Taagapati 15 - Tosi Tapu

Agatonu mo le agaveli (soko atu)

¹ E fakafimalie le ita e se tali malu, Kae e fakaasilisili a ia e se masau fefeka.

² Ka masau le poto, e fakatupu e ia le fia iloa, Kae e fakatupu e le gutu o le kau vale le valea.

³ E ave a mata o le Eteleno i potu fuli, ke tio ki le kau agaveli mo le kau agamalie.

⁴ Ko le alelo malu ko se laakau o le mauli, Kae ko le alelo veli e fatii ia le laumalie.

⁵ E vesia le vale ki le akonaki a lona tamana, Kae ko leia e tokaga ki le valoki e poto.

⁶ E i ai se koloa lasi i le fale o le tagata agatonu, Kae e i ai se mamae i le koloa o le tagata agaveli.

⁷ E liligi le poto e laugutu o le kau poto ; Kae e gaati le ulu o le kau vale.

⁸ E fakalialia le Eteleno ki sakilifisio a le kau agasala, Kae e fiafia a ia ki le kole a le kau agatonu.

⁹ E fakalialia le Eteleno ki le ala o le tagata agaveli, Kae e alofa a ia ki le tagata leia e muli i le maokioki.

¹⁰ E talitali se tautea mamafa ki leia na tiaki ia le ala o le maokioki ; Ti ko leia e vesia ki le valoki e mate loa.

¹¹ E tuu i mua o le Eteleno le nofoaga o le kau mate mo le vanu loloto ; Kae e feaki ake loa a loto o vosa o le tagata !

¹² E leaise loto le tagata fia nealasi ke valoki, Ti e leaise ano a ia ki le kau poto.

¹³ Ko se loto fiafia e fakafiafia ia a mata, Kae ka mamae le loto, e mamae a mata.

¹⁴ Ko se loto atamai e afa ia le poto, Kae ko le gutu o le kau vale e fakafiafia ia le valea.

¹⁵ E veveli aso fuli o le tagata leia e mamae, Kae ko le loto fiafia ko se kaitasi a ia o lee gato.

¹⁶ E malie ake se nea ikiiki mo le i ki le Eteleno, I se koloa lasi mo le mamae.

¹⁷ E malie ake le kai o le mutie i se ganea leia e maua ai le alofa, I le kai o se pipi gako, kae nofo ai le vesia.

¹⁸ E fakatupu e se tagata itaita ni fefele, Kae ko le tagata kataki e lolomi ia ni felega.

¹⁹ E fai le ala o le tagata gasueveli pe se a laakau talatala, Kae e tokamalie le ala o le tagata agatonu.

²⁰ Ko se vosa poto e fakafiafia ia lona tamana, Kae ko le vosa valea e vesia ki lona tinana.

²¹ Ko le valea ko se fiafia ki leia e sala atamai, Kae e ano le tagata atamai i le ala totonu.

²² E leaise soko a fakatuutuu, o tupu ko le mativa fakakaukau ; Kae e lotou manuia mo ka lasi le kau fakakaukau.

²³ E fiafia le tagata mo ka fai e ia se tali malie, Ti e feaki ake loa mo ka fai se tali malie i lona lakaga totonu.

²⁴ Ki le tagata poto, ko le ala o le mauli e taki ia ki aluga, O tupu ke mamao a ia i le nofoaga o le kau mate leia e tuu i lalo.

²⁵ E soloi e le Eteleno le fale o le kau fia nealasi, Kae e fakamakeke e ia a koiga o le fafine lokonui.

²⁶ E fakalialia le Eteleno ki fakakaukau veveli, Kae ko masau malilie e mea ki ona mata.

²⁷ Ko leia e manumanu koloa e fakamamae ia lona fale, Kae ko leia e vesia ki nea alofa e mauli loa.

²⁸ E fakakaukau le loto o le tagata agatonu ki lana tali, Kae e maligi mei le gutu o le tagata agaveli a nea veveli.

²⁹ E mamao le Eteleno i le kau agaveli, Kae e fakalogo a ia ki le kole a tagata agatonu.

³⁰ Ko le nea leia e malie ki mata e fakafiafia ia le loto ; Ko se logo malie e fakamakeke ia le tino.

³¹ Ko le tagata leia e tuku lona taliga ki se valoki leia e taki ia a ia ki le mauli, E nofo i loto malie o le kau poto.

³² Ko leia e tiaki ia le akonaki e vesia ki lona laumalie, Kae ko leia e fakalogo ki le akonaki e maua ia le atamai.

³³ Ko le i ki le Eteleno e ako ia le poto, Ti e muamua le fakataulalo i le kololia.