Taniela 10 - Tosi Tapu

Le tio o le kololia o le Atua

¹ I le fetuu tolu o Silusi, sau o Pelesi, na fakasa loa se folafola kia Taniela, leia na fakaigoa ko Pelesatesale. Ko le folafola lena, leia ko se folafola maoki, e fakasa ia se malaia lasi. Na tokaga loa a ia ki le folafola lena, ti na matala loa a ia ki le uiga o le tio.

² I le temi lena, ko au, Taniela, na kau nofo loa i le mamae i ni vasaa e tolu.

³ Na leaise kau kai loa se nea kai malie, ti na leaise ulu loa se kanoi manu pe ko se vino ki loku gutu, ti na leaise kau pani loa se lolo o kaku ki le oki o vasaa ana e tolu.

⁴ I le aso kau lua tupu fa o le uluaki masina, na kau nofo loa i tafa o le vaitafe lasi ko Itekele.

⁵ Ti na tio loa oku mata ki aluga, ti na kau tio loa, ti ko leinei, na i ai se tagata kua teu ki se kofu tea, ti na nonoa i ona vakavaka se kilii pipi aulo mei Ufasi.

⁶ Na tatau lona tino mo le kilisolite, ti na gigila ona mata ofaipe le uila, ti na tatau ona mata mo ni ulai afi, ti na tatau ona lima mo ona vae mo le sila momole, ti na tatau lona leo mo le logoa o se kakai lasi.

⁷ Ko au Taniela, na kau tio toka tasi ki le nea lena, ti ko tagata ala na nonofo mo au na leaise tio ki ai, kae na lotou maua se i lasi, ti na lotou sosola loa o mumuni.

⁸ Na kau nofo toka tasi loa, o tio ki le nea lasi lena kua sa mai kiate au ; na leaise koi kau maua soku makeke, ti na fetogi loa oku mata i le lasi o loku i, ti na puli katoa loa loku makeke.

⁹ Na kau logo loa ki ana masau ; ti i laku logo ki ana masau, na kau siga loa o fakapulou oku mata ki le kele, ti na kau mata fakapouli loa.

¹⁰ Ti ko leinei, na fafa mai loa se lima kiate au, o lu oku tuli mo oku lima.

¹¹ Na pati mai loa a ia kiate au : Taniela, tagata alofaina, tokaga ki le folafola leia e kau fakasa loa kiate koe, tuu ki aluga i le ganea lena e ke nofo ai ; talie kua kakau mai au i le lakaga nei kiate koe. I le oki o lana masau mai kiate au, na kau tuu lulu loa ki aluga.

¹² Na pati mai loa a ia kiate au : Taniela, aua na ke i ki se nea ; talie talu mei le uluaki aso leia na ke loto ai ke ke matala, ti na ke fakataulalo ai i mua o lou Atua, na logo a ia ki au masau, ti ko au masau ala kua tupu ai laku au.

¹³ Kae na fakatutuu le pule o le puleaga o Pelesi kiate au i aso e kau lua tupu tasi ; kae ko leinei, ko Misaele, ko se tasi o le kau pule lalasi, kua au o tokoi mai kiate au, ti na kau nofo loa i ai i tafa o sau o Pelesi.

¹⁴ E kau au i le lakaga nei o fakasa kiate koe le nea leia e tonu ke soko ki lou kakai i le temi ki muli ; talie ko le nea leia e ke tio ki ai e toe uiga foki mo le temi lena.

¹⁵ I le lolotoga o lana fakasa mai kiate au o masau ana, na tio loa oku mata ki le kele, ti na leaise mafai loa kau masau.

¹⁶ Ti ko leinei, ko se tasi leia na faipe se vosa o le tagata na fafa loa ki oku laugutu. Na fakamavaa loa e ia loku gutu, ti na kau masau loa, o pati ki leia na tuu i oku mua : Ei loku aliki, kua kau i lasi ai i le nea leia kua kau tio ki ai, ti kua puli loku makeke katoa.

¹⁷ E feaki loa le mafai o le masau a le tagata fakasausau a loku aliki ki loku Aliki ? Ko leinei kua puli loku makeke, ti e leaise koi mafai laku tukumanava.

¹⁸ Ti ko leia na faipe se vosa o le tagata na toe fafa mai loa kiate au, ti na fakamakeke loa e ia au.

¹⁹ Ti na pati mai loa a ia kiate au : Aua na ke i, tagata alofaina, ke iate koe le tokamalie ! Loto makeke ! Loto makeke ! I le lolotoga o lana masau mai kiate au, na kau toe maua loa loku makeke, ti na kau pati loa : Ke masau loku Aliki, talie kua ke fakamakeke au.

²⁰ Na pati mai loa a ia kiate au : E ke iloa pe kolea le tupuaga o laku au kiate koe ? I le aso nei e kau toe liliu o taui le pule o Pelesi ; ti ka kau ano loa, e au loa le pule o Sava.

²¹ Kae e kau loto ke fakasa atu kiate koe le nea leia kua tosi i le tosi o le maoki. E leaise tokoi mai se tasi kiate au kia latou ana, gato ko Misaele, lokoutou pule.