Taagapati 28 - Tosi Tapu

Valoki mo akonaki (soko atu)

¹ E sola le tagata agaveli kae e leaise tuli a ia e se tasi, Kae e loto toa le tagata agatonu ofaipe se laione muli.

² Ka maveuveu se fenua, e toka api le kau pule ; Kae kapau sau se tagata atamai mo poto, e tologa lana sau.

³ Ko se tagata mativa leia e fakamakeke ki le kau fakaaloalofa E tatau mo se ua makeke leia e fakaoge ia le fenua.

⁴ Ko latou ala e tiaki ia le lao e vikiviki ki le tagata agaveli, Kae ko latou ala e tausi ki le lao e iita kiate ia.

⁵ Ko tagata ala e fai ia le veli e leaise matala ki le nea leia e totonu ; Kae ko latou ala e afa ia le Eteleno e matala ki nea fuli.

⁶ E malie ake le tagata mativa leia e saele i le agatonu, I le tagata leia e saele i ni ala pikopiko ti e mou koloa.

⁷ Ko leia e tausi ki le lao ko se vosa atamai, Kae ko leia e ano mo latou ala e aga fakalialia e fakalumaluma ki lona tamana.

⁸ Ko leia e fakalasi ia ona koloa ki lana paaga na soli ke toe totogi ake mo se tupu, mo se tupu mamafa, E tanaki ia latou ki leia e alofa ki le kau mativa.

⁹ Ko leia e fulusi ia lona taliga ke aua na logo ki le lao, E liliu lana faikole ko se nea fakalialia.

¹⁰ Ko leia e fakasese ia a tagata maokioki ke ano i se ala veli E vilo ki le popoko leia na kenu e ia ; Kae e maua e le kau agatonu le manuia.

¹¹ E pati le tagata mou koloa e poto a ia, Kae ko le tagata mativa leia e atamai e matala ki lona anoaga totonu.

¹² Ka malo le kau agatonu, ko se kololia lasi a ia ; Kae ka malaga ki aluga le kau agaveli, e tasi mumuni le kakai.

¹³ Ko leia e fufu ia ana agasala e leaise manuia, Kae ko leia e fakasa ia latou ti e tiaki ia latou e maua ia le manava alofa.

¹⁴ Manuia le tagata leia e i tuumau ki le Eteleno ! Kae ko leia e fakafefeka ia lona loto e vilo ki le malaia.

¹⁵ Ofaipe se laione itaita ti mo se uluso pakupaku, E felaaki le tagata agaveli leia e pule fakamakeke ki se kakai mativa.

¹⁶ Ko se pule sala atamai e liuliuga ia ni lagiaki fakamakeke, Kae ko leia e vesia ki le manumanu koloa e fakatologa ia ona aso.

¹⁷ Ko se tagata leia e nofo mo se tukipo i lona loto E sola o kaku ki le popoko : ke aua na taofi a ia !

¹⁸ Ko le tagata leia e saele i le maoki e maua ia le fakamauli, Kae ko leia e saele i ni ala pikopiko e lua e vilo ki se tasi ia laua.

¹⁹ Ko leia e gaoi ia lana faisaga e makona i le pane, Kae ko leia e tuli ia ni nea noa e makona i le mativa.

²⁰ Ko le tagata agatonu e apele i tapuakina, Kae ko leia e fia mou koloa vave e leaise sala i le tautea.

²¹ E leaise malie le tiotio tagata i le fakamaau, Talie e mafai ke vilo se tagata ki le agasala o tupu ko se ga potu pane.

²² E faiga se tagata manumanu koloa ke mou koloa vave, Kae e leaise iloa e ia ko le pakupaku leia ka kaku loa kiate ia.

²³ Ko leia e valoki ia se tagata e maua ia se alofa o lasi ake I leia e masau fakalapulapu.

²⁴ Ko leia e kaia ia lona tamana mo lona tinana, Ti e pati : E leaise ko se agasala a ia ! E kaukau nea mo le tagata maumau.

²⁵ Ko le tagata fia nealasi e fakatupu ia a fefele, Kae ko leia e fanaki ki le Eteleno e makona.

²⁶ Ko leia e fanaki ki lona loto totonu ko se tagata valea, Kae ko leia e saele i le poto e fakamauli loa.

²⁷ Ko leia e solisoli ki le mativa e leaise puli se nea iate ia ; Kae ko leia e tapono ia ona mata ki le mativa e mafaia i malaia.

²⁸ Ka malaga ki aluga le kau agaveli, e tasi mumuni le kakai, Ti ka lotou mamate, e tupu o toka api le kau agatonu.