Taagapati 29 - Tosi Tapu

Valoki mo akonaki (soko atu)

¹ Ko se tagata leia kua tua lasi lona valoki, kae e fakafefeka lona ua, E fatii fakapunamauli loa a ia, ti e leaise toe maua loa sona faitoo.

² Ka tupu o toka api le kau agatonu, e fiafia le kakai ; Kae ka pule se tagata agaveli, e lauga le kakai.

³ Ko le tagata leia e manako ki le poto e fakafiafia ia lona tamana, Kae ko leia e fakatasi mo ni fafine faiaga e maumau ia ona koloa.

⁴ E fakamakeke e le sau le fenua i le faitotonu, Kae ko leia e tali ia ni nea alofa e fakamativa ia a ia.

⁵ Ko le tagata leia e vikiviki ia lona oloi E folasi ia se kupega i ona vae.

⁶ E i ai se masele i le agasala a le tagata agaveli, Kae e malo le tagata agatonu ti e fiafia.

⁷ E tokaga le tagata agatonu ki le kau mativa, Kae e leaise matala le tagata agaveli le poto lena.

⁸ E pupusi e le kau gologolo le afi i le kolo, Kae e fakafimalie e le kau poto le ita.

⁹ Kapau e visi se tagata poto mo se tagata valea, E pakia loa a ia i le ita mo le kata, e leaise soko loa le tokamalie.

¹⁰ E vesia tagata tukipo ki le tagata maokioki, Kae e puipui e tagata agatonu lona mauli.

¹¹ E fakasa e le tagata valea lona loto katoa ki tafa, Kae e tataofi e le tagata poto lona loto.

¹² Kapau e tau tokaga leia e pule ki masau loi, E liliu o agaveli ana tagata fakasausau fuli.

¹³ E felavei le tagata mativa mo le tagata agaveli ; Ko le Eteleno leia e fakamalama ia a mata o leia mo leia.

¹⁴ Ko le sau leia e fakamaau ia le kau mativa i le faitotonu, E fakamakeke ia lana pule o lee gato.

¹⁵ Ko le laakau mo le valoki e tuku ia le poto, Kae ko le fanau leia e tuku ke faifaitalisa e fakatupu ia le luma o lona tinana.

¹⁶ Ka tupu o toka api le kau agaveli, e asilisili le agasala ; Kae e tio loa le kau agatonu ki lolatou vilo.

¹⁷ Tautea lou vosa, ti e soli atu loa e ia le malolo kiate koe, Ti e fakafiafia loa e ia lou laumalie.

¹⁸ Ka e leaise i ai se folafola kikite mei le Atua, e mauli fakavale le kakai ; Manuia le kakai leia e tausi ia le lao a le Eteleno !

¹⁹ E leaise tautea se tagata popula ki ni masau ; Talie kapau e matala foki a ia, e leaise fakalogo fua a ia.

²⁰ Kapau e ke tio ki se tagata leia e leaise fakakaukau i ana masau, E ke amanaki malie ake ki le tagata valea i le tagata lena.

²¹ Ko le tagata fakasausau leia na leaise ako talu lona ikiiki, E pati i le fakaoki ko se vosa a ia.

²² E fakatupu e le tagata itaita ni fefele, Ti e fai e le tagata loto oso ni agasala lasi.

²³ Ko le fia nealasi o se tagata e tuku ia a ia ki lalo, Kae ko leia e loto fakataulalo e maua ia le kololia.

²⁴ Ko leia e kaukau nea mo se tagata kaia, e vesia ki lona laumalie ; E iloa e ia le malaia, kae e leaise masau a ia.

²⁵ Ko le i ki tagata ko se masele, Kae ko leia e fanaki ki le Eteleno e puipui a ia.

²⁶ E toka api latou ala e afa ia le alofa o leia e pule, Kae ko le Eteleno leia e tuku ia ki le tagata taki toka tasi le nea leia e tonu ke maua e ia.

²⁷ E fakalialia le kau agatonu ki le tagata agaveli, Ti e fakalialia le kau agaveli ki leia e sako lona ala.