Taagapati 18 - Tosi Tapu

Agatonu mo le agaveli (soko atu)

¹ Ko leia e tuu kese e afa ia le nea leia e malie kiate ia, E itaita a ia ki nea fuli e poto.

² E leaise fiafia le vale i le atamai, Kae i le fakasa o ana manatu.

³ Ka au le agaveli, e toe au foki mo le nukinuki, Mo le matagafua, ti mo le luma.

⁴ Ko masau o le gutu o se tagata ko ni vai loloto ; Ko le matapuna o le poto ko se liua e mapaa mei se mauga.

⁵ E leaise malie ke kau mo le tagata agaveli, O fakafiti le faitotonu ki le tagata saosaoa i le fakamaauaga.

⁶ E kau laugutu o le tagata valea ki felega, Ti e fakatupu e lona gutu ni ta.

⁷ E fakatupu e le gutu o le tagata valea lona maumau, Ti ko ona laugutu ko se masele ki lona laumalie.

⁸ Ko masau a le tagata folafola veli e faipe ni lole, E lotou ulu o kaku ki takele o tootooga.

⁹ Ko leia e gaoi fakagasueveli E tautaina mo leia e maumau.

¹⁰ Ko le suafa o le Eteleno ko se tule makeke ; E sola ki ai le tagata agatonu, ti e maua e ia se fimalie.

¹¹ Ko le koloa ko se kolo makeke ki le tagata mou koloa ; E pati a ia, ko se paa taualuga a ia.

¹² I mua o le maumau, e malaga ki aluga le loto o le tagata ; Kae e muamua le fakataulalo i le kololia.

¹³ Ko leia e tali kae na leaise fakalogo mua E fakasa ia lona valea ti e kai ia lona luma.

¹⁴ Ko le loto o le tagata e taofi ia a ia i le masaki ; Kae ko le loto gaegae, ko ai e toe lagai ia loa a ia ?

¹⁵ E maua e le loto atamai le poto, Ti e afa e le taliga o le kau poto le iloa.

¹⁶ Ko nea alofa a se tagata e fakalaulasi ia le ala kiate ia, Ti e fakamavaa ia kiate ia le ala ki tafa o le kau lalasi.

¹⁷ Ko leia e uluaki masau i le fakamaauaga e mata maoki, Kae ka au le fakafesagai, e toe tioi a ia.

¹⁸ Ko le toso e fakagato ia a visi, Ti e fakasa ia le tonu i le kau lalasi.

¹⁹ E faigataa ake ni fetaina e veliveli i le ulu ki se kolo makeke, Ti e tatau alatou felega mo ni ukamea fakamaumau o se fale sau.

²⁰ E fakamakona e le tagata lona tino ki le fua o lona gutu ; Ti e fakamakona e ia a ia ki le fua o ona laugutu.

²¹ E maua e le alelo le pule ki le mate mo le mauli. Ko leia e alofa ki ai e kai ia loa ona fua.

²² Ko le tagata leia e maua ia sona avaga e maua ia le manuia ; Ko se kalasia a ia e fai e le Eteleno kiate ia.

²³ E masau le tagata mativa o kolekole, Kae tali fakamakeke le tagata mou koloa.

²⁴ Ko leia e mauke ona kaukau nea e maua ia latou ki lona malaia, Kae e i ai se kaukau nea leia e alofa ake i le taina.