Taagapati 19 - Tosi Tapu

Agatonu mo le agaveli (soko atu)

¹ E malie ake le tagata mativa leia e saele i le maoki, I le tagata leia e maua ia ni laugutu veli ti e valea.

² E leaise malie le puli o le poto ki se tagata, Ti ko leia e fakatavili ia ona vae e vilo ki le agasala.

³ Ko le valea o le tagata e fakaveli ia lona ala, Ti e itaita lona loto ki le Eteleno.

⁴ Ko koloa e fakalasi ia kaukau nea, Kae e tiaki le mativa e lona kaukau nea.

⁵ E leaise sala tautea loa le tagata fakamaoki loi, Ti e leaise sao loa leia e fai ia ni loi.

⁶ E toka api latou ala e vikiviki ia le tagata mauiga, Ti e fakakaukaunea tagata fuli ki le leia e solisoli.

⁷ E vesia fetaina fuli o le tagata mativa kiate ia ; Ti e asilisili fakamamao ona kaukau nea iate ia ! E fakakolekole a ia kia latou, kae e lotou sosola o pupuli.

⁸ Ko leia e afa ia le fakakaukau e alofa ki lona laumalie ; Ko leia e tokaga ki le atamai e maua ia le manuia.

⁹ E leaise sala tautea loa le tagata fakamaoki loi ; Ti e mate loa leia e gutu loiloi.

¹⁰ E leaise gali le vale ke mauli i le fiafia ; E toe asilisili fuluveli ake foki mo ka pule le tagata popula ki ni tama aliki !

¹¹ Ko le tagata leia e poto e leaise itaita vave, Ti e maua e ia lona kololia i le fakamolemole ki veli ala na fai ake kiate ia.

¹² Ko le ita o le sau e faipe le gugulu o le laione, Ti ko lona agamalie e faipe le sese i le mutie.

¹³ Ko se vosa valea ko se malaia a ia ki lona tamana, Ti ko fefele o se fafine ko se tulu e leaise toe malu.

¹⁴ E feala ke maua tofiga se fale mo ni koloa mei lona tamana, Kae ko se fafine atamai ko se nea alofa a ia mei le Eteleno.

¹⁵ Ko le gasueveli e fakavilo ia ki tulemoe, Ti ko le laumalie leia e gasueveli e mamae loa i le fia kai.

¹⁶ Ko le tagata leia e tausi ia le fakatotonu e tausi ia lona laumalie ; Kae ko leia e leaise tokaga ki lona ala e mate loa.

¹⁷ Ko leia e alofa ki le mativa e soli ki le Eteleno, Leia e toe liufaki ia loa kiate ia o mulimuli ki lana gaoi.

¹⁸ Tautea lou vosa, talie koi maua se amanaki malie kiate ia ; Kae aua na ke oli ke fakamate a ia.

¹⁹ Ko le tagata itaita e tonu ke tuku ki ai se tua ; Talie kapau e ke tuku a ia ke lauatea, e tonu loa ke ke toe liliu ki muli.

²⁰ Fakalogo ki tokoi, ti tali akonaki, O tupu ke ke poto i le soko atu o lou mauli.

²¹ E lasi fakatuutuu i le loto o le tagata, Kae ko le fakatuutuu a le Eteleno leia e soko.

²² Ko le nea leia e fakatupu ia le fulumalie o se tagata ko lona agamalie ; Ti e malie ake se tagata mativa i se tagata gutu loiloi.

²³ Ko le i ki le Eteleno e taki ia ki le mauli, Ki se mauli i le mou, o mamao i le malaia.

²⁴ Ko le tagata gasueveli e velo ia lona lima ki le pa, Ti e leaise toe aumai e ia a ia ki lona gutu.

²⁵ Taai le tagata gologolo, ti e liliu loa le vale o poto ; Valoki le tagata atamai, ti e matala loa a ia ki le poto.

²⁶ Ko leia e maumau ia a koloa o lona tamana, ti e fakasola ia lona tinana, Ko se vosa lee gali mo fakalumaluma.

²⁷ Ei loku vosa, tuku lau fakalogo ki le akonaki, Mo kapau ko se nea ke fakamamao ai a koe i masau o le poto.

²⁸ E gologolo se tagata fakamaoki agaveli ki faitotonu ; Ti e kai e le gutu o tagata agaveli le veli.

²⁹ E teuteu ni tautea ki le kau fia nealasi, Ti e teuteu le laakau ki le tua o le kau vale.