Taagapati 2 - Tosi Tapu

Ko le poto e saofaki ia i le veli

¹ Ei loku vosa, kapau e ke taofi aku masau, Ti kapau e ke taupau aku pelesepeto iate koe,

² Kapau e ke ako lou taliga ke tokaga ki le poto, Ti kapau e ke peluki lou loto ki le atamai ;

³ Io, kapau e ke kole le poto, Ti kapau e kalaga lou leo ki le atamai,

⁴ Kapau e ke afa le poto ofaipe le paaga, Kapau e ke tuli a ia ofaipe se koloa fakafufu,

⁵ Ti e ke matala loa ki le i ki le Eteleno, Ti e ke maua loa le iloa o le Atua.

⁶ Talie e soli e le Eteleno le poto ; E au mei lona gutu le iloa mo le atamai ;

⁷ E taupau e ia le fakamauli ki tagata maokioki, Ko se paletau a ia kia latou ala e saele i le agatonu.

⁸ E tausi e ia a ala o le faitotonu, Io, e taupau e ia le ala o lana kau agatonu.

⁹ Ti e ke matala loa ki le faitotonu, mo le agatonu, Mo le loto sako, mo ala fuli ala e taki ia ki le malie.

¹⁰ Talie e au loa le poto ki lou loto, Ti e fai loa e le iloa ni nea malilie ki lou laumalie ;

¹¹ E leoleo loa a koe e le fakakaukau, E taupau loa a koe e le atamai,

¹² Ke saofaki a koe i le ala o le veli, I le tagata leia e fai ia ni masau veli,

¹³ Ia latou ala e tiaki ia a ala o le maoki, O tupu ke saele i ni ala fakapouli,

¹⁴ Ala e fiafia i le fai o le veli, Ala e maua lolatou fiafia i le agaveli,

¹⁵ Ala e mulimuli i ni ala o le kaka, Ala e saele i ni ala pikopiko ;

¹⁶ Ke saofaki a koe i le fafine matapule, I le fafine matapule leia e fai ia ni masau fakalapulapu,

¹⁷ Leia e tiaki ia lona uluaki alofaaga, Ti e galoi ia le sai a lona Atua ;

¹⁸ Talie e matule lona fale ki le mate, Ti e ano lona ala ki le fale o le kau mate :

¹⁹ E leaise se tasi ia latou ala e ano kiate ia e toe liliu mai, Ti e toe maua ia a ala o le mauli.

²⁰ E ke saele loa i le ala o tagata agamalie, E ke taupau loa a ala o le kau agatonu.

²¹ Talie e nonofo loa le kau agatonu i le fenua, Ti e nonofo loa i ai le kau saosaoa ;

²² Kae e tuuti loa le kau agasala i le fenua, E taaki loa le kau agaveli i ai.