Taagapati 20 - Tosi Tapu

Agatonu mo le agaveli (soko atu)

¹ E gologolo le vino, ti e logoa a kava makeke ; Ko leia e fakavalevale ki ai e leaise poto.

² Ko le i ki le sau e faipe le gugulu o le laione, Ko leia e fakatupu ia lona ita e agasala kiate ia totonu.

³ Ko se kololia ki le tagata ke aua na kau i fefele, Kae ko vale fuli e kau i ai.

⁴ O tupu ko le momoko, e leaise teuteu e le tagata gasueveli lona faisaga ; I le temi tuuti o le fulumeto, e loto a ia ke tuuti se nea, kae e leaise nea.

⁵ Ko fakatuutuu i le loto o le tagata ko ni vai loloto, Kae e iloa e le tagata atamai le asu o le vai mei ai.

⁶ E toka api latou ala e fakasa ia lolatou agamalie ; Kae ko se tagata agatonu, ko ai e maua ia loa a ia ?

⁷ E saele le tagata agatonu i lona faitotonu ; Manuia ana fanau i ona muli !

⁸ Ka eke le sau i lona ekeekeaga i le fakamaauaga, E tio ona mata ki le veli i lana uluaki fa tio.

⁹ Ko ai e pati loa : kua kau fakamea loku loto, Kua kau mea i laku agasala ?

¹⁰ Ko faasiga fua e lua, ko faasiga efa e lua, Ko nea ana e lua e fakalialia ki ai le Eteleno.

¹¹ E fakasa foki e le toe i ana gaoi Pe mea loa mo sako lona mauli.

¹² Ko le taliga leia e logo, ti mo le mata leia e tio, Ko le Eteleno leia na fai ia laua.

¹³ Aua na ke manako ki le moe, na ke liliu o mativa ; Fakamavaa ou mata, ti e ke makona loa i le pane.

¹⁴ E pati le tagata faifakatau : Veli ! veli ! Kae i lana ano, e fakafiafia a ia.

¹⁵ E lasi le aulo, ti e tutuna fuai kasoa ; Kae ko laugutu poto ko se nea tasitasiga.

¹⁶ Too lona kofu, talie na fetogi e ia lona oloi ; Fakamaua kiate ia ni fakamaoki o tupu ko le kau matapule.

¹⁷ E kano malie le pane o le loi ki le tagata, Kae ki muli e apele loa lona gutu i ni kilikili.

¹⁸ E fakamakeke fakatuutuu i le fakakaukau ; I mua o le fai o le tau, fakakaukau malie.

¹⁹ Ko leia e fakamafola ia ni lauveli e fakasa ia a nea fakapulipuli ; Aua na ke kau mo leia e fakamavaa ia ona laugutu.

²⁰ Kapau e lauveli se tasi ki lona tamana mo lona tinana, E mate loa lona malama i loto malie o le fakapouli.

²¹ Ko le tofiga leia na maua vave i le kamataaga, E leaise tapuakina loa i le fakaoki.

²² Aua na ke pati : E kau liufaki loa le veli. Fanaki ki le Eteleno, ti e saofaki loa e ia a koe.

²³ E fakalialia le Eteleno ki faasiga fua e lua, Ti e leaise malie le fua leia e sala.

²⁴ Ko le Eteleno leia e taki ia lakaaga o le tagata, Kae ko le tagata, pe mafai ke iloa e ia lona ala ?

²⁵ Ko se masele ki le tagata lana fakanoai se fakapapau tapu, Ti mo lana fakakaukau ki muli kae kua fai lana fakapapau !

²⁶ Ko le sau leia e poto e fakapuli ia le kau agaveli, O tuku latou ke mio ia le fa teka.

²⁷ Ko le tukumanava o le tagata ko se malama o le Eteleno ; E ulu a ia o kaku ki takele o tootooga.

²⁸ Ko le agamalie mo le agatonu e taupau ia le sau, Ti e fakamakeke e ia lona ekeekeaga fakasau i le agamalie.

²⁹ Ko le makeke ko le kololia o le kau tupulaga, Ti ko le ulu sina ko le pala o le kau matua.

³⁰ Ko lavea mamae e feala ke fakamauli ia le tagata agaveli, Ti ko ta ala e ulu o kaku ki takele o tootooga ke fakapoto ia a ia.