Taagapati 3 - Tosi Tapu

Ko le fakapale o le poto

¹ Ei loku vosa, aua na galo aku akonaki iate koe, Ti ke taupau e lou loto aku pelesepeto ;

² Talie e lotou fakatologa loa a aso mo fetuu o lou mauli, Ti e lotou fakalasi loa lou tokamalie.

³ Ke aua na mavae iate koe le agamalie mo le agatonu ; Sai laua ki lou ua, tosi laua i le laupapa o lou loto.

⁴ E ke maua loa i ai le kalasia mo le fakakaukau malie, I mua o le Atua mo tagata.

⁵ Fanaki ki le Eteleno i lou loto katoa, Kae aua na ke fanaki ki lou poto ;

⁶ Ke ke fanaki kiate ia i ou ala fuli, Ti e fakatokatoka loa e ia ou ala.

⁷ Aua na ke poto i ou mata totonu, I ki le Eteleno, ti ke tafoki i le veli :

⁸ Ko le malolo loa a ia ki ou kanomate, Ti mo le fakafoou ki ou ivi.

⁹ Fakamauiga le Eteleno ki au nea malilie, Ti mo uluaki fua o nea fuli o lau gaoi :

¹⁰ Ti e apele loa ou fata i le fulumeto, Ti e apele pipi loa au poe i le vino.

¹¹ Ei loku vosa, aua na ke fakanoa ia le tautea a le Eteleno, Ti aua na ke fiu i ana valoki ;

¹² Talie e tautea e le Eteleno leia e alofa a ia ki ai, Ofaipe se tamana le fanau leia e alofa mamae a ia ki ai.

¹³ Manuia le tagata leia kua maua ia le poto, Ti mo le tagata leia e maua ia le atamai !

¹⁴ Talie e mauiga ake a ia i le paaga, Ti e malie ake a ia i le aulo.

¹⁵ E mauiga ake le poto i fuai kasoa E mauiga lasi ake a ia i nea fuli e totogi veli.

¹⁶ I lona lima atamai e maua ai le mauli fualoa, I lona lima sema e maua ai le koloa ti mo le kololia.

¹⁷ Ko ona ala ko ni ala malilie, Ti ko ona ala liliki fuli e tokamalie.

¹⁸ Ko se laakau a ia o le mauli kia latou ala e too ia a ia, Ti e manuia latou ala e kukumi mau ia a ia.

¹⁹ Ko le poto leia na fakatafito ai e le Eteleno le malama nei, Ti ko le atamai leia na fakatupu ai e ia le atu lagi ;

²⁰ Ko lona poto leia na mavaa ai a vanu loloto, Ti na vilo ai le sasau mei ao.

²¹ Ei loku vosa, ke aua na mamao a akonaki ana i ou mata, Taupau le poto mo le fakakaukau :

²² E la liliu loa ko le mauli o lou laumalie, Ti mo le kasoa teuteu o lou ua.

²³ Ti e ke saele loa i le tokamalie i lou ala, Ti e leaise tukia loa lou vae.

²⁴ Kapau e ke moe, e leaise ke tuania loa se nea ; Ti ka ke moe mate, e ano malie loa lau moe.

²⁵ Aua na ke tuania se tutamaki fakapunamauli, Pe ko se pikoi a le kau agaveli ;

²⁶ Talie ko le Eteleno ko lou fanakiaga, Ti e puipui loa e ia lou vae i masele fuli.

²⁷ Aua na ke fakafiti se nea malie ki leia e tonu ke fai ki ai, Mo kapau e ke mafai a ia.

²⁸ Aua na ke pati ki lou oloi : Ano ti ke toe au, I apogipogi e kau soli loa ! kae e ke maua se nea ke soli.

²⁹ Aua na ke fakakaukau le veli ki lou oloi, Kae nofo a ia i ou tafa o fanaki kiate koe.

³⁰ Aua na ke fefele noa mo se tasi, Kae na leaise fai atu e ia se nea veli kiate koe.

³¹ Aua na ke finenonofo ki le tagata agamakeke, Ti aua na ke filifili se ala fua e tasi i ona ala.

³² Talie e fakalialia le Eteleno ki tagata agaveveli, Kae ko le kaukau nea a ia o tagata maokioki ;

³³ E maua i le fale o le tagata agasala le fakamalaia a le Eteleno, Kae tapuaki a ia ki le fale o tagata agatonu ;

³⁴ E gologolo a ia kia latou ala e gologolo kiate ia, Kae e soli e ia le kalasia kia latou ala e agamalu.

³⁵ E maua tofiga loa e le kau poto le kololia, Kae ko le vaega o le kau vale ko le luma.