Taagapati 17 - Tosi Tapu

Agatonu mo le agaveli (soko atu)

¹ E malie ake se ga pane malo, mo le tokamalie, I se fale e apele i inati, mo ni fefele.

² Ko se tagata fakasausau poto e pule ki le vosa leia e fakalumaluma, Ti e kau loa a ia i le tofiga i loto malie o fetaina.

³ E asiasii le aulo mo le siliva i le kulo saka ukamea, Kae ko leia e asiasii ia a loto, ko le Eteleno.

⁴ E tokaga le tagata agaveli ki laugutu loi, Ti e tokaga le taliga o le tagata gutu loiloi ki le alelo fatufatu.

⁵ Ko leia e gologolo ki le mativa e lauveli ki leia na fakatupu ia a ia ; Ko leia e fakafiafia i se malaia e tautea loa.

⁶ Ko fanau o fanau ko le pala o le kau matua, Ti ko tamana ko le kololia o olatou fanau.

⁷ E leaise gali masau fakaapaapa mo le tagata valea ; Ti e tatau foki mo masau loi, e leaise lotou gali mo se tagata aliki.

⁸ E tatau nea alofa mo se fatu mauiga ki mata o leia e maua ia a ia ; I potu fuli e maliu ki ai e manuia a ia.

⁹ Ko leia e uufi ia se sala e afa ia le alofa, Kae ko leia e fakamanatu ia a ia i ana masau e veteki ia a kaukau nea.

¹⁰ Ko se valoki e tasi e lasi ake lona aoga ki le tagata atamai I ni fa ta e kau lelau ki le tagata valea.

¹¹ E afa e le tagata agaveli le agatuu, Kae e kakau loa se tagata tukipo kiate ia.

¹² E malie ake le felavei mo se uluso fafine kua too ona uviki, I le felavei mo se tagata valea i lona temi valea.

¹³ Ko leia e totogi ia le malie ki le veli, E leaise toe mavae loa le veli i lona fale.

¹⁴ Ko le kamata o se fefele, ko le fakamavaa a ia o se kaua e taofi ia le vai ; I mua o le vevela o le fefele, ke ke ano o puli.

¹⁵ Ko leia e fakamolemole ki le tagata na sala ti mo leia e fakatua ia le tagata na leaise sala E fakalialia toka lua ki mata o le Eteleno.

¹⁶ Kolea le aoga o le paaga i le lima o le tagata valea ? Ke totogi ai le poto ?… kae e leai fua sona atamai.

¹⁷ E alofa le kaukau nea i temi fuli, Ti i le malaia e fai a ia pe se taina.

¹⁸ Ko le tagata sala atamai e fai ia ni fakapapau, E fetogi e ia lona oloi.

¹⁹ Ko leia e alofa ki fefele e alofa ki le agasala ; Ko leia e loto ke taualuga lona matapa e afa ia lona maumau.

²⁰ Ko se loto kaka e leaise maua ia le manuia, Ti ko leia e veli lona alelo e vilo ki le malaia.

²¹ Ko leia e fatupu ia se tagata valea e mamae loa ; E leaise feala ke fiafia le tamana o se vale.

²² Ko le loto leia e fiafia ko se faitoo malie, Kae ko le loto mamae e fakatupu ia le malo o ivi.

²³ Ko le tagata agaveli e tali fakafufu ia ni nea alofa Ke fetogi ai a ala o le faitotonu.

²⁴ E tuu le poto i mua o le tagata atamai, Kae e taka a mata o le tagata valea i potupotu o le malama nei.

²⁵ Ko se vosa valea e fakatupu ia le mamae o lona tamana, Ti mo le fakasemala o leia na fanaui ia a ia.

²⁶ E leaise malie ke tautea le tagata agatonu ; Ti ke taai a aliki o tupu ko lola faitotonu.

²⁷ Ko leia e taofi ia ana masau e iloa ia le poto, Ti ko leia e loto malie ko se tagata atamai.

²⁸ Ka fakalologo foki le vale, e fai a ia pe se tasi leia e poto, Ti ko leia e tapono ia ona laugutu ko se tagata atamai.