ia ki ai, ti e leaise tuu loa se tasi i ona mua ; e nofo loa a ia i le fenua manuia, o tamate a nea fuli ala e vilo ki lona lima.

¹⁷ E fai loa e ia se tonu ki le sau o le saute, ke ifo mai a ia mo makeke fuli o lona puleaga, ke lotou fakatokatoka ; e soli loa e ia lona taine ke avaga mo le sau o le saute, mo le amanaki malie ke maumaui lona puleaga, kae e leaise soko loa le puleaki kaka lena.

¹⁸ E ave loa ona mata ki fenua o le mata tai, ti e maua loa e ia se i ; kae e fakagato loa e se pule tau lana agaveli ti e fakalumai loa a ia.

¹⁹ Ti oki a ia, e ano loa a ia ki kolo tau o lona fenua totonu ; kae e siga loa a ia o vilo, ti e leaise toe maua loa a ia.

²⁰ E kakau loa e lona fetogi se tagata maumau ke ano o maumaui le fenua fulumalie o le puleaga ; kae i le sili o ni ga aso teiki, e fatii loa a ia, ti e leaise maumaui loa a ia o tupu ko se ita pe ko se tau.

Le fakakelekele o le sagatualio

²¹ E too loa lona tuulaga e se tagata noa, kae na leaise kau a ia ki le tuulaga fakasau. E sa loa a ia i loto malie o le tokamalie, o too le puleaga ki ni puleaki kaka.

²² E leaise feala ke tuu loa se solia i ona mua, e maumaui loa e ia a solia fuli, ti e tamate loa e ia se tasi a pule o le sai.

²³ I le oki o le fai o ni fakapapau mo ia, e fai loa e ia ni puleaki kaka ; e saele loa a ia ki le tau ti e malo loa a ia mo se ga kakai lavaki fua.

²⁴ E ulu loa a ia i le tokamalie ki fenua malilie o le puleaga, ti e fai loa e ia le nea leia na leaise fai e ona tamana, pe ko ona tupuna ; e tufa loa e ia le koloa o le tau ki lana kakai. E fai loa e ia ni fakatuutuu ki kolo tau ; ti e fai loa e ia a nea fuli ana i se ga temi noa.

²⁵ E taki loa e ia se kau tau lasi, ti e fakaaoga loa e ia lona makeke mo lona toe ki le sau o le saute. Ti e tau loa le sau o le saute kiate ia mo se kau tau i mo makeke, kae e leaise makeke loa a ia, talie e fai loa ni fakatuutuu veli kiate ia.

²⁶ Ko latou totonu ala e kai mo ia ki nea kai o lona laupapa e kakaai ia loa a ia ; ti e mavetevete loa lana kau solia ofaipe se vaitafe, ti e vivilo loa o mamate se toka api.

²⁷ E afa loa e sau ana e lua i ola loto ke fai se veli, ti e la femasauaki loa i le laupapa e tasi i le kaka. Kae e leaise manuia loa a ia, talie koi soko loa le fakaoki i le temi leia kua fakatuutuu.

²⁸ E toe liliu loa le sau o le noleto ki lona fenua mo se koloa lasi. E vesia loa a ia i lona loto ki le kakai o le sai maokioki, ti e fakafesagai loa a ia ki ai, ti e toe liliu loa a ia ki lona fenua i le fakaoki.

²⁹ I se temi kua oki i le fakatuutuu, e toe liliu mai loa le sau o le noleto o taui le puleaga o le saute, ti e leaise toe soko loa a nea i le faiaga lena o tatau mo le uluaki faiaga.

³⁰ E au loa ni vaka mei Kitimi, o taui a ia ; ti e loto gaegae loa a ia, o toe liliu. I lona itaita ki le sai maokioki, e leaise nofo noa loa a ia ; kae e toe fulusi loa e ia ona mata kia latou ala e leaise taupau ia loa le sai maokioki.

³¹ E au loa ni solia i lana fakatotonu ; ti e lotou fakakelekele loa le fale tapu, mo le kolo tau, ti e lotou taofi loa le failaulau o aso taki tasi, ti e lotou fakatuu loa ki le aletale le fakatata fakalialia o le tagata maumau.

³² E fakasesei loa e le sau lena, ki ana kaka, latou ala e tiaki ia le sai maokioki. Kae ko latou ala o le kakai e iloa ia loa lolatou Atua, e tuu makeke loa,

³³ ti ko latou ala e popoto i le kakai, e ako ia loa se kakai toka api. E i ai loa ni iki e vilo loa, i se ga temi, i le seleta, mo le afi, mo le pilisoni, ti mo le fakamakeke.

³⁴ I le temi leia e lotou vivilo ai loa, e lotou maua loa se ga tokoi ikiiki, ti e pipiki loa le i kia latou i le malualoi.

³⁵ Ti e mamate loa ni iki o le kau poto, o tupu ke fakamea latou, mo fakagigila, mo fakatea, o kaku ki le temi o le fakaoki, talie koi soko loa a ia i lona temi leia kua fakatotonu ki ai.

³⁶ E fai loa e le sau le nea leia e loto a ia ki ai ; e malaga loa a ia ki aluga, ti e fia tuu loa a ia i aluga o atua fuli, ti e fai loa e ia ni masau fakavale ki le Atua o atua ; ti e manuia loa a ia o kaku ki le katoa o le sausau o le Atua, talie e soko loa le nea leia kua fakatuutuu.

³⁷ E leaise tokaga loa le sau lena ki atua o ona tamana, pe ko le atua leia na oli ki ai a fafine ; e leaise tokaga loa a ia ki se atua, talie e fia taualuga ake loa a ia i atua fuli.

³⁸ Kae e fakaapaapa loa a ia ki le atua o kolo tau, leia na leaise iloa e ona tamana ; e momoli loa e ia kiate ia se aulo mo se siliva, mo ni fatu mauiga ti mo ni iki ake a nea mauiga.

³⁹ E kau loa a ia mo le atua matapule lena o taui a kolo tau ; ti e fakamauiga loa e ia latou ala e fakamaoki ki le atua lena, ti e tuku loa e ia kia latou le pule ki se toka api, ti e tufa loa e ia kia latou ni kele ko lolatou fakapale.

⁴⁰ I le temi o le fakaoki, e toe malaga loa le sau o le saute kiate ia. Kae e oso loa le sau o le noleto kiate ia ofaipe se afa makeke, mo ni saliote, mo ni tagata ekeosi, ti mo se fua vaka tau lasi ; ti e ulu loa le sau o le noleto mo lana solia ki ni fenua mauke, ti e mafolafola loa a ia ofaipe se vaitafe leia kua puke.

⁴¹ E ulu loa a ia ki le fenua manuia, ti e mamate loa se toka api ; kae e saofaki loa Etome, mo Moape, ti mo pule o fanau a Amone, i lona lima.

⁴² E falo loa e ia lona lima ki fenua kesekese, ti e leaise sao loa le fenua o Esipito.

⁴³ E soko loa a ia o pule ki koloa aulo mo siliva, ti mo nea mauiga fuli o Esipito ; ti e muli loa le kau Lipia mo le kau Etiopia iate ia.

⁴⁴ Kae e kaku mai loa ni logo mei le esite mo le noleto, o fakaii kiate ia, ti e ano loa a ia mo se ita lasi, o maumaui mo tamate se kakai toka api.

⁴⁵ E fakatuu loa e ia ona falela fakasau i le vasa o le tai mo le mauga tapu o le fenua manuia. Ti e kaku loa a ia ki lona fakaoki, kae e leaise tokoi fua se tasi kiate ia.