Taagapati 30 - Tosi Tapu

Masau a Akule

¹ Ko masau a Akule, vosa o Iake. Ko leinei le nea na fakasa e le tagata lena kia Itiele, io, kia Itiele mo Ukale :

² E maoki, e kau valea ake i tagata fuli, Ti e leaise kau maua le atamai o se tagata ;

³ Na leaise kau ako ia le poto, Ti e leaise kau maua le iloa a le kau sagato.

⁴ Ko ai na pale ki le atu lagi, ti ko ai na ifo mei ai ? Ko ai na tanaki ia le matagi i lona lima ? Ko ai na fakamaopoopo ia a atu vai i lona kofu ? Ko ai na fakatuu ia a potupotu o le malama nei ? Ko ai lona igoa, ti ko ai le igoa o lona vosa ? Pe ke iloa a ia ?

⁵ Ko folafola fuli a le Atua e mea. Ko se paletau a ia kia latou fuli ala e afa ia se mumuniaga iate ia.

⁶ Aua na ke fakalasi ana folafola ki se nea, Talie na valoki e ia a koe, ti ke maua a koe e loi.

⁷ E kau kole nea e lua kiate koe : Aua na ke fakafiti mai laua kiate au, i mua o loku mate !

⁸ Fakamamao iate au le kaka mo le masau loi ; Aua na ke tuku kiate au le mativa, pe ko le mou koloa, Soli mai kiate au le pane leia e aoga kiate au,

⁹ Talie na kau makona, ti kau fakafiti kiate koe, O kau pati : Ko ai le Eteleno ? Ti na kau mativa, ti kau kaia, O kau takua noa ki le suafa o loku Atua.

¹⁰ Aua na ke lauveli ki se tagata fakasausau i tafa o lona pule, Ke aua na fakamalaia e ia a koe, ti ke agasala ai.

¹¹ E i ai se tautagata leia e fakamalaia ki lona tamana, Ti e leaise tapuaki ki lona tinana.

¹² E i ai se tautagata leia e pati e mea, kae e leikiaise fufulu e ia lona kelekele.

¹³ E i ai se tau tagata leia e apele ona mata i le vesia, Ti e tio fakaveli ki tagata fuli.

¹⁴ E i ai se tautagata leia e fai ona nifo pe ni seleta, Ti mo ona kaunifo pe ni sele, Ke kai leia e mamae i le malama nei Ti mo le kau mativa i loto malie o tagata.

¹⁵ E maua e le unufe mimiti toto ni taine e toka lua : Soli mai ! soli mai ! Ko nea e tolu e leaise makona, Ko nea e fa e leaise pati i se aso : Kua feauga !

¹⁶ Ko le nofoaga o le kau mate, mo le fafine paa, Mo le kele, leia na leikiaise apele i le vai, Ti mo le afi, leia e leaise pati i se aso : Kua feauga !

¹⁷ Ko le mata leia e gologolo ki se tamana, Ti e leaise fakanoa ia le patigaofie ki se tinana, E kapei loa a ia e le kolopo o le liua, Ti e kai loa a ia e uviki o le akuila.

¹⁸ E i ai nea e tolu ala e fakaofolele ai kiate au, Nea e fa foki e leaise kau matala ki ai :

¹⁹ Ko le fakamailoga o le akuila i le lagi, Mo le fakamailoga o le gata i le fatu, Mo le fakamailoga o le vaka i le tai ; Ti mo fakamailoga o se tagata i se taine.

²⁰ Ko leinei le ala o le fafine tono tagata : E kai a ia, ti e solosolo e ia lona gutu, Ti pati a ia : Na leaise kau fai se nea e veli.

²¹ Ko nea e tolu e fakagalulu ia le malama nei, Ti e i ai foki ni nea e fa e faigata lona tali :

²² Ko se tagata popula leia e fakanofo o sau, Mo se tagata valea leia e kai makona ia le pane,

²³ Mo se fafine fakalialia leia e avaga ; Mo se fafine fakasausau leia e maua ia le koloa o lona fafine pule.

²⁴ E i ai ni manu e fa i le malama nei e liliki oki, Kae e lotou kau i le kau popoto :

²⁵ Ko lomimi, ko se kakai sala makeke, Leia e teuteu ia lana nea kai i le temi vevela ;

²⁶ Mo tamani, ko se kakai sala makeke, Leia e fakatuu ia olatou nofoaga i aluga o utu ;

²⁷ Mo seseivaka, ko se kakai sala sau, Leia e mavae fuli i fa solia ;

²⁸ Mo le pili leia e tapo ki le lima, Kae nofo i loto fale o sau.

²⁹ E i ai manu e tolu ala e fulumalie lalatou tutuu, Ti e fa foki ala e fulumalie lalatou saele :

³⁰ Ko le laione, le toa o manu, Leia e leaise solomuli i mua o se nea ;

³¹ Mo le osi leia kua teuteu ki le tau, Mo le koti tagata ; Ti mo le sau leia e saele i mua o lana kau solia.

³² Kapau kua taki a koe e le fia nealasi o fai ni nea fakavale, Ti kapau e ke maua ia ni manatu veveli, teki lou lima ki lou gutu :

³³ Talie e tupu le folomasi i le ta o le sua manu, Ti e tupu le toto i le ta o le isu, Ti e tupu a fefele i le ta o le ita.