Taagapati 24 - Tosi Tapu

Agatonu mo le agaveli (soko atu)

¹ Aua na ke fuaa ki le kau agaveli, Ti aua na ke oli ke ke kau mo latou ;

² Talie e fakakaukau olatou loto ki le maumau, Ti e masau olatou laugutu ki le veli.

³ Ko le poto leia e laga ia se fale, Ti ko le atamai leia e fakamakeke ia a ia ;

⁴ Ko le poto leia e fakaapele ia a kogafale I koloa mauiga mo malilie.

⁵ Ko le tagata poto e apele i le makeke, Ti ko leia e maua ia le atamai e fakalasi ia lona malolo ;

⁶ Talie e ke fai loa le tau i le fakakaukau poto, Ti e maua le fakamauli i le lasi o le kau fakakaukau.

⁷ Ko le poto e taualuga ki le vale ; E leaise fakamavaa loa e ia lona gutu i le matapa.

⁸ Ko leia e fakakaukau ke fai ia le veli E igoa ko se tagata poto i le kaka.

⁹ Ko manatu fuli a le vale e agasala, Ti e fakalialia le tagata gologolo ki le kakai.

¹⁰ Kapau e ke gaegae i le aso o le mamae, Ko lou makeke e ikiiki fua.

¹¹ Saofaki latou ala e toso ki le mate ! Saofaki latou ala e ave ke tamate !

¹² Kapau e ke pati : a ! na leaise motou iloa !… Pe leaise iloa a ia e leia e fuafua ia le mamafa o loto ? Pe leaise iloa a ia e leia e taupau ia lou laumalie ? Pe leaise totogi loa e ia ki le tagata taki toka tasi o mulimuli ki ana gaoi ?

¹³ Ei loku vosa, kai se meli, talie e malie a ia ; E kano malie loa se laui meli ki lou gutu.

¹⁴ E tatau foki mo le poto, ke ke iloa e malie a ia ki lou laumalie ; Kapau e ke maua le poto, ko se apogipogi a ia kiate koe, Ti e leaise ano noa loa lau amanaki malie.

¹⁵ Aua na ke fakatuu ni masele, ofaipe se tagata agaveli, i mua o le fale o le tagata agatonu, Ti aua na ke maumaui le ganea leia e malolo ai a ia.

¹⁶ Talie e siga tua fitu le tagata agatonu, ti e toe tuu ake a ia ki aluga, Kae e laku le kau agaveli ki le malaia.

¹⁷ Aua na ke fakafiafia mo ka vilo lou fili, Ti aua na nekenekea lou loto mo ka seke a ia,

¹⁸ Ke aua na tio le Eteleno ki le nea lena, ti ke veli a ia kiate ia, Ti ke aua na fulusi kese e ia lona ita iate ia.

¹⁹ Aua na ke ita o tupu ko latou ala e fai ia le veli, Aua na ke fuaa ki le kau agaveli ;

²⁰ Talie e leai se apogipogi ki leia e fai ia le veli, Ti e mate loa le malama o le kau agaveli.

²¹ Ei loku vosa, i ki le Eteleno mo le sau ; Aua na ke kau mo le kau tagata fakamaveuveu ;

²² Talie e soko fakapunamauli loa lolatou maumau, Ti e leaise ke iloa le tautea leia e teuteu e le Atua mo le sau kia latou ana.

²³ Ko leinei foki le tasi a nea e au mei le kau poto : E leaise malie, i fakamaau, ke fakapalatasi ki se tagata.

²⁴ Ko leia e pati ki le tagata agaveli : E ke agatonu ! E fakamalaia a ia e le kakai, e fakamalaia a ia e atu puleaga.

²⁵ Kae ko latou ala e tautea ia a ia e fimalie loa, Ti e au loa le manuia kia latou ofaipe se tapuakina.

²⁶ Ko se tali leia e tuku i le maoki, Ko se fakamaoki totonu a ia o le alofa.

²⁷ Teuteu au gaoi i fafo, Teuteu lau faisaga ke malie, Ti ke fakatuu loa lou fale.

²⁸ Aua na ke fakamaoki ki lou oloi i se nea leia na leaise ke tio mata ki ai ; Pe ke loto ke ke loi i ou laugutu ?

²⁹ Aua na ke pati : E kau fai loa kiate ia ofaipe lana fai mai kiate au, E kau liufaki loa kiate ia o mulimuli ki ana gaoi.

³⁰ Na kau fakalaka i tafa o le faisaga a se tagata gasueveli, Ti mo tafa o le faisaga vite a se tagata sala atamai.

³¹ Ti ko leinei, kua sosomo a vao talatala i ganea fuli, Kua mafola a vao veveli i ai, Ti kua solo le a fatu.

³² Na kau tio fakamalielie, Ti na kau ako mei ai le nea leinei :

³³ Ko se ga moe fakaikiiki fua, ko se ga tulemoe fakaikiiki fua, Ko se ga kulima fakaikiiki fua o moe !…

³⁴ Ti e mautoka loa a koe e le mativa ofaipe se tagata fakatolotolo, Ti e mautoka loa a koe e le oge ofaipe se tagata too masafu.