Taagapati 4 - Tosi Tapu

E maua le poto i le gaoi : Tokoi a se tamana

¹ Ei oku vosa, kotou fakalogo mai ki le akonaki a se tamana, Ti ke kotou tokaga, o tupu ke kotou iloa le poto.

² Talie e kau soli kia koutou ni tokoi malilie : Aua na kotou tiaki laku akonaki.

³ Talie na kau nofo foki ko se vosa ki loku tamana, Se vosa fakapelepele mo fuatasi i tafa o loku tinana.

⁴ I le temi lena, na ako e ia au, ti na pati a ia kiate au : Ke fakamaumau e lou loto aku masau ; Taupau aku pelesepeto, ti e ke mauli loa.

⁵ Faiga ki le poto, maua le atamai ; Aua na galo iate koe a masau o loku gutu, ti aua na ke maliu ia latou.

⁶ Aua na ke tiaki le poto, ti e taupau loa e ia a koe ; Alofa kiate ia, ti e puipui loa e ia a koe.

⁷ Ko leinei le kamataaga o le poto : Faiga ki le poto, Ti ki nea fuli e ke maua, faiga ki le atamai.

⁸ Siki le poto, ti e siki loa e ia a koe E liliu loa a ia ko lou kololia, mo kapau e ke luluku a ia i lou fatafata.

⁹ E teki loa e ia ki lou ulu se puloga o le kalasia, E teu loa e ia a koe ki se pala fakasau fulumalie.

¹⁰ Ei loku vosa, fakalogo mai, ti ke tali aku masau ; Ti e liuliuga loa a fetuu o lou mauli.

¹¹ E kau fakasa kiate koe le ala o le poto, E kau taki a koe i ala o le faitotonu.

¹² Ka ke saele, e leaise visia loa lou vae ; Ti ka ke makape, e leaise ke siga loa.

¹³ Taofi ke mau le akonaki, aua na ke tuku a ia ; Kukumi mau a ia, talie ko lou mauli a ia.

¹⁴ Aua na ke ulu ki le ala o le kau agaveli, Ti aua na ke saele i le ala o tagata agasala.

¹⁵ Fakatafa kese i ai, aua na ke ano i ai ; Maliu i ai, o ano kese.

¹⁶ Talie e leaise lotou momoe, kae e leikiaise lotou fai le veli ; ti e puli le fia moe ia latou mo ka e leikiaise lotou fakavilo se tasi.

¹⁷ Talie e lotou kai le pane o le agaveli, Ti e lotou inu le vino o le fakamakeke.

¹⁸ Ko le ala o le kau agatonu e faipe le malama gigila, Leia e asilisili gigila lona malama o kaku ki le loto malie o le aso.

¹⁹ Ko le ala o le kau agaveli e faipe le fakapouli ; E leaise lotou tio ki le nea leia e fakavilo ia loa latou.

²⁰ Ei loku vosa, tokaga ki aku masau, Fakalogo lou taliga ki aku akonaki.

²¹ Ke aua na lotou mamao i ou mata ; Taupau latou i le takele o lou loto ;

²² Talie ko le mauli a ia kia latou ala e maua ia latou, Ko le malolo a ia ki lolatou tino katoa.

²³ Taupau lou loto o lasi ake i nea fuli ake ala, Talie e au mei ai a matapuna o le mauli.

²⁴ Fakamamao i lou gutu le loi, Fakamamao i ou laugutu a masau pikopiko.

²⁵ Ke tio fakasako ou mata, Ti ke ave ou laumata ki ou mua.

²⁶ Fakakaukau ki le ala leia e ke ano ai, Ti ke tuku ou vae i se ala totonu.

²⁷ Aua na ke maliu ki le fetuu atamai pe ko le fetuu sema, Ti fakamamao lou vae i le veli.