Taagapati 14 - Tosi Tapu

Agatonu mo le agaveli (soko atu)

¹ E fakatuu e le fafine poto lona fale, Kae e soloi e le fafine valea lona fale ki ona lima totonu.

² Ko leia e saele i le maoki e i ki le Eteleno, Kae ko leia e saele i ni ala pikopiko e vesia kiate ia.

³ I le gutu o le vale e i ai se laakau ki lona fia nealasi, Kae ko masau a le tagata poto e puipui ia a ia.

⁴ Kapau e leaise maua ni pipi gaoi kele, e lavaki le fata tanaki fulumeto ; Talie ko le makeke leia o pipi e fakatupu ia ni koloa o lasi.

⁵ E leaise loi se tagata fakamaoki agatonu, Kae e loi ata le tagata fakamaoki loi.

⁶ E afa e le tagata gologolo le poto, kae e leaise maua e ia a ia ; Kae ko se nea faigaofie le poto ki le tagata atamai.

⁷ Ke ke fakamamao i le tagata valea, Talie e leaise mafai ke ke tio ki le poto i ona laugutu.

⁸ Ko le poto o le tagata poto, ko le leoleo o lona ala ; Kae e sese le vale o tupu ko lona valea.

⁹ E fakamanogii e le kau vale le agasala, Kae e nofo le agamalie i loto malie o le kau agatonu.

¹⁰ E iloa e le loto ona mamae o ona, Ti e leaise feala ke kau se tasi kese i ona fiafia.

¹¹ E maumau loa le fale o le tagata agaveli, Kae e se loa le fale o tagata agatonu.

¹² E feala ke totonu se ala ki mata o se tagata, Kae ko lona tauaga ko le ala o le mate.

¹³ E feala ke mamae le loto i loto malie foki o le kata, Ti e feala foki ke fakaoki le fiafia ki le mamae.

¹⁴ Ko leia e sese lona loto e makona i ona ala, Kae e makona le tagata agamalie i le nea leia e maua iate ia.

¹⁵ E tui le tagata valea ki nea fuli e fakasa kiate ia, Kae e tokaga le tagata poto ki ona lakaaga.

¹⁶ E i le tagata poto ki le veli, o fakamamao mei ai, Kae e masau matasoka le vale talie e fanaki a ia kiate ia.

¹⁷ Ko leia e itaita vave e fai ia ni sala valea, Ti e tupu le vesia ki le tagata leia e apele i manatu veveli.

¹⁸ Ko le vaega o le kau vale ko le valea, Kae ko le pala o le tagata poto ko le poto.

¹⁹ E punou le kau agaveli i mua o le kau agamalie, Ti e punou le kau agasala i le matapa o le tagata agatonu.

²⁰ E toe vesia foki le kaukau nea o le tagata mativa kiate ia, Kae e lasi kaukau nea o le tagata mou koloa.

²¹ E agasala leia e vesia ki lona oloi, Kae e manuia leia e alofa ki le kau mativa !

²² Pe leaise sese latou ala e fakakaukau ki le veli ? Kae ko latou ala e fakakaukau ki le malie e agamalie mo agatonu.

²³ E maua e gaoi fuli se totogi, Kae ko le totogi o le lasi o masau noa ko le oge.

²⁴ Ko le koloa ko se pala ki le kau poto ; Kae ko le valea o le kau vale e tuu mau aifai ko le valea.

²⁵ Ko le tagata fakamaoki leia e fakasa ia le maoki e fakamauli ia ni laumalie, Kae ko le tagata kaka e masau ki loi.

²⁶ Ko leia e i ki le Eteleno e maua ia se fanakiaga makeke, Ti e maua e ana fanau se mumuniaga i ona tafa.

²⁷ Ko le i ki le Eteleno ko se matapuna o le mauli, Ke saofaki ai i masele o le mate.

²⁸ Ka api le kakai, ti ko le kololia a ia o le sau, Kae ka lavaki le kakai, ti ko le maumauaga a ia o le sau.

²⁹ Ko leia e leaise itaita vave e nofo mo se atamai lasi, Kae ko leia e itaita vave e fakasa ia lona valea.

³⁰ Ko se loto malie ko le mauli ki le tino, Kae ko le loto fuaa ko le masaki ki ivi.

³¹ Ko le fakaveliveli o le tagata mativa ko le lauveli ki leia na fakatupu ia a ia, Kae ko le alofa ki leia e fakaaloalofa ko le fakamauiga o leia na fakatupu ia a ia.

³² E vilo le tagata agaveli o tupu ko lana agaveli, Kae e maua e le tagata agatonu se mumuniaga i lona mate.

³³ E malolo le poto i le loto o leia e atamai, Kae e sa a ia ki tafa i loto malie o le kau vale.

³⁴ E siki e le faitotonu se puleaga ki aluga, Kae ko le agasala ko le lumaaga a ia o le kakai.

³⁵ E fiafia le sau i le tagata fakasausau poto, Kae e vilo lona ita ki leia e fakalumaluma.