Taagapati 6 - Tosi Tapu

Ko ni tokoi kesekese

¹ Ei loku vosa, kapau na ke fetogi lou oloi i lona maua, Kapau na ke ta lou lima ki le lima o tasi ake tagata,

² Kapau kua sai a koe e masau o lou gutu, Kapau kua ke visia i fakapapau o lou gutu,

³ Fai loa le nea leinei, ei loku vosa, mavae vave i ia, Talie kua ke vilo ki le pule o lou oloi ; Ano kiate ia, fakataulalo i ona mua, o fai ni fakakolekole kiate ia ;

⁴ Aua na ke tuku ke moe ou mata, Pe ke tulemoe ou laumata ;

⁵ Mavae vave ofaipe le kaseli i le lima o le tagata kapu, Ofaipe le manu lele i le lima o le tagata faimasele.

Ko le gasueveli

⁶ Ano ki le fa lomimi, a koe leia e gasueveli ; Tio ki ona ala, ti liliu o poto.

⁷ E leaise maua e ia se tasi ke fakasasa ia lana gaoi, Pe ko se tasi ke sivi ia lana gaoi, pe ko se tasi ke pule kiate ia ;

⁸ E tokonaki e ia lana nea kai i le temi vevela, E tanaki e ia lana nea kai katoa i le temi tuuti fulumeto.

⁹ A koe leia e gasueveli, e ke moe loa o kaku kiafea ? Koafea e ke tuu ake ai loa i lau moe ?

¹⁰ Ko se ga moe ikiiki, se ga maumoea ikiiki, Se ga kulima ikiiki o lima ke moe !…

¹¹ Ti e mautoka loa a koe e le mativa ofaipe se tagata fakatolotolo, Ti e tapo loa a koe e le oge ofaipe se tagata too masafu.

Ko le malualoi

¹² Ko le tagata agaveli, le tagata agasala, E saele mo le kaka i lona gutu ;

¹³ E kemo e ia ona mata, e masau a ia ki ona vae, E fai e ia ni kamo ki ona maikao.

¹⁴ E nofo le veli i lona loto, E fakakaukau e ia le veli i temi fuli, E fakasolosolo e ia a fefele.

¹⁵ Koia e soko fakapunamauli ai loa lona maumau ; E fati fakaofolele loa a ia, ti e leaise toe maua loa sona faitoo.

¹⁶ E vesia le Eteleno ki nea e ono, Ti e fakalialia foki a ia ki nea e fitu :

¹⁷ Ko mata ala e fia nealasi, mo le alelo leia e loi, Mo lima ala e liligi ia le toto saosaoa,

¹⁸ Mo le loto leia e fakakaukau ia ni fakatuutuu veveli, Mo vae ala e fakatavili o makape ki le veli,

¹⁹ Mo le tagata fakamaoki loi leia e fakasa ia ni loi, Ti mo leia e fakatupu ia ni fefele i fetaina.

Ko le tono avaga

²⁰ Ei loku vosa, tausi a pelesepeto o lou tamana, Ti aua na ke tiaki le akonaki a lou tinana.

²¹ Sai tuumau latou ki lou loto, Nonoa latou ki lou ua.

²² E lotou taki loa a koe i lau saele, E lotou taupau loa a koe i lou moeaga, E lotou masau loa kiate koe i lou ala.

²³ Talie ko le pelesepeto ko se tuuaga malama, ti ko le akonaki ko se fa malama, Ti ko valoki a le tautea ko le ala o le mauli :

²⁴ E lotou puipui loa a koe i le fafine agasala, I le alelo suamalie o le fafine matapule.

²⁵ Aua na ke manumanu i lou loto ki lona fulumalie, Ti aua na ke tuku ke sese lou loto i ona laumata.

²⁶ Talie ki se fafine faiaga e fakafiti ki se ga pane, Ti e teuteu e le fafine avaga se masele ki le mauli katoa.

²⁷ Pe tuku loa e se tasi se afi ki lona fatafata, Kae e leaise ulaula loa ona kofu ?

²⁸ Pe saele loa se tasi i ni malala kaka, Kae e leaise vela loa ona vae ?

²⁹ E tatau foki mo leia e ano ki le avaga o lona oloi : Ko leia e fafa kiate ia e leaise nofo loa sala tautea.

³⁰ E leaise tuku ke saosaoa se tagata kaia leia e kaia I lona fia kai ke fakafimalie ai lona manava ;

³¹ Kapau e maua a ia, e fakaliliu loa e ia o liuga fitu, E soli loa e ia a nea fuli e maua e ia i lona fale.

³² Kae ko leia e momoe mo se fafine avaga e sala atamai ; I lana fai le nea lena e maumaui e ia lona laumalie totonu ;

³³ E maua loa e ia ni lavea mo le vesiainai, Ti e leaise toe puli loa lona luma.

³⁴ Talie ko le finenonofo e fakatupu ia le ita veli o le tagata, Ti e sala alofa a ia i le aso o le totogi ;

³⁵ E leaise toe tali e ia se totogi, Ti e leaise toe peluki a ia, mo ka ke liuliuga foki ou moliga.