Taagapati 9 - Tosi Tapu

Ko le kalaga ki le poto

¹ Na fakatuu e le poto lona fale, Na ta e ia ona fa pou e fitu.

² Na tamate e ia ana vikitima, na sui e ia lana vino, Ti na teuteu e ia lona laupapa kai.

³ Na kakau e ia lana kau fafine fakasausau ; e kalaga a ia I tumutumu o potu taualuga o le kolo :

⁴ Ko leia e valea, ke ulu mai ki leinei ! E pati a ia kia latou ala e sala atamai :

⁵ Kotou au, kotou kai ki laku pane, Ti kotou inu ki le vino leia na kau sui ;

⁶ Kotou mavae i le valea, ti e kotou mauli loa ; Ti kotou saele i le ala o le atamai !

⁷ Ko leia e valoki ia le tagata gologolo e aumai ia le luma kiate ia, Ti ko leia e fakatonutonu ia le tagata agaveli e tali ia le lauveli.

⁸ Aua na ke valoki le tagata gologolo, na vesia a ia kiate koe ; Valoki le tagata poto, ti e alofa loa a ia kiate koe.

⁹ Soli ki le tagata poto, ti e liliu loa a ia o toe asili poto ; Ako le tagata faitotonu, ti e fakalasi loa e ia lona iloa.

¹⁰ Ko le kamataaga o le poto, ko le i ki le Eteleno ; Ti ko le iloa a le kau sagato, ko le atamai.

¹¹ Ko au leia e liuliuga ia loa ou aso, Ti e fakalasiia loa a fetuu o lou mauli.

¹² Kapau e ke poto, e ke maua loa le fua o lou poto ; Ti kapau e ke gologolo, ti e ke amo loa lona veli e koe toka tasi.

¹³ Ko le valea ko se fafine logoa, E leaise fakakaukau a ia, ti e leaise iloa e ia se nea.

¹⁴ E tonatona a ia i le matapa o lona fale, I se ekeekeaga, i potu taualuga o le kolo,

¹⁵ O kalaga ki le kakai leia e fakalaka, Ala e ano fakaagatonu i le ala :

¹⁶ Ko leia e valea, ke ulu mai ki leinei ! E pati a ia ki leia e sala atamai :

¹⁷ E sua malie a vai ala na kaia, Ti e kano malie le pane leia na kai fakafufu !

¹⁸ Kae e leaise iloa e ia ko le ganea lena e nofo ai le kau mate, Ti e ifo latou ala na fakaafe e ia ki vaivailiua o le nofoaga o le kau mate.