Taagapati 25 - Tosi Tapu

Ko taagapati a Solomone na fakatasii e le kakai a Esekiasi

¹ Ko nei foki ni iki taagapati a Salomone, ala na fakamaopo e le kakai a Esekiasi, sau o Suta.

² Ko le kololia o le Atua, ko le fufu o nea ; Ko le kololia o sau, ko le iloa o nea.

³ Ko le lagi i lona taualuga, ko le kele i lona loloto, Ti mo le loto o sau, e leaise mafai ke iloa latou.

⁴ Too le kele i le siliva, Ti e maua loa i ai se ipu ki le tagata faiipu.

⁵ Too le tagata agaveli i mua o le sau, Ti e makeke loa lona ekeekeaga fakasau i le faitotonu.

⁶ Aua na ke fia malaga ki aluga i mua o le sau, Ti aua na ke too le nofoaga o le kau lalasi ;

⁷ Talie e malie ake ke pati atu kiate koe : pale mai ki leinei ! I lou tuku ki lalo i mua o le sau leia e tio ki ai ou mata.

⁸ Aua na ke fakatavili o fakasa i le fakamaauaga le nea leia na ke tio ki ai, Talie na fakaoki ake e leaise koi ke iloa se nea ke fai, Mo ka fakaluma loa a koe e lou oloi.

⁹ Fakatokatoka mo lou oloi mo ka e i ai se nea veli ia koulua, Kae aua na ke fakasa le nea fakalilo a se tasi kese,

¹⁰ Talie ke aua na fakaluma e ia a koe mo ka logo a ia ki ai, Ti e leaise mafai loa ke ke toe liliu ki muli.

¹¹ Ofaipe ni fa pome aulo i ni ipu siliva, E fenaaki se masau leia na malie ti na tautonu lona tuku.

¹² Ofaipe se mama aulo mo se kasoa aulo mea, E fenaaki ki se taliga patigaofie le poto leia e fai ia se valoki.

¹³ Ofaipe le mokomoko o le nive i le temi tuuti o le fulumeto, E fenaaki le tagata avelogo agatonu ki leia e kakau ia a ia ; e fakafimalie e ia le loto o lona pule.

¹⁴ Ofaipe ni ao mo se matagi sala ua, E fenaaki le tagata leia e fakakololia i lana solisoli loi.

¹⁵ E peluki le sau e le kataki fualoa, Ti e feala ke fatifatii e le alelo malu ni ivi fefeka.

¹⁶ Kapau e ke maua se meli, kai fai le nea leia e aoga kiate koe, Talie ke aua na ke makona ti ke luluai loa a ia.

¹⁷ Ke tuu tasitasiga lou vae i le fale o lou oloi, Talie ke aua na makona a ia iate koe, ti ke vesia loa a ia kiate koe.

¹⁸ Ofaipe se amale mamafa, pe ko se seleta, pe ko se gasau matakakai, E fenaaki le tagata leia e fai ia se fakamaoki loi ki lona oloi.

¹⁹ Ofaipe se nifo leia kua fati ti mo se vae leia e kito, E fenaaki le fanaki ki se tagata veli i le aso o le malaia.

²⁰ Ko le tatala o le kofu i se aso momoko, Mo le liligi o se vinika ki se lavea, Ko le sua a ia o ni sua ki se loto e mamae.

²¹ Kapau e fia kai lou fili, soli kiate ia se pane ke kai ; Kapau e fia inu a ia, soli kiate ia se vai ke inu.

²² Talie ko ni malala kaka ana e ke tanaki i lona ulu, Ti e fakapale loa a koe e le Eteleno.

²³ E fanaui e le matagi o le potu noleto le ua, Ti e fanaui e le alelo fakaveli ni mata itaita.

²⁴ E malie ake le nofo i se tuliki o le fale i fafo, I le nofo mo se fafine fefele i loto o se fale.

²⁵ Ofaipe se vai mokomoko ki se tasi leia e fia inu, E felaaki le logo malie leia e au mei se fenua mamao.

²⁶ Ofaipe se matapuna kua fufu ti mo se vaitafe kua kelekele, E fenaaki le tagata agatonu leia e siga i mua o le tagata agaveli.

²⁷ E leaise malie le kai lasi o le meli, Ti mo le afa lasi o le kololia.

²⁸ Ofaipe se kolo sala solia ti sala paa, E fenaaki le tagata leia e leaise mafai ke lolomi ia lona ita.