Taagapati 23 - Tosi Tapu

Agatonu mo le agaveli (soko atu)

¹ Kapau e ke eke i se laupapa kai mo se tagata mauiga, Tokaga ai ki le nea leia e tuku i ou mua ;

² Teki se sele ki lou ua, Mo kapau e ke uakai.

³ Aua na ke oli ki ana nea kai malilie : Ko se nea kai kaka a ia.

⁴ Aua na ke mamae ulu ke ke mou koloa, Aua na ke fanaki ki lou atamai o ou.

⁵ Pe ke fia tuli i ou mata le nea leia ka puli ? Talie e fai e le mou koloa ni kapakau, Ti e fai a ia pe akuila, e lele a ia ki le lagi.

⁶ Aua na ke kai le pane o leia e tio fakaveli ona mata, Ti aua na ke manumanu ki ana nea kai malilie ;

⁷ Talie e fai a ia pe manatu o lona laumalie. E pati atu loa a ia : Kai ti inu ; Kae e leaise nofo lona loto mo koe.

⁸ E ke luluai loa le nea leia na ke kai, Ti e pupuli noa loa au masau malilie.

⁹ Aua na ke masau ki taliga o le tagata valea, Talie e vesia a ia ki le poto o au masau.

¹⁰ Aua na ke siki le koiga mago, Ti aua na ke ulu ki le faisaga o ni fanau sala matua ;

¹¹ Talie e mafimafi lolatou fakamauli : E fakafesagai loa a ia kiate koe.

¹² Fakamavaa lou loto ki le akonaki, Ti mo ou taliga ki masau o le poto.

¹³ Aua na ke taofi le laakau ki lau fanau ; Kapau e ke taai a ia ki le laakau, e leaise mate loa a ia.

¹⁴ I lau taai a ia ki le laakau, E ke saofaki lona laumalie i le nofoaga o le kau mate.

¹⁵ Ei loku vosa, kapau e poto lou loto, Ko loku loto o oku e fiafia loa.

¹⁶ E soposopo loa oku tootooga i le nekenekea, Mo ka fakasa loa e ou laugutu le nea leia e totonu.

¹⁷ Ke aua na fuaa lou loto ki le kau agasala, Kae ke maua tuumau e ia le i ki le Eteleno ;

¹⁸ Talie ko se apogipogi a ia kiate koe, Ti e leaise puli noa loa lau amanaki malie.

¹⁹ Ei loku vosa, ke ke fakalogo mai, ti ke ke liliu o poto ; Ke ke ave lou loto i le ala totonu.

²⁰ Ke aua na ke kau i le kau inu vino, Ia latou ala e kai fakavale ki inati :

²¹ Talie ko le tagata inu kava mo leia e kai fakavale e liliu o mativa, Ti ko le moe e fakatupu ia ni kofu masaesae.

²² Fakalogo ki lou tamana leia na ke tupu ai, Ti aua na ke fakanoa lou tinana mo ka matua a ia.

²³ Totogi le maoki, ti aua na ke fakatau a ia, Mo le poto, mo le akonaki, ti mo le atamai.

²⁴ Ko le tamana o le tagata agatonu e nofo loa i le nekenekea, Ti e fiafia loa leia na tupu ai se tagata poto.

²⁵ Ke fiafia lou tamana mo lou tinana, Ke nofo i le nekenekea leia na fanaui ia a koe !

²⁶ Ei loku vosa, soli mai lou loto, Ti ke fiafia ou mata i oku ala.

²⁷ Talie ko le fafine faiaga ko se popoko loloto, Ti ko le fafine matapule ko se sosoni lauikiiki.

²⁸ E fakatuu e ia ni masele ofaipe se tagata kaia, Ti e fakalasi e ia le kau agasala i lotolotoga o tagata.

²⁹ Kiate ai le mativa ? Kiate ai a malaia ? Kiate ai a fefele ? Kiate ai a lauga ? Kiate ai a lavea kae e leai sona tupuaga ? Kiate ai a mata kukula ?

³⁰ Kia latou ala e nonofo fualoa i tafa o le vino, Kia latou ala ano o inu ni vino makeke.

³¹ Aua na ke tio ki le vino leia e kula fulumalie, Leia e fai ia ni fuai kasoa i le ipu Ti e faigaofie lona inu.

³² E utiuti a ia i le fakaoki ofaipe se gata, Ti e kona a ia ofaipe se gata uti kona.

³³ E ave loa e ia ou mata ki ni fafine kese, Ti e sa loa mei lou loto ni nea fakafufu.

³⁴ E ke fai loa pe se tagata leia e moe i loto malie o le tai, Pe se tagata leia e moe i le tumutumu o se fana :

³⁵ E ke pati loa : Na ta au… kae e leaise kau maemaeia !… Na sasa au… kae e leaise kau logoi se nea !… E kau ala fakaa loa ?… koi kau fia inu !