Taagapati 16 - Tosi Tapu

Agatonu mo le agaveli (soko atu)

¹ Ko fakatuutuu ala e fai e le loto e fakalogo ki le tagata, Kae ko le tali leia e tuku e le gutu e au mei le Eteleno.

² E mea ala fuli o le tagata ki ona mata, Kae e fakamaau e le Eteleno a manatu o le loto.

³ Tuku ki le Eteleno au gaoi fuli, Ti e manuia loa au fakatuutuu.

⁴ Na fai e le Eteleno a nea fuli ki se tauaga, Ti mo le tagata agaveli foki ki le aso o le malaia.

⁵ E fakalialia le Eteleno ki lotu fuli e fia taualuga ; Ti e tautea maoki loa e ia latou i se aso.

⁶ I le agamalie mo le agatonu e fakamolemole ai ki le agaveli, Ti i le i ki le Eteleno e tafoki ai mei le veli.

⁷ Ka malie a ala o se tagata ki le Eteleno, E fai e ia ke malilie mo ia ona fili foki.

⁸ E malie ake se totogi ikiiki, mo le faitotonu, I ni totogi lalasi, kae sala faitotonu.

⁹ E fakakaukau le loto o le tagata ki lona ala, Kae ko le Eteleno leia e taki ia ona lakaaga.

¹⁰ E masau le sau i le pule mei le Atua : E leaise tonu ke faisala lona gutu mo ka fakamaau a ia.

¹¹ Ko le kilo totonu mo le fua totonu a le Eteleno ; Ko nea kilo fuli e tuku i le taga ko lana gaoiaga.

¹² E fakalialia a sau i le fai o le veli, Talie e fakamakeke le ekeekeaga fakasau e le faitotonu.

¹³ E fiafia le sau i laugutu faitotonu, Ti e alofa a ia ki leia e masau i le maoki.

¹⁴ Ko le ita o le sau ko se tagata avelogo o le mate, Ti e tonu ke fakafimalie lona loto e se tagata poto.

¹⁵ Ko le mata katakata o le sau e soli ia le mauli, Ti e fai lona alofa pe se ua o le temi fakatutupu.

¹⁶ E mauiga ake le maua o le poto i le aulo ! E malie ake le maua o le atamai i le paaga.

¹⁷ Ko le ala o le kau agatonu, ko le tiaki o le veli ; Ko leia e taupau ki lona laumalie e tokaga ki lona ala.

¹⁸ E muamua le fia nealasi i le maumau, Ti ko le loto fia masiki i le siga.

¹⁹ E malie ake le fakataulalo mo latou e agamalu, I le vaevae o se koloa lasi mo le kau fia nealasi.

²⁰ Ko leia e fakakaukau ki nea e maua ia le fiafia, Ti ko leia e fanaki ki le Eteleno e manuia.

²¹ Ko leia e poto i le loto e igoa e atamai, Ti ko le agamalu o masau e fakalasi ia le poto.

²² Ko le poto ko se matapuna o le mauli ki leia e maua ia a ia ; Kae ko le tautea o le kau vale ko lolatou valea.

²³ Ko leia e poto i lona loto e fakasa ia lona poto i lona gutu, Ti e sa le lasi o lona poto i ona laugutu.

²⁴ E tatau masau malilie mo le laui meli, E lotou sua malie ki le laumalie, ti e lotou fakamakeke ia le tino.

²⁵ E i ai se ala e mata malie ki le tagata, Kae ko lona fakaoki ko le ala o le mate.

²⁶ Ko leia e gaoi, e gaoi kiate ia, Talie ko lona gutu e tagi ki ai.

²⁷ E teuteu e le tagata veli ke malaia, Ti e maua i ona laugutu se afi kaka.

²⁸ E fakatupu e le tagata veli ni fefele, Ti ko le tagata folafola veli e veteki ia a kaukau nea.

²⁹ E fakasalai e le tagata agaitaita lona oloi, Ti e fakasaele e ia a ia i se ala leia e leaise malie.

³⁰ Ko leia e tapono ia ona mata e fai ia ni manatu veveli, Ti ko leia e uuti ia ona laugutu kua fakasoko ia le veli.

³¹ Ko le ulu sina ko se pala o le mauiga ; E maua a ia i le ala o le maokioki.

³² Ko leia e ita tuvai e malie ake i le tagata toa, Ti ko leia e loto lolomi e malie ake i leia e malo i se kolo.

³³ E fai se toso ke iloa le nea leia ke fai, Kae e au a tonu fuli mei le Eteleno.