Taagapati 27 - Tosi Tapu

Valoki mo akonaki (soko atu)

¹ Aua na ke viki a koe o uiga mo le aso apogipogi, Talie e leaise ke iloa le nea leia e mafai ke fanaui e lena aso.

² Tuku ke vikiviki a koe e se tasi kese, kae aua e lou gutu totonu, E se matapule, kae aua e ou laugutu totonu.

³ E mamafa le fatu ti e mamafa le one ; Kae e mamafa ake le ita o le vale i leia mo leia.

⁴ E tukipo le fakamakeke, ti e fai le ita pe se liua e tafe makeke, Kae ko ai e tuu loa i mua o le finenonofo ?

⁵ E malie ake le valoki fakaagatonu I se alofa fakafufu.

⁶ Ko lavea i se kaukau nea e fakasa ai lona alofa, Kae ko sogi a le fili e kaka.

⁷ Ko leia e makona e takatakafi ia le meli, Kae ko leia e fia kai e pati : e malie nea fuli e kona.

⁸ Ko le tagata leia e eva mamao i lona fenua E faipe le manu lele leia e eva mamao i lona ofaga.

⁹ E fakafiafia e le lolo mo kaloni le loto, Ti ko tokoi i lona alofa a se kaukau nea e logologo malie.

¹⁰ Aua na ke tiaki lou kaukau nea ti mo le kaukau nea o lou tamana, Ti aua na ke ulu ki le fale o lou taina i le aso o lou mamae ; E malie ake se oloi feofi i se taina kua mamao.

¹¹ Ei loku vosa, ke ke poto, ti ke ke fakafiafia loku loto, Ti e feala loa ke kau tali ki leia e lauveli mai kiate au.

¹² Ko le tagata leia e poto e tio ki le veli ti e mumuni ; Kae ko latou ala e sala atamai e fakafeofi ki ai ti e lotou tautea.

¹³ Too lona taupulupulu, talie na fetogi e ia lona oloi ; Fakamaua a ia ki ni nea fakamaoki o tupu ko le kau matapule.

¹⁴ Kapau e fakamalo logoa se tasi ki se tasi ka koi usuusu, Ti e lau lana fakamalo ko se malaia.

¹⁵ Ko se tulutulu leia e sali mau i le aso ua, Ti mo le fafine fakatupu fefele ko nea tatau.

¹⁶ Ko leia e loto ke taofi ia le fafine lena e taofi ia le matagi, Ti e kukumi e lona lima le lolo.

¹⁷ Ofaipe le ukamea e fakamatakakai ia le ukamea, E fakatupu foki e se tagata le ita o se tagata.

¹⁸ Ko leia e tokaga ki lona fiki e kai loa ki lona fua, Ti ko leia e tausi ki lona pule e fakamauiga loa.

¹⁹ Ofaipe le mata e tio ki lona ata i le vai, E tali foki le loto o le tagata ki le loto o le tagata.

²⁰ Ofaipe le nofoaga o le kau mate mo le vanu e leaise makokona ; E leaise makokona foki a mata o le tagata.

²¹ Ko le kulo saka ukamea ki le siliva, ti ko le gutuumu ki le aulo ; Kae e iloa se tagata i lona logologona.

²² Kapau e ke tuki ia o lalai le tagata valea i se nea tuki kava, O fakatasi mo ni fuai fulumeto ki se fa tuki kava E leaise mavae foki lona valea iate ia.

²³ Ke ke iloa malie au ovi taki tasi, Tokaga fakamalotoloto ki au kau manu ;

²⁴ Talie e leaise tologa le koloa o lee gato, Ti e leaise tologa se pala fakasau o lee gato.

²⁵ Tuuti le mutie o faisaga, tuku ke sosomo le mutie foou, Ti ke ano o tanaki le mutie o mauga.

²⁶ Fai ou kofu ki le fulu o au akeno, Ti ke fakatau au ovi tagata ke totogi ai se faisaga foou ;

²⁷ Ko le sua pipi o au koti fafine e feauga ki lau nea kai, mo leia o lou famili, Ti mo le mauli o au fafine fakasausau.