Taagapati 21 - Tosi Tapu

Agatonu mo le agaveli (soko atu)

¹ Ko le loto o le sau ko se vaitafe i le lima o le Eteleno ; E fulusi e ia a ia ki ganea fuli e loto a ia ki ai.

² E sako a ala fuli o le tagata ki ona mata ; Kae ko leia e fuafua ia le mamafa o loto ko le Eteleno.

³ Ko le fai o le faitotonu mo le maoki, Ko lena le nea e mauiga ake ki le Eteleno i sakilifisio.

⁴ Ko ni mata fia taualuga mo se loto fia nealasi, Ko nea ana e fakasa ia le agasala a le kau agaveli.

⁵ Ko leia e tokaga o teuteu ana fakatuutuu e iloa ia loa le mou koloa ; Kae ko leia e fai nea fakatavili e tau mo le oge.

⁶ Ko latou ala e maua ia ni koloa o tupu ko le loi Ko ni kau vale e makape ki le mate.

⁷ Ko le agamakeke o le kau agaveli e ave ia latou ki le mate, O tupu e lotou fakafiti le fai o le nea leia e totonu.

⁸ E mulimuli le tagata agasala i ni ala pikopiko, Kae ko le tagata mea e fai nea fakaagatonu.

⁹ E malie ake le mauli i se tuliki o se fale i fafo, I le mauli i se loto fale mo se fafine fefele.

¹⁰ Ko le laumalie o le tagata agaveli e oli ki le veli ; Ko lona kaukau nea totonu e leaise maua ia se kalasia i ona mata.

¹¹ Ka tautea le tagata fia nealasi, e liliu le tagata valea o poto ; Ti ka ako le tagata poto, e maua e ia le iloa.

¹² E fakakaukau le tagata agatonu ki nea fuli i le fale o le tagata agaveli ; E ti e le Eteleno le tagata agaveli ki le malaia.

¹³ Ko leia e tapono ia lona taliga ki le kalaga a le tagata mativa, E kalaga loa a ia totonu, kae e leaise maua loa e ia se tali.

¹⁴ Ko se nea alofa leia e fai fakafufu e fakafimalie ia le ita, Ti ko se moliga leia e fai fakafufu e fakafimalie ia le ita veli.

¹⁵ Ko se fiafia ki le tagata faitotonu le fai o le faitotonu, Kae ko le maumau e tuku kia latou ala e fai ia le veli.

¹⁶ Ko le tagata leia e mavae i le ala o le poto E malolo loa i le fakatasiga o le kau mate.

¹⁷ Ko leia e manako ki le fakafiafia e nofo i le mativa ; Ko leia e manako ki le vino mo le kaloni e leaise mou koloa.

¹⁸ E fetogi e le tagata agaveli le tagata agatonu, Ti mo le tagata kaka le tagata maokioki.

¹⁹ E malie ake le nofo i se kele toafa, I le nofo mo se fafine fefele mo itaita.

²⁰ E maua ni koloa mauiga mo se kaloni i le nofoaga o le tagata poto ; Kae e folo e le tagata valea a nea ana.

²¹ Ko leia e afa fakamalotoloto ia le faitotonu mo le agamalie E maua ia le mauli, mo le faitotonu, mo le kololia.

²² E pale le tagata poto ki le kolo o le kau toa, Ti e maumaui e ia le makeke leia na fanaki ki ai.

²³ Ko leia e tokaga ki lona gutu mo lona alelo E taupau ia lona laumalie i mamae.

²⁴ Ko le tagata fia nealasi, mo le tagata fia taualuga, e gologolo ki nea fuli, Ti e sa lona fia nealasi i ana gaoi fuli.

²⁵ Ko oli o le tagata gasueveli e tamate ia a ia, Talie e kaekae ona lima i le gaoi.

²⁶ I le aso katoa e maua e ia ni oli ; Kae ko le tagata agatonu e solisoli, sala fuafua.

²⁷ Ko le sakilifisio a le kau agaveli ko se nea fakalialia ; Tafito mo ka fai a ia mo ni manatu veveli.

²⁸ E mate loa le tagata fakamaoki loi, Kae ko le tagata leia e fakalogologo e masau tuumau loa.

²⁹ E too le tagata agaveli ni mata mamalu ; Kae e fakamakeke e le tagata agatonu lona ala.

³⁰ E leaise tuu se poto, pe ko se atamai, Pe ko se tokoi i mua o le Eteleno.

³¹ E teuteu le osi ki le aso o le tau Kae e fakalogo le malo ki le Eteleno.