Taagapati 8 - Tosi Tapu

Ko nea malilie mo gaoi a le poto

¹ Ko le poto, pe leaise kalaga a ia ? Ko le atamai, pe leaise siki e ia lona leo ?

² E tuu a ia i tumutumu o ganea taualuga, o ofi ki le ala, E tuu a ia i le fetaulakiaga o ala ;

³ I tafa o matapa, i le uluaga o le kolo ; I loto o matapa, e kalaga a ia :

⁴ Tagata, ko koutou ala e kau kalaga ki ai, Ti e masau loku leo ki vosa o le tagata.

⁵ Kau valelea, kotou ako le tio fakapoto ; Kau sala atamai, kotou ako le tio iloa.

⁶ Kotou fakalogo, talie e kau maua ni nea lalasi ke fakasa atu kia koutou, Ti e kau fakamavaa oku laugutu ke ako atu le nea leia e totonu.

⁷ Talie e fakasa e loku gutu le maoki, Ti e fakalialia oku laugutu ki le loi ;

⁸ E totonu masau fuli o loku gutu, E leaise nea fua ia latou e sala pe piko ;

⁹ E matala gaofie latou ki leia e atamai, Ti e lotou totonu kia latou ala kua maua ia le iloa.

¹⁰ Kotou filifili aku akonaki i le paaga, Ti mo le iloa i le aulo mea ;

¹¹ Talie e malie ake le poto i fuai kasoa, E mauiga ake a ia i nea totogi veli fuli.

¹² Ko au, le poto, ko loku nofoaga ko le tio malama, Ti e kau maua le iloa o le fakakaukau.

¹³ Ko le i ki le Eteleno, ko le vesia a ia ki le veli ; Ko le fia nealasi mo le fia taualuga, ko le ala a ia o le veli ; Ti ko le gutu veli, ko lena le nea e kau vesia ki ai.

¹⁴ A aku le tokoi mo le manuia ! Ko le atamai ko au, a aku le makeke.

¹⁵ Iate au e nofo ai a sau, Ti e fakatotonu ai e le kau pule le nea leia e totonu.

¹⁶ Iate au e lagiaki ai a pule, Mo le kau lalasi, ti mo le kau tui fakamaau fuli o le malama nei.

¹⁷ E kau alofa kia latou ala e alofa kiate au, Ti e kau maua e latou ala e afa ia au.

¹⁸ E kau soli le mou koloa, mo le kololia, Mo koloa lee gato, ti mo le faitotonu.

¹⁹ E malie ake aku nea alofa i le aulo, i le aulo mea ; Ti e malie ake loku fua i le siliva mea.

²⁰ E kau saele i le ala o le faitotonu, I loto malie o ala o le maokioki,

²¹ Ke soli ni nea malilie kia latou ala e alofa kiate au, Ti ke fakaapele olatou tanakiaga koloa fakapulipuli.

²² Na maua au e le Eteleno i le kamataaga o ona ala, I mua o ana uluaki gaoiaga.

²³ Na fakanofo au talu mei le lee gato, I le kamataaga, kae e leikiaise fakatupu le malama nei.

²⁴ Na fanaui au kae e leikiaise maua se vanu, Kae e leikiaise maua se matapuna na apele i le vai ;

²⁵ Ti e leikiaise tutuu a mauga lalasi, Ti e leikiaise tupu a mauga liliki.

²⁶ Na leikiaise fai e ia le kele, mo matamata fenua, Ti mo le uluaki atomi o le efu o le kele.

²⁷ I lana teuteu a atu lagi, na kau nofo i ai, I lana tosi le laini i aluga o le loloto uluaki,

²⁸ I lana fakapipi a ao i aluga, Ti mo lana fakafuafua le makeke o matapuna vai o le loloto,

²⁹ I lana tuku se koiga ki le tai, Ke aua na fakalaka ona galu i le matatai, I lana teki a fakatafito o le kele,

³⁰ Na kau gaoi i ona tafa, Ti na kau fai i aso fuli ona fiafiaaga, O manogi tuumau i ona mua,

³¹ Io, na kau manogi i le kele takafuafua, Ti na kau maua loku fiafiaaga i lotolotoga o vosa o le tagata.

³² I le aso nei, ei oku vosa, kotou fakalogo mai kiate au ! Ti e manuia latou ala e tausi ia oku ala !

³³ Kotou fakalogo ki le akonaki, ke kotou liliu o popoto, Aua na kotou tiaki a ia.

³⁴ Manuia le tagata leia e fakalogo mai kiate au, Leia e talitali i aso fuli i oku matapa, Ti e taupau ia ona pou !

³⁵ Talie ko leia e maua ia au, e maua ia le mauli ; Ti e maua e ia le alofa o le Eteleno.

³⁶ Kae ko leia e agasala kiate au, E fai ia le veli ki lona laumalie ; Ko latou fuli ala e vesia kiate au e alofa ki le mate.