Taagapati 31 - Tosi Tapu

Masau a Lemuele : Tokoi ki se sau

¹ Ko masau a le sau ko Lemuele. Ko ni masau loloto na ako kiate ia e lona tinana.

² Fakalogo mai, ei loku tama, fakalogo mai ei loku fanau totonu, Fakalogo mai, ei loku tama, a koe leia na kau kole i aku fakapapau ?

³ Aua na ke tuku lou makeke ki fafine, Ti mo ou ala kia latou ala e taki ia a sau ki le maumau.

⁴ Taofi totonu le nea leinei, Lemuele ! E leaise gali mo sau le inu vino, E leaise gali mo aliki le inu o kava makeke,

⁵ Talie na lotou konana, ti lotou galoi loa le lao, Ti leaise lotou tokaga loa ki le kau mativa.

⁶ Kotou soli ni kava makeke ki leia ka mate, Ti mo se vino ki leia e mafaia lona laumalie ;

⁷ Tuku ke inu a ia, ke galo ai lona mativa Ti ke aua na toe manatu a ia ki ona mamae.

⁸ Kae ko koe, masau o puipui latou e leaise feala ke masau, Ti mo latou fuli e tiakina.

⁹ Masau lou gutu, fakamaau i le faitotonu, O puipui le mativa mo le fakaaloalofa.

Ko le paaki o le fafine mafi

¹⁰ Ko ai e feala ke maua ia se fafine malie ! E lasi ake lona mauiga i fuai kasoa.

¹¹ E fanaki maoki le loto o lona avaga kiate ia, Ti e leaise maumaui e ia sana nea.

¹² E leaise fai e ia se nea leia e veli ki lona avaga, Kae e fai e ia le nea leia e fiafia ai a ia i aso fuli o lona mauli.

¹³ E afa e ia le fului akeno mo le lino, Ti e gaoi a ia i se lima fiafia.

¹⁴ E fai a ia pe vaka faikoloa, E aumai e ia lana pane mei mamao.

¹⁵ E tuu ake a ia koi pouli, O soli le nea kai ki lona fale, Ti mo kauga ki ana fafine fakasausau.

¹⁶ E manatu a ia ki se faisaga, ti e totogi e ia a ia ; Ki le fua o lana gaoi e to e ia se vite.

¹⁷ E toi e ia ki le makeke ona ifiifi, Ti e fakamakeke e ia ona lima.

¹⁸ E logoi e ia ko le nea leia e kanie e ia e malie ; E leaise mate lona malama i le pouli.

¹⁹ E fafa ona lima ki le laakau lalaga kie, Ti e too e ona maikao le tanakiaga filo.

²⁰ E falo lona lima ki leia e mamae, E falo lona lima kia latou e fakaaloalofa.

²¹ E leaise tuania e ia le momoko ki lona fale, Talie kua kofu lona fale katoa ki ni kofu fului akeno kula.

²² E fai e ia kiate ia ni tapi, Ti e maua e ia ni kofu silika mo velevete.

²³ E logologona lona avaga i matapa, Mo ka fono a ia mo le kau matua o le fenua.

²⁴ E fai e ia ni kofu, o fakatau, Ti e ave e ia ni kilii pipi ki le tagata faikoloa.

²⁵ E kofu a ia ki le makeke mo le kololia, Ti e kata a ia ki le apogipogi.

²⁶ E fakamavaa e ia lona gutu i le poto, Ti e maua ni tokoi malilie i lona alelo.

²⁷ E tokaga a ia ki le nea leia e soko i lona fale, Ti e leaise kai e ia le pane o le gasueveli.

²⁸ E tutuu ki aluga ona vosa, o fakamalo kiate ia. Ti e tuu ki aluga lona avaga, o fakavikiviki kiate ia :

²⁹ E toka api ni fafine malilie, Kae ko koe e ke fakalaka ia latou fuli.

³⁰ E kaka le mata katakata, ti e vaiga le fulumalie ; Kae ko le fafine leia e i ki le Eteleno, ko ia leia e gali mo le fakavikiviki.

³¹ Kotou fakapale a ia ki le fua o lana gaoi, Ti ke fakavikiviki ana gaoi kiate ia i matapa o le kolo.