Taagapati 26 - Tosi Tapu

Valoki mo akonaki (soko atu)

¹ Ofaipe le nive i le temi vevela, ti mo le ua i le temi tuuti o le fulumeto, E leaise gali foki le kololia mo se tagata valea.

² Ofaipe le manu lele leia e sola, ofaipe le pekapeka leia e lele, E leaise soko foki se fakamalaia sala tupuaga.

³ E aoga le suipi ki le osi, mo le fakagutu ki le asino, Ti mo le laakau ki le tua o le kau vale.

⁴ Aua na ke tali ki le vale o mulimuli ki lona valea, Talie na ke tatau loa mo ia.

⁵ Tali ki le vale o mulimuli ki lona valea, Talie ke aua na pati a ia e poto a ia.

⁶ E tutuuti e ia ona vae o ona, e inu e ia le malaia, Leia e ave ia ni logo i se tasi e valea.

⁷ Ofaipe le gagae o vae o le tagata kito, E fenaaki le masau leia e vilo mei le gutu o le kau vale.

⁸ Ofaipe le nonoa o se fa fatu ki se makamaka, E fenaaki mo ka fakamauiga se vale.

⁹ Ofaipe se talai moli e siki e le lima o se tagata kona, e felaaki se taagapati leia e vilo mei le gutu o se vale.

¹⁰ Ofaipe se tagata faikalolo leia e fakalavelavea ia le kakai katoa, E felaaki le tagata leia e too ia i lana solia le kau vale mo latou ala e fakalaka.

¹¹ Ofaipe se kuli leia e toe liliu ki le nea leia na luluai e ia, E fenaaki le vale leia e toe liliu ki lona valea.

¹² Kapau e ke tio ki se tagata leia e tui e poto, Ti e lasi ake le amanaki malie ki se tagata valea i le tagata lena.

¹³ E pati le tagata gasueveli : E i ai se laione i le ala, E i ai se laione i loto malie o le ala !

¹⁴ E maliuliu le matapa i ona saniele, Ti mo le tagata gasueveli i lona moeaga.

¹⁵ E velo e le tagata gasueveli lona lima ki le pa nea kai, Kae e faigataa kiate ia lona aumai ki lona gutu.

¹⁶ E pati le tagata gasueveli e poto ake a ia I ni tagata e toka fitu ala e tali poto.

¹⁷ Ofaipe leia e too ia se kuli i ona taliga, E felaaki le tagata leia e fakalaka ti e kau noa ki se felega na leaise kau ai.

¹⁸ Ofaipe se tagata itaita leia e laku ia ni ugaafi kaka, Ni gasau ti mo le mate,

¹⁹ E fenaaki foki le tagata leia e kakaai ia lona oloi, Ti e pati : Ko ni fakasuasua !

²⁰ Ka sala fafie, e mate le afi ; Ti ka sala tagata folafola veli, e gato le felega.

²¹ E fakakaka e malala se afi lasi, ti e fakauulaula e le fafie le fafie ; E fenaaki le tagata fefele, e fakasolosolo e ia le felele.

²² E tatau masau a le tagata folafola veli mo ni lole, E lotou ifo o kaku ki tootooga.

²³ Ofaipe ni sikoli siliva e uufi ia se ipu kele, E fenaaki ni laugutu vevela e uufi ia se loto veli.

²⁴ Ko le tagata leia e loto veli e kofu ki ona laugutu, Kae e nofo le kaka i lona loto.

²⁵ Ka too e ia se leo malu, aua na ke tui kiate ia, Talie e tuku a nea fakalialia e fitu i lona loto.

²⁶ Kapau e fufu e ia lona vesia i ana masau, Kae e sa loa lona agaveli i le fakatasiga.

²⁷ Ko leia e kenu ia se popoko e vilo ki ai, Ti e toe teka le fatu ki leia na fulusi ia a ia.

²⁸ E vesia le alelo loi kia latou ala na lavea iate ia, Ti e teuteu e le gutu fakalapulapu le malaia.