Taagapati 7 - Tosi Tapu

Ko le fafine faiaga

¹ Ei loku vosa, taofi aku masau, Ti ke taupau aku pelesepeto i lou loto.

² Tausi aku pelesepeto, ti e ke mauli loa ; Taupau aku akonaki ofaipe le fa tiloga o ou fa mata.

³ Nonoa latou ki ou maikao, Tosi latou i le laupapa o lou loto.

⁴ Pati ki le poto : Ko koe ko loku tuagaane ! Ti fakaigoa le atamai ko lou kaukau nea,

⁵ O tupu ke la puipui a koe i le fafine matapule, I le fafine matapule, leia e fai ia ni masau suamalie.

⁶ Na kau tuu i le matapa o loku fale, Ti na kau tio ki fafo i le matapa tiloata.

⁷ Na kau tio loa i le kau valelea, Na kau fakatokagai loa i le kau tupulaga se tama sala atamai.

⁸ Na fakalaka ake a ia i le ala, o ofi ki le tuliki leia na nofo ai se tasi o fafine matapule ana, Ti na ano mamalie a ia ki ganea leia e tuu ai lona nofoaga :

⁹ Ko le afiafi a ia, i le temi leia na to ai le pouli, Kae kamata ai le fakapouli.

¹⁰ Ti ko leinei, na fakafetaulaki mai kiate ia se fafine, Leia na kofu ofaipe se fafine faiaga ti na nofo mo le kaka i le loto.

¹¹ Na gutu logoa a ia mo matasoka ; Na leaise nofo mau ona vae i lona fale ;

¹² I se tasi lakaga i ala, i se tasi lakaga i lapalasi, I se tasi lakaga i tuliki, na lamalama e ia se tasi ke momoe mo ia.

¹³ Na too loa e ia le tama, o sogi loa kiate ia, Ti mo ni mata fia nealasi na pati loa a ia ki le tama :

¹⁴ Na tonu ke kau momoli se sakilifisio fakafetai, Ti na kau fakasoko i le aso nei aku fakapapau.

¹⁵ Koia na kau ulu mai ai ki ou mua, O afa a koe, ti na kau maua a koe.

¹⁶ Na kau teuteui loku palepale ki ni tupenu, Mo ni tapi mei Esipito ;

¹⁷ Na kau fakamanogi loku moeaga Ki le mila, mo le aloese, ti mo le sinamome.

¹⁸ Au, ke ta konana i le alofa o kaku ki le usu, Ke ta fakafiafia taua i le fai o le alofa.

¹⁹ Talie e leaise nofo loku avaga i fale, Kua folau a ia ki mamao ;

²⁰ Ti na ave e ia mo ia le taga paaga, Koi toe liliu mai loa a ia ki fale i le masina foou.

²¹ Na fakasese e ia a ia i le lasi o ana masau, Na toso loa e ia a ia ki ona laugutu suamalie.

²² Na muli fakapunamauli loa a ia iate ia, Ofaipe le pipi tagata leia e ano ki le fale tamate manu, Ofaipe se vale leia e sai ke tautea,

²³ O kaku ki le ulu o se gasau ki lona ate, Ofaipe le manu lele leia e oso ki le kupega, Kae e leaise iloa e ia ko le fakaokiaga o lona mauli.

²⁴ I le aso nei, ei oku vosa, kotou fakalogo mai kiate au, Ti kotou tokaga ki masau o loku gutu.

²⁵ Ke aua na tuku ke ano lou loto i ala o se fafine fenaaki, Aua na ke sese i ona ala.

²⁶ Talie kua toka api latou ala na vivilo ki lana masele ; Ti kua toka api latou ala na tamate e ia.

²⁷ Ko lona fale, ko le ala a ia ki le nofoaga o le kau mate ; E ifo a ia ki nofoaga o le mate.