Taagapati 5 - Tosi Tapu

Ko le valoki o aga fakalialia

¹ Ei loku vosa, tokaga mai ki loku poto, Fakalogo lou taliga ki loku atamai,

² O tupu ke ke maua le fakakaukau, Ti ke taupau e ou laugutu le iloa.

³ Talie e sua malie a laugutu o le fafine matapule ofaipe le meli, Ti e momole ake lona gutu i le lolo ;

⁴ Kae i le fakaoki e kona a ia ofaipe le apesite, Ti e matakakai a ia ofaipe se seleta mata lua.

⁵ E ifo ona vae ki le mate, E kaku ona vae ki le nofoaga o le kau mate.

⁶ E leaise mulimuli a ia i le ala o le mauli ; E sese a ia i ona ala, e leaise iloa e ia le ganea e ano a ia ki ai.

⁷ Ti ko leinei, ei oku vosa, kotou fakalogo mai kiate au, Ti aua na kotou mavae i masau o loku gutu.

⁸ Fakamamao i le ala leia e taki ia ki lona fale, Ti aua na ke fakafeofi ki le matapa o lona fale,

⁹ Ke aua na ke soli lou makeke ki ni iki, Ti mo ou fetuu ki se tagata tukipo ;

¹⁰ Ke aua na makokona ni matapule i au nea malilie, Ti ke ave a fua o lau gaoi ki le fale o se tasi kese ;

¹¹ Ke aua na ke tagi i le mamae i le feofi ki lou mate, Mo ka okioki loa lou kanofi mo lou tino,

¹² O ke pati : Oiau, kolea na kau vesia ai ki le akonaki, Ti kolea na leaise tokaga ai loku loto ki le valoki ?

¹³ Kolea na leaise kau fakalogo ai ki le leo o oku pule, Ti na leaise tokaga ai loku taliga kia latou ala na ako ia au ?

¹⁴ Ko le ganea ikiiki fai ti kau felavei mo malaia fuli I loto malie o le kakai ti mo le fakatasiga.

Alofa ki le avaga o le temi tupulaga

¹⁵ Inu a vai o lou fa tane, A vai ala e mapusi mei lou sosoni.

¹⁶ Pe tonu ke sali ou matapuna ki fafo ? Pe tonu ke se sali ou vaitafe i potu apiapi.

¹⁷ Taupau latou ma au toka tasi ! Kae aua na ke vae latou mo ni matapule.

¹⁸ Ke tapuaki lou matapuna vai, Ti ke maua lou fiafia i le fafine o lou temi tupulaga,

¹⁹ Tia fafine o mamana, kaseli e apele i kalasia : Ke ke kona i temi fuli i lona tino, Ke ke fiafia sosoko i lona alofa.

²⁰ Ei loku vosa, kolea e ke oli ai loa ki se fafine matapule, Ti e ke sogi ai loa ki le u o se fafine e leaise ke iloa ?

²¹ Talie e tuu a ala o le tagata i mua o le Eteleno, Leia e tio ki ona ala fuli.

²² E saisai le tagata agaveli e ana aga veveli totonu, E tapo a ia e va o lana agasala.

²³ E mate loa a ia sala akonaki, E siga loa a ia i le lasi o lona valea.